م.وتەمىسوۆ اتىنداعى باتىس قازاقستان ۋنيۆەرسيتەتىنە باسقارما مۇشەسى – تاربيە جۇمىسى جانە الەۋمەتتىك ماسەلەلەر جونىندەگى پرورەكتور قىزمەتىنە قانات اۋەسباي تاعايىندالدى.
قانات اۋەسباي – فيلولوگيا عىلىمدارىنىڭ كانديداتى، پەداگوگ. جوعارى ءبىلىم، عىلىم، مەديا جانە قوعامدىق كوممۋنيكاتسيالار سالاسىندا مول تاجىريبەسى بار مامان.
ول ءال-فارابي اتىنداعى قازۇۋ-دى «حالىقارالىق جۋرناليستيكا» ماماندىعى بويىنشا ۇزدىك تامامداعان. «بولاشاق» باعدارلاماسى اياسىندا ۇلىبريتانياداعى University of East Anglia ۋنيۆەرسيتەتىندە عىلىمي-پەداگوگيكالىق تاعىلىمدامادان وتكەن. سونىمەن قاتار ەكونوميكا جانە بيزنەس سالاسىندا ءبىلىمى، قۇقىق ماگيسترى دارەجەسى بار.
كاسىبي جولى ءال-فارابي اتىنداعى قازۇۋ، ل.ن. گۋميلەۆ اتىنداعى ەۇۋ، ح. دوسمۇحامەدوۆ اتىنداعى اتىراۋ ۋنيۆەرسيتەتىمەن، سونداي-اق «31 ارنا»، «قازاقستان»، «Astana» تەلەارنالارىمەن بايلانىستى. رترك «قازاقستاندا» ءتىلشى قىزمەتىنەن باستاپ، digital باعىتىنىڭ ديرەكتورىنا دەيىنگى جولدان ءوتتى. قانات اۋەسباي – عىلىمي جاريالانىمداردىڭ اۆتورى، ونىڭ ىشىندە Scopus بازاسىنا ەنگەن ەڭبەكتەرى بار. بىرقاتار مەملەكەتتىك جانە سالالىق ماراپاتتاردىڭ يەگەرى.
جاڭا قىزمەتىندە ول ۋنيۆەرسيتەتتىڭ تاربيە جانە الەۋمەتتىك ساياساتىن دامىتۋعا، ستۋدەنتتىك باستامالار مەن جاستار جوبالارىن قولداۋعا، ستۋدەنتتەرمەن ءتيىمدى ءارى اشىق كوممۋنيكاتسيا ورناتۋعا جەتەكشىلىك ەتەدى.
قانات اۋەسبايعا جاڭا قىزمەتىندە ساتتىلىك، تىڭ باستامالار مەن تولاعاي تابىستار تىلەيمىز!، - دەلىنگەن وقۋ ورنى جاريالاعان جازبادا.
رەداكتسيا ۇجىمى ارىپتەسىمىزدىڭ جاڭا قىزمەتىنە تەك ساتتىلىك تىلەيدى!