Prezidenttıŋ aituynşa, mūndai forumnyŋ Qazaqstanda ötuı otandyq neirohirurgiia jetıstıkterınıŋ keŋınen moiyndalǧanyn körsetedı. Sonymen qatar Memleket basşysy Kongress neirohirurgiia salasyndaǧy halyqaralyq yntymaqtastyqty damytuǧa zor üles qosyp, ozyq täjıribe men tehnologiia almasuǧa yqpal etetınıne senım bıldırdı.
– Ūlt saulyǧy – kez kelgen eldıŋ qarqyndy damuynyŋ negızı. Sondyqtan densaulyq saqtau ısın jan-jaqty örkendetu memlekettık saiasatymyzdyŋ negızgı basymdyǧy sanalady. Qazaqstan medisinalyq infraqūrylymdy jaŋǧyrtuǧa, maman daiarlauǧa, üderısterdı sifrlandyruǧa jäne atalǧan salaǧa innovasiialyq äzırlemelerdı engızuge mol qarjy böledı, – dedı Prezident.
Qasym-Jomart Toqaev Qazaqstan neirohirurgiiada jasandy intellektını qoldanuǧa airyqşa män beretınıne nazar audardy. Sol arqyly medisinanyŋ joǧary tehnologiialy salalaryn belsendı damytudy qolǧa alǧanyn jetkızdı. Onyŋ aituynşa, sifrly jäne robotty tehnologiialardyŋ arqasynda otandyq neirohirurgiia salasy örkendep keledı.
Memleket basşysy kezdesuge qatysuşylardyŋ älemdık medisinany damytuǧa qosqan eleulı ülesın erekşe atap öttı.
– Ärqaisysyŋyz – myŋdaǧan adamnyŋ ömırın qūtqarǧan joǧary deŋgeilı mamansyzdar. Sızderdı eŋ qiyn jaǧdaida da adamdardyŋ dertınen aiyǧyp ketuıne ümıt syilaityn ızgı missiia bırıktıredı. Astanada ötıp jatqan neirohirurgter kongresıne qatysu üşın arnaiy keldıŋızder. Būl medisinada şekara joq ekenın körsetedı. Neirohirurgiiada ǧylym men innovasiia airyqşa röl atqarady, – dedı Prezident.
Memleket basşysy Qazaqstan medisinalyq tehnologiialardy transfertteuge, sondai-aq täjıribe almasuǧa baǧyttalǧan halyqaralyq yntymaqtastyqty keŋeituge niettı ekenın aitty.
– Neirohirurgiia siiaqty joǧary tehnologiialy salada medisinalyq turizmdı damytu ısınıŋ äleuetı zor. Osy baǧytta tabysqa qol jetkızu üşın ornyqty memleketaralyq bailanysty jolǧa qoiuǧa daiynbyz, – dedı Prezident.
Öz kezegınde kezdesuge qatysuşylar Qazaqstandaǧy neirohirurgiiany damytu mümkındıkterın joǧary baǧalap, maman daiarlau jäne ozyq tehnologiiamen almasu tūrǧysynan qoldau bıldıruge uaǧdalasty.
Qasym-Jomart Toqaev mazmūndy ärı nätijelı pıkır almasu üşın rizaşylyǧyn bıldırdı. Sondai-aq Densaulyq saqtau ministrıne neirohirurgiiaǧa, jalpy medisina salasyna ozyq tehnologiialardy engızu şaralaryn jandandyrudy, Qazaqstanda şeteldıkterdı emdeu boiynşa körşı memlekettermen ükımetaralyq kelısım jasau turaly Ūlttyq neirohirurgiia ortalyǧynyŋ basşysy Serık Aqşolaqovtyŋ ūsynysyna qatysty jūmys jürgızudı tapsyrdy.
Jiynda Uolter Eduard Dendi atyndaǧy neirohirurgiialyq qoǧamdastyqtyŋ prezidentı, Djordj Vaşington universitetınıŋ (AQŞ) neirohirurgiia boiynşa professory Salim Abdulrauf, N.N. Burdenko atyndaǧy Ūlttyq medisinalyq neirohirurgiiany zertteu ortalyǧynyŋ (Resei) ǧylymi jetekşısı jäne qūrmettı prezidentı Aleksandr Konovalov, Great Ormond Street auruhanasynyŋ (Ūlybritaniia) balalar neirohirurgiiasy men kraniofasialdy hirurgiia bölımınıŋ jetekşısı, University College London oqu ornynyŋ balalar neirohirurgiiasy boiynşa professory Nur ul Oveis Djilani, Humanitas IRCCS zertteu auruhanasynyŋ (İtaliia) «gamma-pyşaq» jäne stereotaksikalyq neirohirurgiia departamentınıŋ direktory Pero Pikossi, QR Densaulyq saqtau ministrı Aqmaral Älnazarova, «Ūlttyq neirohirurgiia ortalyǧy» AQ basqarma töraǧasy Serık Aqşolaqov söz söiledı.
