استانا قالاسىنىڭ اكىمى جەڭىس قاسىمبەك Instagram پاراقشاسىندا جاڭادان اشىلاتىن مەديتسينالىق نىساندار تۋرالى جازدى، دەپ حابارلايدى ەلوردا اكىمدىگىنىڭ رەسمي سايتى.
«تۇرعىندار سانىنىڭ ءوسۋى مەن قولدانىستاعى مەديتسينالىق ۇيىمدارعا تۇسەتىن جۇكتەمەنى ەسكەرە وتىرىپ، مەديتسينا ينفراقۇرىلىمىن كەزەڭ-كەزەڭىمەن كەڭەيتىپ جاتىرمىز. بۇگىن قر پرەمەر-ءمينيسترىنىڭ ءبىرىنشى ورىنباسارى نۇرلىبەك نالىباەۆپەن جانە قر دەنساۋلىق ساقتاۋ ءمينيسترى اقمارال النازاروۆامەن بىرگە بىرقاتار مەديتسينالىق مەكەمەنى ارالادىق.
مەملەكەت باسشىسىنىڭ تاپسىرمالارى اياسىندا بيىل №2 قالالىق كوپبەيىندى اۋرۋحانانىڭ جانىنان جاڭادان قابىلداۋ-دياگنوستيكالىق كەشەنىن، سونداي-اق №2 كوپبەيىندى قالالىق بالالار اۋرۋحاناسىنىڭ جانىنان بالالارعا ارنالعان تراۆماتولوگيالىق پۋنكت اشامىز. قالعان نىساندار – پەريناتالدىق ورتالىق، كوپبەيىندى اۋرۋحانا جانە ءۇش ەمحانا كەزەڭ-كەزەڭىمەن اشىلادى.
№2 قالالىق كوپبەيىندى اۋرۋحانانىڭ جانىنان اشىلاتىن جاڭا قابىلداۋ-دياگنوستيكالىق كەشەن ەلوردانىڭ سول جاعالاۋىنداعى تۇرعىندارعا ارنالعان ەرەسەكتەردىڭ قابىلداۋ ءبولىمىن، اكۋشەرلىك قابىلداۋ ءبولىمىن، دياگنوستيكالىق قىزمەتتەر مەن تراۆماتولوگيالىق پۋنكتى بىرىكتىرەدى. جالپى اۋماعى 7 مىڭ 120 شارشى مەتر بولاتىن بەس قاباتتى نىسان تاۋلىگىنە 700-900 ادامدى قابىلداۋعا ەسەپتەلگەن.
كەشەندە كومپيۋتەرلىك توموگرافيا، مرت، رەنتگەنودياگنوستيكا، انگيوگرافيالىق وپەراتسيالىق بولمە، وپەراتسيالىق زالدار، ينسۋلت ورتالىعى، تراۆماتولوگيا بولىمشەلەرى، رەانيماتسيا جانە قارقىندى تەراپيا بولىمشەلەرى قاراستىرىلعان.
ەڭ باستى ارتىقشىلىعى – شۇعىل كومەك كورسەتۋدىڭ بارلىق قاجەتتى كەزەڭىنەن ءبىر كەشەننىڭ ىشىندە وتۋگە مۇمكىندىك بار: العاشقى تەكسەرۋدەن ءوتىپ، دياگنوز قويىلعاننان كەيىن وپەراتسيا جاساتۋعا جانە ارى قارايعى ەمىن جالعاستىرۋعا دەيىن. بۇل ناۋقاستاردى تەكسەرۋ مەن دارىگەرلەردىڭ شەشىم قابىلداۋ ۋاقىتىن جىلدامداتىپ، مامانداندىرىلعان مەديتسينالىق كومەكتىڭ قولجەتىمدىلىگىن ارتتىرادى. كەشەننىڭ اشىلۋى تاعى 50 جاڭا جۇمىس ورنىن قۇرۋعا مۇمكىندىك بەرەدى.
بيىل №2 كوپبەيىندى قالالىق بالالار اۋرۋحاناسىنا بالالارعا شۇعىل تراۆماتولوگيالىق كومەك كورسەتۋگە ارنالعان جاڭا قوسىمشا عيمارات تا اشىلادى. جاڭا كورپۋستا رەانيماتسيا زالى، وپەراتسيالىق ءبولىم، كومپيۋتەرلىك توموگرافيا جانە رەنتگەندياگنوستيكا كابينەتتەرى جابدىقتالادى.
زاماناۋي قۇرىلعىلار جاراقات العان بالالاردى تەكسەرۋ مەن ەمدەۋ مۇمكىندىگىن كەڭەيتىپ، ولاردى ءتيىستى بولىمدەرگە باعىتتاۋ ءتارتىبىن وڭتايلاندىرۋعا جانە مەديتسينالىق كومەكتى جەدەل كورسەتۋگە مۇمكىندىك بەرەدى.
كەلەسى كەزەڭدە سارىارقا اۋدانىنداعى مەديتسينالىق ينفراقۇرىلىمدى دامىتۋ قاراستىرىلعان. 2027 جىلى 250 توسەك-ورىنعا ارنالعان جاڭا زاماناۋي پەريناتالدىق ورتالىقتى اشۋ جوسپارلانىپ وتىر. ال 2029 جىلى 300 توسەك-ورىندىق كوپبەيىندى قالالىق اۋرۋحانانىڭ قۇرىلىسىن اياقتاپ، پايدالانۋعا بەرۋ كوزدەلگەن.
بىلتىر ۇلتتىق شۇعىل مەديتسينانى ۇيلەستىرۋ ورتالىعىنىڭ بازاسىندا ەسىل جانە نۇرا اۋداندارىنىڭ تۇرعىندارىنا ارنالعان بالالار تراۆماتولوگيالىق پۋنكتى اشىلدى. مۇندا 10 مىڭنان استام بالا مەديتسينالىق كومەك الدى. وسىلايشا وڭ جاعالاۋداعى بالالار تراۆماتولوگيالىق پۋنكتىنە تۇسەتىن جۇكتەمە ازايدى.
سول سياقتى وتكەن جىلى جەكە ينۆەستيتسيالار ەسەبىنەن «نۇرلى جول» ۆوكزالى اۋدانىندا ەمحانا اشىلدى.
العاشقى مەديتسينالىق-سانيتاريالىق كومەك كورسەتۋ جەلىسىن قاتار كەڭەيتىپ جاتىرمىز. 2026 جىلدىڭ سوڭىندا ەسىل اۋدانىندا ءبىر اۋىسىمدا 500 ادامدى قابىلدايتىن ەمحانانىڭ قۇرىلىسىن باستاۋ جوسپارلانعان. 2027 جىلى سارايشىق پەن نۇرا اۋداندارىندا ارقايسىسى ءبىر اۋىسىمدا 500 ادامدى قابىلداي الاتىن تاعى ەكى ەمحانا سالىنادى.
جالپى، الداعى ءۇش جىلدا 10 دەنساۋلىق ساقتاۋ نىسانىن سالۋ جوسپارلانىپ وتىر، ولاردىڭ قاتارىندا 2 پەريناتالدىق ورتالىق، جاڭا زاماناۋي كوپبەيىندى اۋرۋحانا، 5 ەمحانا جانە 2 جەدەل جاردەم قوسالقى ستانتسياسى بار»، – دەپ جازدى جەڭىس قاسىمبەك.
ءباسپاسوز قىزمەتى