وسىدان ءبىر جىل بۇرىن، 2025 جىلعى 30 تامىزدا، قازاقستاندا سيم-بوكستاردىڭ زاڭسىز اينالىمىنا زاڭنامالىق تىيىم ەنگىزىلدى.
«بايلانىس تۋرالى» زاڭنىڭ 4-بابىنىڭ 4-تارماعىنا سايكەس، GSM-شليۋزدەردى اكەلۋدى، تىركەۋدى، وتكىزۋدى جانە قولدانۋدى بايلانىس قىزمەتتەرىن كورسەتۋ سالاسىندا ليتسەنزياسى بار بايلانىس وپەراتورلارى عانا جۇزەگە اسىرادى.
وسىعان قاراماستان، كەيبىر تۇلعالار ءتيىستى ليتسەنزياسىز مۇنداي قۇرىلعىلاردى زاڭسىز اكەلۋدى، وتكىزۋدى جانە پايدالانۋدى جالعاستىرۋدا.
ولاردىڭ قاتارىندا سيم-بوكستاردى حابارلاندىرۋ سايتتارى ارقىلى ساتۋعا ۇسىناتىن جەكە تۇلعالار، سونداي-اق تەلەكوم-جابدىقتاردى ساتاتىن دۇكەندەر دە بار.
مىسالى، سولتۇستىك قازاقستان وبلىسىندا OLX سايتىندا 4 سلوتتى GSM-ءشليۋزدى 120 مىڭ تەڭگەگە ساتۋ تۋرالى حابارلاندىرۋ ورنالاستىرعان تۇلعاعا قاتىستى اكىمشىلىك حاتتاما تولتىرىلدى.
بۇگىن اتالعان فاكتى بويىنشا كىنالى تۇلعانى اكىمشىلىك جاۋاپتىلىققا تارتۋ ماسەلەسى شەشىلۋدە.
سيم-بوكستاردى پايدالانۋ شەتەلدىك تەلەفون ترافيگىن قازاقستاندىق سيم-كارتالار ارقىلى وتكىزۋگە مۇمكىندىك بەرەتىنىن اتاپ وتكەن ءجون.
بۇل الاياقتارعا شەتەلدەن جەرگىلىكتى نومىرلەر ارقىلى قوڭىراۋ شالۋعا جانە قوڭىراۋدىڭ ناقتى قايدان جاسالعانىن جاسىرۋعا مۇمكىندىك بەرەدى.
مۇنداي جابدىقتىڭ قىلمىسكەرلەردىڭ قولىنا ءتۇسۋى جاپپاي الاياقتىق قوڭىراۋلار جاساۋعا جانە اقشا جىمقىرۋعا جاعداي تۋعىزادى.
وسىعان بايلانىستى سيم-بوكستاردى بەلگىلەنگەن ءتارتىپتى بۇزا وتىرىپ ساتىپ الماڭىز جانە پايدالانباڭىز.
زاڭنامالىق تىيىم ەنگىزىلگەنگە دەيىن ساتىپ الىنعان GSM-شليۋزدەردىڭ يەلەرى نە ىستەۋى كەرەك؟
ولار اتالعان قۇرىلعىلاردى ودان ءارى پايدالانۋ جانە ولارعا قاتىستى وزگە دە ارەكەتتەر جاساۋ ءتارتىبىن انىقتاۋ ءۇشىن ۋاكىلەتتى ورگانعا جۇگىنۋى قاجەت.
ءتيىستى تۇسىندىرمەلەر الىنعانعا دەيىن سيم-بوكستاردى پايدالانۋعا بولمايدى.
بۇل ءۇشىن 5 جىلعا دەيىن باس بوستاندىعىنان ايىرۋ جازاسى كوزدەلگەن.
باس پروكۋراتۋرانىڭ ءباسپاسوز قىزمەتى