- Sızdıŋ Qazaqstanǧa saparyŋyz der kezınde ūiymdastyrylyp otyr. Būl ekıjaqty qarym-qatynastardy nyǧaituǧa tyŋ serpın beretınıne senımdımın. Elderımız arasyndaǧy san qyrly yntymaqtastyq däiektı türde damyp kele jatyr. Sızben bırge ülken ıskerlık delegasiia keldı. Būl Qazaqstanmen yqpaldastyqty ılgerıletuge asa jauapkerşılıkpen qaraityndaryŋyzdy körsetedı, – dedı Prezident.

Memleket basşysy Prezident Lula da Silvaǧa ızgı sälemı men ystyq yqylasyn joldap, elımızge saparmen keluge şaqyrdy.

Mauro Vieira Qazaqstanǧa Braziliia Prezidentınıŋ arnaiy tapsyrmasy boiynşa kelgenın jetkızdı. Onyŋ aituynşa, ekı el arasyndaǧy saiasi, sauda-ekonomikalyq jäne mädeni-gumanitarlyq bailanystardy odan ärı keŋeitudıŋ äleuetı zor.

Qazaqstan Prezidentı men Braziliia Syrtqy ıster ministrı energetika, tau-ken metallurgiia keşenı, auyl şaruaşylyǧy, innovasiia jäne jasandy intellekt salalaryndaǧy yntymaqtastyqty tereŋdetu perspektivasyn talqylady.

Memleket basşysy halyqaralyq qauıpsızdık, iadrolyq qarusyzdanu jäne jappai qyryp-joiatyn qarudy taratpau mäselelerınde özara küş bırıktırudıŋ maŋyzyna toqtaldy. Būdan bölek, BŪŪ jäne onyŋ qūrylymdaryn reformalau jaiy, sondai-aq İrannyŋ iadrolyq baǧdarlamasy töŋıregındegı ahual qarastyryldy.

Qasym-Jomart Toqaev Qazaqstannyŋ atom quatyn MAGATE baqylauymen tek beibıt maqsatta paidalanuǧa beiıl ekenın rastady. Kezdesude elımız iadrolyq qarudy taratpau boiynşa halyqaralyq arenada zor senımge ie ekenı aityldy. Sonymen qatar elımızde iadrolyq materialdardy qauıpsız paidalanuǧa qajettı infraqūrylym, sarapşylyq jäne ǧylymi-tehnikalyq baza qalyptasqan. MAGATE-nıŋ az baiytylǧan urandy saqtaityn älemdegı jalǧyz bankı Qazaqstan aumaǧynda ornalasqan.

Memleket basşysy elımız ızgı niet tanyta otyryp, İrandaǧy iadrolyq problematikanyŋ şeşıluıne septıgın tigızuge daiyn ekenın mälımdedı. Ol üşın tiıstı halyqaralyq uaǧdalastyqqa qol jetkızılıp, atalǧan mäsele naqty ıske ūlasuy qajet.