Kölıktegı polisiia departamentınıŋ ūiymdasqan qylmysqa qarsy küres basqarmasynyŋ qyzmetkerlerı jürgızgen jedel-ızdestıru ıs-şaralarynyŋ nätijesınde būryn alaiaqtyq jasaǧany üşın bırneşe ret sottalǧan Semei tūrǧyny ūstaldy, - dep habarlaidy Polica.kz

Ol bırneşe jyl boiy özın “bloger” retınde tanystyryp, Semei arqyly ışkı jäne halyqaralyq baǧyttar boiynşa jüretın jolauşylar poiyzynyŋ qyzmetkerlerın masqaralaityn beinematerialdardy jariialaimyn dep qorqytyp, aqşa bopsalap kelgen.

Küdıktı jolauşy siiaqty poiyzǧa otyryp, özınıŋ jeke paidasy üşın jolauşylar tasymaly salasyndaǧy būzuşylyqtardy telefonyna tüsırıp, aqşa bopsalauǧa paidalanǧan.

– Būl qylmys ūzaq uaqyt boiy polisiia qyzmetkerlerınıŋ nazarynan tys qaldy, sebebı jäbırlenuşıler qorqyp, qūqyq qorǧau organdaryna jügınbegen. Ūiymdasqan qylmysqa qarsy küres basqarmasyna “signaldar” tüse bastaǧannan keiın ǧana küdıktınıŋ zaŋsyz äreketterıne tosqauyl qoiyldy. Qasköi ūstalyp, sot sanksiiasymen qamauǧa alyndy, – dedı QR IIM ūiymdasqan qylmysqa qarsy küres departamentınıŋ ökılı Quandyq Alpys.

Qazırgı uaqytta qylmystyq ıs boiynşa jolauşylar poiyzdarynyŋ 60-tan astam qyzmetkerı jäbırlenuşı retınde tanyldy. Aldyn ala tergeu nätijesı boiynşa ūstalǧan adamnyŋ bank şottaryna 2021 jyldan berı 48 mln teŋgeden astam qarajat tüskenı anyqtaldy. Qylmystyq ıs sotqa jıberıldı.