Prezidentke ūsynylǧan aqparatqa säikes, byltyr 4 ırı infraqūrylymdyq joba aiaqtalǧan. Atap aitqanda, Ekıbastūzdaǧy bırınşı Memlekettık aimaqtyq elektr stansasynyŋ №1 energoblogy qalpyna keltırıldı, Sian qalasynda kölık-logistika terminaly jūmys ıstei bastady, Almatynyŋ energetika keşenıne qajettı gaz infraqūrylymynyŋ qūrylysy aiaqtaldy, Qaraşyǧanaq ken ornynda gazdy kerı aidauǧa arnalǧan besınşı kompressor paidalanuǧa berıldı.
Nūrlan Jaqypov biyl mamyr aiynda bitum öndırısın keŋeitu jobasy bastalǧanyn jetkızdı. Jyl soŋyna deiın taǧy 7 ırı investisiialyq joba, sonyŋ ışınde, Kendırlı kentınde su tūşytu zauyty, Almaty qalasyn ainalyp ötetın temırjol jelısı, Aqtau portynda konteinerlık hab, Taldyqorǧan – Üşaral magistraldı gaz qūbyry, Jambyl oblysynda jel qondyrǧylary bölşekterın şyǧaratyn zauyt qūrylystary ıske asyrylady. Al Dostyq – Moiynty uchaskesındegı ekınşı temırjoldy merzımınen bır jyl būryn paidalanuǧa beru josparlanyp otyr.
Qazaq Air AQ äue kompaniiasy men «Mobail Telekom-Servis» JŞS (Tele2) ūialy bailanys operatoryn strategiialyq investorlarǧa satu jönınde mämıleler jasaldy. Būl naryqtaǧy bäsekelestıktı arttyruǧa jäne Qazaqstan ekonomikasynyŋ negızgı sektorlaryna investisiia tartuǧa yqpal etedı.
Memleket basşysyna «Jaily mektep» ūlttyq jobasynyŋ oryndaluy turaly mälımet berıldı. Qazırgı kezde 106 mekteptıŋ qūrylysy bıtuge jaqyn, jyl soŋyna deiın taǧy 102 oqu oşaǧyn salu josparlanǧan.
Qasym-Jomart Toqaev «Samūryq-Qazyna» AQ qyzmetınıŋ negızgı baǧyttaryna qatysty bırqatar mındet jüktep, kompaniia aktivterınıŋ tiımdılıgın joǧarylatu, qūnyn arttyru, sondai-aq investisiialyq jobalardy uaqtyly jäne sapaly jüzege asyru jūmystaryn jalǧastyrudy tapsyrdy.
Aqorda.kz
