Turizm jäne sport vise-ministrı Miras Tölebaev zaŋnamanyŋ oryndaluyn qamtamasyz etu üşın vedomstvo oblystyq jäne qalalyq äkımdıktermen, sondai-aq Mädeniet jäne aqparat ministrlıgımen bırlesıp syrtqy jarnama men otandyq BAQ-qa tūraqty monitoring jürgızetının atap öttı. Osy jūmystyŋ nätijesınde 1,6 myŋnan astam bilbord alynyp tastaldy. 2024 jyly «Kibernadzor» aqparattyq jüiesıne zaŋsyz qūmar oiyndar men bäs tıgulerdı jarnamalaityn 10 myŋnan astam sait būǧattaluǧa engızıldı.
«Azamattar köşede nemese BAQ-ta zaŋsyz bukmekerlık jarnamany baiqasa, ministrlıkke aryz jaza alady. Dälelder jetkılıktı bolǧan jaǧdaida, ministrlık tiıstı oryndarǧa sūrau joldap, äkımşılık qūqyq būzuşylyq turaly ıs qozǧau üşın qajettı materialdardy jinaidy», dep tüsındırdı Miras Tölebaev.
Vise-premer müddelı memlekettık organdar men oblys äkımdıkterıne zaŋnama talaptarynyŋ oryndaluyn jıtı qadaǧalaudy tapsyrdy.
«Rūqsat etılmegen oryndarda jarnama jasauǧa jol berılmeuı tiıs. Myŋdaǧan saittar būǧattalǧany turaly esep berıldı. Alaida, ǧalamtorda bukmekerlık keŋselerdıŋ jarnamasy älı de bar. Būl rette salalyq ministrlıkter monitoring jūmysyn küşeituı qajet», dep atap öttı Tamara Düisenova.
Engızılgen şekteulerge säikes bukmekerlık keŋseler men totalizatorlardy jarnamalauǧa aşyq keŋıstıkterde, ǧimarattardyŋ qasbetterınde, kölık qūraldarynda jäne syrtqy konstruksiialarda, bukmekerlık keŋselerdıŋ nemese totalizatorlardyŋ ornalasqan jerlerın qospaǧanda, sport ǧimarattarynyŋ ışınde jäne sportşylardyŋ jabdyqtarynda tyiym salynady. Bukmekerlık keŋselerdıŋ logotipterı men sauda belgılerın basqa biznestı jarnamalauda jäne t.b. paidalanuǧa bolmaidy.
Aita ketelık, Äkımşılık qūqyq būzuşylyq kodeksınıŋ 455-babyna säikes, bukmekerlık keŋselerdıŋ jarnamasyn taratqandar üşın 236 myŋnan 1,5 mln teŋgege deiın aiyppūl qarastyrylǧan.
Ükımettıŋ baspasöz qyzmetı
