تۋريزم جانە سپورت مينيسترلىگىندە ىشكى ءتۋريزمدى دامىتۋعا، ەلدىڭ تۋريستىك الەۋەتىن ناسيحاتتاۋعا جانە قازاقستاننىڭ تسيفرلى كەڭىستىگىندەگى وڭ ءيميدجىن قالىپتاستىرۋعا ۇلەس قوسىپ جۇرگەن وتاندىق ترەۆەل-بلوگەرلەر مەن كونتەنت-كرەاتورلار ماراپاتتالدى.
سالتاناتتى ءراسىم بارىسىندا ەربول مىرزابوسىنوۆ قاتىسۋشىلارعا «تۋريزم سالاسىنىڭ ۇزدىگى» ناگراداسىن تابىستاپ، قازاقستاننىڭ تۋريستىك باعىتتارىن ەل ىشىندە دە، حالىقارالىق دەڭگەيدە دە تانىتۋدا تسيفرلىق كونتەنت پەن زاماناۋي مەديانىڭ ماڭىزدى ءرول اتقاراتىنىن اتاپ ءوتتى.
«سىزدەردىڭ ەڭبەكتەرىڭىزدىڭ ارقاسىندا ەلىمىز شەتەلدە كەڭىنەن تانىلىپ كەلەدى، ال مەملەكەتىمىزدىڭ وڭ ءيميدجى ەل ىشىندە دە، حالىقارالىق دەڭگەيدە دە نىعايا تۇسۋدە. سول ءۇشىن سىزدەرگە العىسىمدى بىلدىرەمىن جانە ءتۋريزمدى دامىتۋعا قاتىستى شەشىمدەر قابىلداۋدا تاجىريبەگە نەگىزدەلگەن ءتاسىلدى جەتىلدىرۋ باعىتىندا بىرلەسە جۇمىس ىستەۋگە شاقىرامىن»، — دەپ اتاپ ءوتتى مينيستر.
سونداي-اق مينيستر داستان مۇحامەدراحىموۆتى @bydastan ينتەرنەت-جوبالار مەن تسيفرلى كونتەنت سالاسىندا «وسكار» اتانىپ كەتكەن WIBA Awards 2026 حالىقارالىق سىيلىعىنىڭ «ۇزدىك ترەۆەل-بلوگەر» اتاعىن جەڭىپ العانىمەن قۇتتىقتادى. سونىمەن قاتار وركەن دارحانۇلىنىڭ @orkeni ساپالى قازاقتىلدى كونتەنتتى دامىتۋعا قوسقان ۇلەسى، تالعات قاناتۇلىنىڭ @talashin ەكولوگيالىق ءارى جاۋاپتى تۋريزم مادەنيەتىن ناسيحاتتاۋى جانە ساكەن دانيارۇلىنىڭ @saken_kagarov بەلسەندى دەمالىس پەن سپورتتىق ءتۋريزمدى دامىتۋ باعىتىنداعى جۇمىسى ايتىلدى.
ەسكە سالا كەتەيىك، بيىل مامىر ايىندا تۋريزم جانە سپورت مينيسترلىگى مەن ەكولوگيا جانە تابيعي رەسۋرستار مينيسترلىگى اراسىندا ەكوتۋريزمدى دامىتۋعا باعىتتالعان مەموراندۋمعا قول قويىلدى. ىنتىماقتاستىق اياسىندا بلوگەرلەر مەن درون وپەراتورلارىنا تۋريستىك كونتەنت ازىرلەۋ ءۇشىن ەرەكشە قورعالاتىن تابيعي اۋماقتارعا جەڭىلدەتىلگەن تارتىپپەن كىرۋگە مۇمكىندىك بەرەدى.
سونىمەن قاتار، 2026 جىلى قازاقستاندا العاش رەت وقيعالى ءتۋريزمدى دامىتۋعا جانە شەتەلدىك تۋريستەردى تارتۋعا باعىتتالعان 55 ءىرى ءىس-شارانى قامتيتىن بىرىڭعاي وقيعالار كۇنتىزبەسى جاساقتالدى. ونىڭ قاتارىندا «ءدامداستۇر»، «قىزعالداق مۇرا»، سيۆەرس الماسىنىڭ گۇلدەۋ فەستيۆالى، سونداي-اق الدا وتەتىن «التىن بەسىك – اقسۋات»، «كوكمايسا» جانە «قازىنالى كاسپي» فەستيۆالدەرى بار.
ءراسىم سوڭىندا قاتىسۋشىلارعا بيىل استانادا 29 شىلدە مەن 9 تامىز ارالىعىندا وتەتىن «بولاشاق ويىندارى» ءتۋرنيرى جانە 20-23 تامىز كۇندەرى الماتىدا ۇيىمداستىرىلاتىن TBEX Asia 2026 حالىقارالىق فورۋمى تۋرالى ايتىلدى. فورۋمعا الەمنىڭ تۇكپىر-تۇكپىرىنەن 200-دەن استام ترەۆەل-بلوگەر مەن تۋريزم يندۋسترياسىنىڭ وكىلدەرى قاتىسادى دەپ جوسپارلانعان.