مودەرنيزاتسيا بالالاردى وقىتۋ مەن تاربيەلەۋ ءۇشىن جايلى جاعداي جاساۋ، ماتەريالدىق-تەحنيكالىق جابدىقتاۋدى نىعايتۋ، وقۋ پروتسەسىنىڭ ساپاسىن ارتتىرۋ ارقىلى قالا مەن اۋىل مەكتەپتەرىنىڭ اراسىنداعى الشاقتىقتى ازايتۋعا باعىتتالعان. بۇل باستاما مەملەكەت باسشىسىنىڭ سايلاۋالدى باعدارلاماسى اياسىندا جۇزەگە اسىرىلۋدا.
«مەملەكەت جىل سايىن مەكتەپتەردى مودەرنيزاتسيالاۋعا قاراجات ءبولىپ كەلەدى. مەملەكەت باسشىسىنىڭ تاپسىرماسىمەن جىل سوڭىنا دەيىن شاعىن قالالاردا، اۋدان ورتالىقتارىندا جانە اۋىلداردا ورنالاسقان 1000 مەكتەپتى نەگىزگى جەتى باعىت بويىنشا مودەرنيزاتسيالاۋ جۇرگىزىلۋدە. ونىڭ ىشىندە مەكتەپتەرگە اعىمداعى جانە كۇردەلى جوندەۋ جۇمىستارى جۇرگىزىلىپ، پاندىك كابينەتتەر ساتىپ الىنۋدا، جيھازدارى، كىتاپحانالار جاڭارتىلۋدا، قاۋىپسىزدىك جاعدايلارى جاقسارتىلۋدا»، - دەپ اتاپ ءوتتى ينفراقۇرىلىمدى دامىتۋ دەپارتامەنتى ديرەكتورىنىڭ ورىنباسارى روزا سەمباەۆا.
سونىمەن قاتار بيىلعى جىلدىڭ قىركۇيەگىنەن باستاپ 1,7 ملن مەكتەپ وقۋشىسى ءۇشىن تەگىن تاماقتاندىرۋ ۇيىمداستىرىلدى. ساپالى تاماقتاندىرۋدى ۇيىمداستىرۋ ماقساتىندا مينيسترلىك 7 ءنورماتيۆتى-قۇقىقتىق اكتىنى قايتا قارادى. ونىڭ ىشىندە اس ءمازىرىن وڭىردە شىعارىلاتىن وتاندىق ءونىمدى قوسىپ، ازىرلەۋ جونىندەگى نورما ەنگىزىلدى. براكەراجدى كوميسسيالار قۇرىلىپ، ونىڭ قۇرامىنا اتا-انالار، قوعام بەلسەندىلەرى سونداي-اق مەكتەپ اكىمشىلىگى مەن مەديتسينالىق قىزمەتكەرلەر كىردى. براكەراجدى كوميسسيالار ءۇشىن مونيتورينگتىك توپتاردىڭ قىزمەت ءتارتىبى تۋرالى نورمالار زاڭ جۇزىندە بەكىتىلدى.
اتاپ ءوتۋ كەرەك، دەنساۋلىق مينيسترلىگىمەن بىرلەسە وتىرىپ، ءبىلىم بەرۋ ۇيىمدارىندا بالالاردى تاماقتاندىرۋ نورمالارى قايتا قارالىپ، جاڭا تاماقتاندىرۋ ستاندارتى ازىرلەندى. ول 2025 جىلدان باستاپ جۇزەگە اسىرىلا باستايدى. دەگەنمەن دە، الەۋمەتتىك جەلىلەردە مەكتەپ اسحاناسىنداعى تاماق ازىرلەۋ، ونىڭ ساپاسى تۋرالى سىن ازايماي تۇر. بۇل ماسەلە تەك مينيسترلىكتىڭ ارالاسۋىمەن شەشىلەتىن سۇراق ەمەس. قوعام بولىپ قاداعالاۋدى كۇشەيتۋ ارقىلى شەشىلەتىن ماسەلە.