كەزدەسۋدە قر قارجى ءمينيسترى ءمادي تاكيەۆ پەن اتىراۋ وبلىسىنىڭ اكىمى سەرىك شاپكەنوۆ ءتيىستى رەفورمانىڭ 2025 جىلدىڭ 1 قاڭتارىنان باستاپ كۇشىنە ەنەتىنىن ايتا كەلە بۇل وزگەرىستەرگە ۋاقىت ۇتتىرماي قازىردەن دايىندالۋ قاجەت ەكەنىن جەتكىزدى.
مەملەكەت باسشىسى قول قويعان زاڭدى شارتتى تۇردە 4 ۇلكەن بولىمگە ءبولىپ قاراستىرۋعا بولادى: ساتىپ الۋ راسىمدەرىن جەڭىلدەتىپ، قىسقارتۋ، ساتىپ الىناتىن تاۋارلاردىڭ، جۇمىستار مەن كورسەتىلەتىن قىزمەتتەردىڭ ساپاسىن ارتتىرۋ، جەتكىزۋشىلەردىڭ جاۋاپكەرشىلىگىن كۇشەيتۋ جانە باسەكەلەستىكتى دامىتۋ. بۇل جونىندە قارجى ۆيتسە-ءمينيسترى داۋرەن كەڭبەيىل ەگجەي-تەگجەيلى ايتىپ بەردى.
ايتالىق، زاڭنىڭ ءبىرىنشى ءبولىمى ساتىپ الۋ راسىمدەرىن جەڭىلدەتىپ، ازايتۋعا باعىتتالعان. اتاپ ايتساق، قۇجاتتا شاعىمداردى قاراۋ تەتىگى جاڭارتىلىپ، قارجى مينيسترلىگىنىڭ باقىلاۋشى ورگان رەتىندەگى ءرولى قايتا قارالدى.
ساتىپ الۋدى جەدەل جۇرگىزۋ، تاپسىرىس بەرۋشىلەرگە ۇلكەن وكىلەتتىكتەر بەرۋ، سونداي-اق ساتىپ الۋ راسىمدەرىنىڭ ۇزاققا سوزىلۋىن بولدىرماۋ ماقساتىندا شاعىمداردى ەندى ساتىپ الۋدى ۇيىمداستىرۋشىنىڭ ءوزى تىكەلەي قارايتىن بولادى. قورىتىندىلارعا شاعىمدانۋ ۆەب-پورتال ارقىلى جانە كونكۋرستىق كوميسسيامەن انىقتالعان جەڭىمپازدىڭ ساتىپ الۋى بويىنشا عانا جۇزەگە اسىرىلادى.
راسىمدەردى وتكىزۋ ۋاقىتىن قىسقارتۋ ماقساتىندا زاڭدا تىكەلەي بەلگىلەنگەن مەرزىمدەر مەملەكەتتىك ساتىپ الۋدى جۇزەگە اسىرۋ قاعيدالارىنىڭ دەڭگەيىنە اۋىستىرىلدى.
زاڭنىڭ ەكىنشى ءبولىمى مەملەكەت ەسەبىنەن ساتىپ الىناتىن تاۋارلاردىڭ، جۇمىستار مەن قىزمەتتەردىڭ ساپاسىن ارتتىرۋعا باعىتتالعان.
زاڭدا جوبانى ىسكە اسىرۋدىڭ بارلىق كەزەڭىندە ءبىر جەتكىزۋشىنىڭ جاۋاپكەرشىلىگىن بەلگىلەي وتىرىپ، نىساندى سالۋ بويىنشا جۇيەلى جۇمىستاردىڭ كەپىلى بولىپ سانالاتىن قۇرىلىستى «كىلتپەن تاپسىرۋ» قاعيداسى بويىنشا كەلىسىمشارت جاساسۋ مۇمكىندىگى قاراستىرىلعان.
