الماتى اكىمدىگىنىڭ قولداۋىمەن Satbayev University بازاسىنداعى ەكو-حابتا «جيھازىڭدى جاسا» اكتسياسى ءوتتى. قالا تۇرعىندارىنا پلاستيك قالدىقتارىنىڭ دايىن بۇيىمدارعا قالاي اينالاتىنى كورسەتىلىپ، جوباعا قاتىسۋ شارتتارى ءتۇسىندىرىلدى. بۇل تۋرالى «Eco Almaty» جشس وكىلدەرى حابارلادى.
ءىس-شاراعا الماتى قالاسى ەكولوگيا جانە قورشاعان ورتا باسقارماسىنىڭ باسشىسى سەرىك ادىلباەۆ، URBIO زاۋىتىنىڭ وكىلدەرى، سونداي-اق ECO Network پەن ەكو-حابتاردىڭ نەگىزىن قالاۋشى ەۆگەني مۋحامەدجانوۆ قاتىستى. ولار قايتا وڭدەلەتىن شيكىزاتتى وڭدەۋ باعىتىنداعى بىرلەسكەن جۇمىستار تۋرالى ايتىپ بەردى. اكتسيا جەڭىمپازدارى تاجىريبەسىن ءبولىسىپ، سىيلىقتارعا يە بولدى.
جوبا شارتىنا سايكەس، تۇرعىندار پايدالانىلعان پلاستيك جەمىس جاشىكتەرىن ەكو-حابتارعا تاپسىرا الادى. جينالعان شيكىزات ECO Network تسيفرلىق پلاتفورماسىندا ەسەپكە الىنادى. قاجەتتى كولەم جينالعاننان كەيىن ونى جيھازعا جانە باسقا دا بۇيىمدارعا ايىرباستاۋعا بولادى.
الماتىدا مۇنداي ءوندىرىس قازىردىڭ وزىندە جۇمىس ىستەپ تۇر. ماسەلەن، وقۋشىلار جيناعان 120 مىڭنان استام پلاستيك قاقپاقتان «وڭتۇستىك» ساياباعىنا ارنالعان 11 ورىندىق جاسالدى. وعان شامامەن 250 كەلى پلاستيك جۇمسالعان.
2024 جىلدان بەرى «مەيىرىمدى قاقپاقشا» جوباسى اياسىندا الماتىلىقتار ميلليوننان استام قاقپاق جيناعان. ولاردان شاحمات جيىنتىقتارى، سالپىنشاقتار، شىرشا ويىنشىقتارى جانە باسقا دا بۇيىمدار جاسالادى.
قالادا ECO Network جەلىسىنىڭ ەكى ەكو-حابى جۇمىس ىستەيدى. ولار ماركوۆ كوشەسىندە جانە Satbayev University بازاسىندا ورنالاسقان. مۇندا قايتا وڭدەۋگە بولاتىن ءتۇرلى قالدىقتار قابىلدانىپ، ەكولوگيالىق اكتسيالار وتكىزىلەدى. سونداي-اق كەلۋشىلەرگە قالدىقتاردى قايتا پايدالانۋ تەحنولوگياسى تانىستىرىلادى.
ءباسپاسوز قىزمەتى