بۇگىن قىزىلوردا وبلىسىنىڭ اكىمى مۇرات ەرگەشباەۆتىڭ قاتىسۋىمەن مۇنايشىلار كۇنى اياسىندا «قۇمكول» كەن ورنىنىڭ ونەركاسىپتىك يگەرىلۋىنىڭ 40 جىلدىعىنا ارنالعان «قۇمكول: قارا التىن شەجىرەسى» اتتى سالتاناتتى شارا ءوتتى.
ايماق باسشىسى مۇناي سالاسىنىڭ ەل ەكونوميكاسىنداعى ماڭىزىن اتاپ ءوتىپ، مامانداردى كاسىبي مەرەكەمەن قۇتتىقتادى.
«پرەزيدەنتىمىز قاسىم-جومارت كەمەلۇلى: «مۇناي-گاز سالاسى – ەكونوميكامىزدىڭ تىرەگى، ەلىمىزدىڭ قارقىندى دامۋىنىڭ كەپىلى. مەملەكەت ارقاشان ەنەرگەتيكا سالاسىنىڭ الەۋەتىن ارتتىرۋعا، جاڭا كەن ورىندارىن يگەرۋگە جانە سالا جۇمىسشىلارىنىڭ مۇددەسىن قورعاۋعا ەرەكشە كوڭىل بولەدى»، دەپ اتاپ وتكەن بولاتىن.
ەلىمىزدىڭ ەكونوميكالىق الەۋەتىن ارتتىرۋدا قىزىلوردا وبلىسىنداعى مۇناي كومپانيالارىنىڭ، وندا ەڭبەك ەتەتىن مۇنايشىلاردىڭ ۇلەسى زور»، – دەدى مۇرات ەرگەشباەۆ.
«قۇمكول» كەنىشىن يگەرۋ تۋرالى شەشىم وسىدان قىرىق جىل بۇرىن قابىلدانىپ، كەن ورنى وڭىردەگى ءوندىرىستىڭ وزەگىنە اينالدى. وبلىس مۇنايلى ايماققا اينالۋ جولىندا قالىپتاسۋ، دامۋ كەزەڭدەرىنەن ءوتتى.
سالتاناتتى شارادا «قازمۇنايگاز» ۇك اق باسقارما توراعاسى اسحات حاسەنوۆ، «CNPC Central Asia» جانە «CNPC Kazakhstan» كومپانيالارىنىڭ باس ديرەكتورى يان مينيۋي، «پەتروقازاقستان قۇمكول رەسورسيز» اق پرەزيدەنتى چەن دايۋ قۇتتىقتاۋ ءسوز سويلەدى.
مۇناي-گاز سالاسىن دامىتۋعا قوسقان ەلەۋلى ۇلەسى مەن وندىرىستىك قىزمەتتەگى جوعارى جەتىستىكتەرى ءۇشىن سالا ماماندارى مەملەكەتتىك جانە سالالىق ماراپاتتارعا يە بولدى.
اتاپ ايتقاندا، مۇنايشىلارعا مەملەكەتتىك، ۆەدومستۆولىق ناگرادالار مەن «قۇمكول» كەن ورنىنىڭ 40 جىلدىعىنا ارنالعان مەرەيتويلىق مەدال تابىستالدى.
وڭىردە مۇناي كومپانيالارىنىڭ قولداۋىمەن الەۋمەتتىك نىساندار سالىنىپ، ينفراقۇرىلىمدىق جانە الەۋمەتتىك جوبالار جۇزەگە اسۋدا. «قازگەرمۇناي» كومپانياسىنىڭ دەمەۋشىلىگىمەن «وقۋشىلار سارايى»، «ساۋتس ويل» كومپانياسىنىڭ قولداۋىمەن مۋزىكالىق كوللەدج عيماراتى جاتاقحاناسىمەن بىرگە سالىندى. ال «پەتروقازاقستان قۇمكول رەسورسيز» اق جىل سايىن قايىرىمدىلىق شارالارىنا 150 ملن تەڭگەدەن استام قارجى ءبولىپ كەلەدى.
جاڭا كەنىشتەردى انىقتاۋ ماقساتىندا شوگىندى باسسەيندەردى زەردەلەۋ قاراستىرىلعان. ارال شوگىندى باسسەينىندە گەولوگيالىق زەرتتەۋ جۇمىستارى 2024 جىلدىڭ جەلتوقسان ايىندا اياقتالىپ، شامامەن 1,1 ملرد. توننا كومىرسۋتەك قورى انىقتالدى. ال، سىرداريا شوگىندى باسسەينىن زەرتتەۋ جالعاسۋدا. «ساۋتسويل» كومپانياسى تاقتاتاس مۇنايىن ءداستۇرلى ەمەس تاسىلمەن ءوندىرۋ ءۇشىن دايىندىق جۇمىستارىن باستادى.
قىزىلوردا وبلىسى اكىمىنىڭ ءباسپاسوز قىزمەتى