Ūlttyq ekonomika ministrlıgı Parlament Mäjılısıne jaŋa jäne qoldanystaǧy Salyq kodeksınıŋ jobasyna ekınşı tüzetuler paketın engızdı.
Tüzetulerdıŋ negızgı baǧyttarynyŋ bırı – qyzmetkerlerdıŋ tabys deŋgeiıne qarai jeke tabys salyǧynyŋ saralanǧan mölşerlemelerın engızu. Tömen tabys tabatyn azamattar joǧary jalaqy alatyndarǧa qaraǧanda tömen mölşerleme boiynşa salyq töleitın bolady.
Sondai-aq, azamattardyŋ medisina, bılım beru, äleumettık audarymdar siiaqty şyǧyndary boiynşa şegerımderdı oŋtailandyru ūsynyluda. Qazırgı 14 AEK ornyna 30 AEK mölşerınde bıryŋǧai bazalyq şegerım engızıledı. Sonymen qatar, qosymşa şegerımder alynyp tastalady, būl buhgalterlerdıŋ jūmysyn jeŋıldetıp, jeke tūlǧalarǧa salyq organdaryna artyq qūjat tapsyru qajettılıgın joiady.
Būdan basqa, eksporttyq-kredittık agenttıkke salyq salu tärtıbın belgıleu jäne bank qyzmetı üşın korporativtık tabys salyǧynyŋ mölşerlemesın naqtylau ūsynylady, būl osy saladaǧy belgısızdıktı joiady.
Sondai-aq memlekettık jäne kvazimemlekettık baǧaly qaǧazdardan tüsetın tabystarǧa salyq saludy engızu josparlanuda. Būl memlekettık biudjettıŋ qosymşa közı.
Halyqaralyq täjıribege säikes, qoǧamdyq densaulyqqa qosymşa qamqorlyq jasau üşın energetikalyq susyndarǧa aksizder belgılenedı.
Mūnai salasyndaǧy salyq jüiesın reformalau aiasynda «salyqtyq manevr» jürgızu közdelude – eksporttyq tölemderge, sonyŋ ışınde rentalyq salyqqa tüsetın jüktemenı mūnai öndıru kezeŋınde tölenetın salyqqa auystyru ūsynylady. Būl salyq jüiesın jeŋıldetıp, biudjettıŋ kırısın tūraqtandyruǧa mümkındık beredı.
Salyq äkımşılendırudı küşeituge baǧyttalǧan bölek tüzetuler blogy ūsynylǧan. Ol salyq organdarynyŋ baqylau funksiialaryn qaita qaraudy jäne salyq mındettemelerın jinau men monitoringteu tetıkterın naqtylaudy közdeidı.
Sonymen qatar, ekınşı paket aiasynda tūrǧyn üi-kommunaldyq şaruaşylyǧy, investisiialyq saiasat, äleumettık tölemder tärtıbı sekıldı bırqatar ılespe zaŋdarǧa özgerıster engızu josparlanyp otyr.
Mındettı äleumettık jäne medisinalyq saqtandyru salasyndaǧy, sondai-aq arnaiy salyq rejimderın qoldanudaǧy būzuşylyqtar üşın jauapkerşılıktı küşeitu ūsynylady. Būl – eldegı salyqtyq tärtıptı küşeituge baǧyttalǧan keşendı strategiianyŋ bır bölıgı.
Jalpy alǧanda, Ükımet jaŋa Salyq kodeksı jobasy men oǧan ılespe zaŋdarǧa 71 tüzetu, al qoldanystaǧy Salyq kodeksıne 67 tüzetu ūsyndy.
