Prezident Qasym-Jomart Toqaev Ükımettıŋ keŋeitılgen otyrysynda alǧa qoiǧan mındetterdı eskere otyryp, Qordyŋ 2024 jylǧy jūmysynyŋ qorytyndylary jäne ony odan ärı damytu mäselelerı qaraldy.
«Samūryq-Qazyna» ŪÄQ» AQ basqarma töraǧasy Nūrlan Jaqypov investisiialyq jobalardy ıske asyru turaly baiandady.
Üzdıksız elektrmen jabdyqtau maqsatynda Ekıbastūz GRES-1 №1 energiia blogy toqtap, quaty 4000 MVt-qa deiın ūlǧaityldy. Ekologiiany jaqsartu jūmystary aiasynda Almaty JEO-2 jäne JEO-3 üşın gaz infraqūrylymyn qūru jobasy ıske asyryldy. Qaraşyǧanaq ken orny jūmysynyŋ tiımdılıgın arttyru üşın besınşı kerı aidau kompressory engızıldı. Kölık-logistikalyq baǧytta Sian qalasynda jük terminaly salyndy, ol jükterdı jetkızu merzımın qysqartuǧa jäne qazaqstandyq baǧyttardyŋ tartymdylyǧyn arttyruǧa mümkındık berdı. Sonymen qatar 250 şaqyrymnan astam gaz qūbyry men 500 şaqyrym temırjol jelısı tartylyp, ekınşı «Dostyq – Moiynty» jolynyŋ 132 şaqyrymynda poiyz qozǧalysy ıske qosyldy. Sondai-aq eseptı kezeŋde Qazaqstan üşın bıregei jobalar: gidroakkumuliasiialyq stansa men Astana qalasyndaǧy alǧaşqy sifrlyq qosalqy stansanyŋ qūrylysy bastaldy.
Jalpy tızımge qazırgı uaqytta mūnai-gaz, mūnai-himiia, energetika, kölık-logistika jäne basqa da salalar boiynşa qūny 33,3 trln teŋgenı qūraityn investisiialyq 46 joba engızılgen.
Biyl «Taldyqorǧan – Üşaral» magistraldy gaz qūbyryn paidalanuǧa berudıŋ arqasynda Jetısu öŋırındegı 66 eldı mekendı gazben qamtu jūmystaryn aiaqtau josparlanǧan. Kendırlıde quattylyǧy täulıgıne 50 myŋ m3 teŋız suyn tūşytu zauytyn ıske qosu arqyly Jaŋaözen qalasy men Maŋǧystau oblysyndaǧy su tapşylyǧy mäselesın şeşu josparlanuda. Transkaspii halyqaralyq kölık baǧytynyŋ (THKB) jäne «Dostyq – Moiynty» temırjol jelısı uchaskesınıŋ ötkızu qabıletın arttyru tranzittı damytuǧa eleulı serpın beredı. Işkı naryqtyŋ qajettılıkterın qanaǧattandyru üşın PMHZ-da dizel otynyn gidrotazartu ornatylady jäne CASPI BITUM-da bitum öndırısı keŋeitıledı. «Beineu – Bozoi – Şymkent» magistraldy gaz qūbyrynyŋ ötkızu qabıletın jylyna 15 mlrd m3 deiın arttyruǧa mümkındık beretın ekınşı uchaskesınıŋ qūrylys barysyna erekşe nazar audarylyp, bırlesken investisiialau qūraldary talqylandy.
Jobalar boiynşa jergılıktı qamtudyŋ boljamdy ülesı sektorǧa bailanysty özgerıp otyrady. Mysaly, kölık-logistika sektoryndaǧy jobalar boiynşa būl körsetkış 85%-dy, energetikalyq jobalar – 60%-dy, basqa jobalar boiynşa – 80%-dy qūraidy.
Sondai-aq 2024 jyly otandyq tauar öndıruşılerdı qoldau boiynşa qosymşa şaralar qarastyrylǧan. Osynyŋ arqasynda 1,1 trln teŋgege OTÖ-men şarttar jasalyp, ösım 2023 jylmen salystyrǧanda 76%-dy qūrady. 191 mlrd teŋgege ofteik-kelısımşarttar jasaldy, būl 2023 jylmen salystyrǧanda 10 esege köp. Sonymen qatar Qordyŋ satyp alu jüiesı alǧaş ret EQDB, ADB jäne EYDŪ üzdık standarttaryna säikes dep tanyldy.
Premer-ministr elımız üşın maŋyzdy jobalardy ıske asyruǧa jeke investisiialar tartu jönındegı jūmysty küşeitu qajettıgıne toqtaldy.
«Memleket basşysy bızdıŋ jūmysymyzdyŋ basym baǧyty ırı infraqūrylymdyq jäne önerkäsıptık jobalardy, kölık pen logistikany damytu, sondai-aq sifrlandyru jäne jasandy intellekt boluy tiıs ekenın atap ötken bolatyn. Ükımet elımız üşın maŋyzdy jobalardyŋ ıske asyrylu jaǧdaiyn baqylauda ūstaidy. Memlekettıŋ ekonomikadaǧy ülesın bırtındep azaita otyryp, bırlesken investorlardy belsendı tartu qajet», — dep atap öttı Oljas Bektenov.
Sonymen qatar Premer-ministr üderısterdı oŋtailandyru jäne keşıktıruge ärı negızsız qymbattauǧa jol bermeu üşın jobalardy ıske asyru merzımderınıŋ saqtaluyn qataŋ baqylau qajettılıgıne audardy.
