14 aqyn baq synasqan jyr dodasynyŋ aşylu saltanatyna QR Mädeniet jäne aqparat vise-ministrı Aibek Sydyqov qatysyp, ministr Aida Balaevanyŋ qūttyqtau hatyn oqyp berdı.

«Aitys – halqymyzdyŋ ruhani bolmysynyŋ ainasy, ǧasyrlardan jetken qasiettı öner. Ony qasterleu, jaŋa däuırdıŋ tynysymen qaita tületu jäne jas ūrpaqtyŋ sanasyna sıŋıru – bärımızge ortaq mındet.

Mädeniet jäne aqparat ministrlıgı jyl saiyn ūlttyq önerdı därıpteitın, dästür sabaqtastyǧyn jalǧaityn osyndai ırgelı jobalardy jüielı türde jüzege asyryp keledı.

Elımızdıŋ igılıkterı men jetıstıkterı, halyqtyŋ jarqyn bolaşaǧy ūlt mereiın asqaqtatatyn ūlyq merekege arnalyp otyrǧan bügıngı aitystyŋ arqauyna ainalyp, aqyndarymyzdyŋ şabyty şalqi bersın», - delıngen qūttyqtau hatta.

Is-şarany Qazaqstannyŋ eŋbek sıŋırgen qairatkerı Amanjol Ältai jürgızıp, qazylar alqasyna Qazaqstannyŋ eŋbek sıŋırgen qairatkerı, «Otan» ordenınıŋ iegerı Jürsın Erman töraǧalyq ettı.

Ekı künge sozylǧan jyldyŋ qorytyndy aitysynyŋ bas jüldegerı jäne «Altyn dombyra» iegerı atanǧan Aibek Qalievke Astana qalasynan päter tabystaldy. Bırınşı oryndy Beksūltan Orynbasar, ekınşı oryndy Nūrbol Jauynbaev pen Serık Quanǧan, al üşınşı oryndy Meiırbek Sūltanhan men Didar Qami ielendı. Sonymen qatar aqtyq synda erekşe söz şeberlıgın körsetken aqyndar arnaiy jüldelermen marapattaldy.

QR Mädeniet jäne aqparat ministrlıgınıŋ baspasöz qyzmetı