زاڭنىڭ ءۇشىنشى ءبولىمى جەتكىزۋشىلەردىڭ جاۋاپكەرشىلىگىن ارتتىرۋدى كوزدەيدى. ماسەلەن، مەملەكەتتىك ساتىپ الۋلارعا قوعامدىق مونيتورينگ جۇرگىزۋ تەتىگى ەنگىزىلدى. ەندى بۇرىن سىبايلاس جەمقورلىق جاساعان الەۋەتتى ءونىم بەرۋشى، باسشى نەمەسە قۇرىلتايشى مەملەكەتتىك ساتىپ الۋلارعا قاتىستىرىلمايدى. سونداي-اق مەملەكەتتىك ساتىپ الۋعا جالاقى بويىنشا بەرەشەگى بار الەۋەتتى ءونىم بەرۋشىلەر جىبەرىلمەيدى.
زاڭنىڭ ءتورتىنشى ءبولىمى باسەكەلەستىكتى دامىتۋعا ارنالعان. مىسالى، بىرىڭعاي ساتىپ الۋ پلاتفورماسى ىسكە قوسىلدى. بۇل پلاتفورمادا مەملەكەتتىك جانە كۆازيمەملەكەتتىك سەكتور سۋبەكتىلەرىنىڭ، سونداي-اق «سامۇرى-قازىنا» قورىن ساتىپ الۋلارى قولجەتىمدى. ءبىرىنشى كەزەڭدە قازىرگى ساتىپ الۋ الاڭدارى ساقتالىپ، ساتىپ الۋ بويىنشا ەگجەي-تەگجەيلى اقپاراتتى جيناۋ مەن كورسەتۋ ءۇشىن ينتەگراتسيا جۇرگىزىلەدى.
«مەملەكەتتىك ساتىپ الۋ تۋرالى» جاڭا زاڭدا اقپاراتتىڭ اشىقتىعىنا، تاپسىرىس بەرۋشىلەر مەن جەتكىزۋشىلەردىڭ باسەكەلەستىگى مەن كاسىبيلىگىن قامتاماسىز ەتۋ قاعيداتتارىنا باسىمدىق بەرىلگەن. قىسقاشا ايتساق، جاڭا زاڭنىڭ ءمانى – تاپسىرىس بەرۋشىنىڭ بيۋدجەت قاراجاتىن ساۋاتتى جانە ءتيىمدى پايدالانۋ ارقىلى مەملەكەتتىك قاجەتتىلىكتەردى قامتاماسىز ەتۋدە جاتىر. ياعني، مەملەكەتتىك ساتىپ الۋ كوزدەلگەن ناتيجەلەر مەن ماقساتتارعا جەتۋگە قولعابىس ەتۋگە ءتيىس»، - دەدى داۋرەن كەڭبەيىل.
سونىمەن قاتار كەزدەسۋدە تەندەرلەردى وتكىزۋ تارتىبىندەگى وزگەرىستەر، كەلىسىمشارتتاردىڭ ورىندالۋىن باقىلاۋدىڭ جاڭا تەتىكتەرى سياقتى ماڭىزدى اسپەكتىلەر تالقىلاندى.
جاڭا زاڭنىڭ نەگىزگى نوۆەللالارى مەملەكەت ەسەبەنىنەن ساتىپ الىناتىن تاۋارلاردىڭ، جۇمىستاردىڭ، كورسەتىلەتىن قىزمەتتەردىڭ ساپاسىن ارتتىرۋعا، ساتىپ الۋ پروتسەسىنىڭ مەرزىمدەرىن جەڭىلدەتۋگە جانە قىسقارتۋعا باعىتتالعان. بۇل وڭىرلەردە شاعىن جانە ورتا بيزنەستىڭ دامۋىنا وڭ اسەر بەرەتىن بولادى.
وسى رەتتە قارجى مينيسترلىگىنىڭ «مەملەكەتتىك ساتىپ الۋ تۋرالى» جاڭا زاڭدى تالقىلاۋ ءۇشىن وڭىرلەردەگى بيزنەس وكىلدەرىمەن كەزدەسۋلەرى ءالى جالعاسادى.