Jer üilerdıŋ janynan ötıp bara jatqan äskeri qyzmetşı auladaǧy nysandardyŋ bırı janyp jatqanyn jäne sol jerden üreilı er adamdy köredı. Küizelıs küiınde tūrǧan azamat janyp jatqan nysan ışınde äielı boluy mümkın ekenın aitady. Oral bır sekund ta uaqyt joǧaltpai, bırden tütınge oranǧan üige kırıp ketedı. Alaida üi-jai ışınen adam tappai, syrtqa şyǧyp älgı azamatqa äielıne qoŋyrau şaludy būiyrady. Quanyşqa orai, jūbaiy üiden tys jerde eken.

Degenmen, qauıp mūnymen aiaqtalǧan joq. Üi iesı sondai-aş ışte gaz ballony bar ekenın habarlaidy. Jaǧdaidyŋ auyrlyǧyn tüsıngen kışı serjant ıştei qauıptense de, janyp jatqan nysanǧa qaita kırıp, ballondy jyldam alyp şyǧady. Özınıŋ tabandylyǧy men şapşaŋdyǧynyŋ arqasynda ol jarylys pen odan keler auyr saldardyŋ aldyn aldy.

— Menıŋ ornymda kez kelgen er azamat qoldan kelgenşe osylai kömekteser edı dep oilaimyn, - deidı Serıkjan nyq senımmen.

Serıkjan Oral — tört ūldyŋ äkesı. Ol balalarynyŋ äke ızımen, Otan qorǧauşy bolǧandaryn armandaidy.

— Ūldarymnyŋ menı maqtan tūtqanyn jäne el qorǧau ısın taŋdap, jolymdy jalǧaǧanyn qalaimyn. Sebebı, būl jai ǧana mamandyq emes — būl eljandylyq qasiet!", - deidı beibıt künnıŋ batyry.

Däl osyndai adamdar kün saiyn, äskeri qyzmettıŋ — halyqqa riiasyz qyzmet etu jäne kez-kelgen sätte kömekke keluge daiyn bolu ekenın körsetude. Oraldyŋ äreketı —batyldyq pen şynaiy azamattyq jauapkerşılıktıŋ jarqyn dälelı.

IIM Ūlttyq ūlanynyŋ baspasöz qyzmetı