جوبا اۆتورلارى كورەرمەنگە كەرتارتپا تاربيە ۇستاناتىن وتباسىنداعى قىزدىڭ باسىنان وتكەنىن سيپاتتايتىن، قاساڭ قاعيدالاردى بۇزىپ، ءوزىن رۋحاني تۇرعىدا دامىتا وتىرىپ جەڭىس پەن جەتىستىككە جەتكەن سپورتشى ءومىرى تۋرالى تۋىندىنى كورەرمەنگە قۇلشىنىس سىيلاۋ ماقساتىندا ۇسىنىپ وتىر. سپورتتىق درامادا ءمادينا ەسىمدى جەلاياق باپكەر مولدانىڭ جاتتىقتىرۋىمەن قالاداعى جارىسقا قاتىسۋدى ارماندايدى. بىراق ءمادينانىڭ قاتال اعاسى ونىڭ تاڭداۋىن قۇپتامايدى. ول ءمادينانىڭ ارمانىنىڭ ورىندالۋىنا بارىنشا قارسىلىعىن كورسەتەدى. «بۇل سەريالداعى ءار كەيىپكەردى سىناق كۇتەدى، بىراق ولاردىڭ ىزگىلىككە دەگەن ۇمتىلىسى ءبارىن جەڭۋگە كومەكتەسەدى. ءمادينا سەكىلدى تالابى تاۋداي جاس قىز بولسىن نەمەسە ساعدات اعاسى سياقتى قاتال ادام بولسىن، سەريالدان كەيىن كورەرمەن ولاردىڭ ءىس-ارەكەتىنەن وزىنە قاجەتتى وي تۇيەدى. جوبا دىننەن الىس ادام ءۇشىن دە قىزىق بولۋى مۇمكىن، ويتكەنى سەريال ىزگىلىك الەمىنە جانە وسىنداي سان الۋان كەيىپكەرلەر تاعدىرىنا ۇڭىلەتىن قىزىقتى زەرتتەۋ سياقتى»، - دەدى جوبا رەجيسسەرى بەرىك جاحانوۆ.
Unico الەمدىك فەستيۆالدار مەن كينونارىقتاردا ءوز كومپانياسىنىڭ جانە قازاقستاننىڭ باسقا دا وندىرۋشىلەرىنىڭ جوبالارىن ۇسىنۋدى جالعاستىرۋدا. مىسالى، بىرەر اپتا بۇرىن فرانتسيانىڭ كانن قالاسىندا «TWO» سەريالى كورسەتىلدى. ال كەشە «جەلمەن جارىسقاندار» («Running to light») مەديايندۋسترياداعى سوڭعى ترەندتەرگە ەرەكشە نازار اۋداراتىن Dubai International Content Market (DICM) ءىرى كينونارىعىندا كورسەتىلدى
«ءىس-شاراعا ءباا، تۇركيا، ەگيپەت، كاتار، جانە تاياۋ جانە قيىر شىعىس ەلدەرىنىڭ مەديا-كومپانيالارى مەن جاھاندىق ديستريبيۋتورلاردىڭ وكىلدەرى قاتىستى. ءبىزدىڭ جوبامىزدىڭ پرەزەنتاتسياسىنا كەلگەندەر تۋىندىمىزعا ەرەكشە ءىلتيپات ءبىلدىردى. كوركەمدىك جانە ءوندىرىس ساپاسىنا جوعارى باعا بەردى. سەريالدا كوتەرىلەتىن ماسەلەنىڭ اكتۋالدىعىن جانە قاسيەتتى رامازان ايىندا كورسەتۋگە لايىقتى كونتەنت ەكەندىگىن ەرەكشە اتاپ ءوتتى»، - دەدى Unico Rights كومپانياسىنىڭ ديستريبۋتسيا جونىندەگى ديرەكتورى ەكاتەرينا دۋناەۆا.
«جەلمەن جارىسقاندار» سەريالىنىڭ كەيىپكەرلەرىن قۋاندىق قىستىقباي، مەيىرعات امانگەلدين، اينۇر بەرمۇحامبەتوۆا، لاۋرا مىرزاحمەت، ماعزامان تورەنياز، قاجىمۇقان قالىمبەتوۆ، باقىتگۇل سەرىكباەۆا، ەرمەك شىنبولاتوۆ سەكىلدى دارىندى اكتەرلار سومدايدى. ءمادينا رولىندەگى جاس اكتريسا امينا ورازباي ءۇشىن «جەلمەن جارىسقاندار» دەبيۋت بولماق.
«جوباعا دايىندىق بارىسىندا مەن سپورتشىنىڭ كەيىپىنە ەنۋ ءۇشىن ۇنەمى جەڭىل اتلەتيكا جاتتىعۋلارىنا قاتىستىم. سونداي-اق، كەيىپكەرىمە ءۇشىن ارنايى حيدجابتىڭ زاماناۋي جانە وتە ادەمى نۇسقالارى تىگىلدى. بۇكىل كوماندا تۇسىرىلىمگە وتە مۇقيات دايىندالىپ، ءوز جۇمىستارىن تولىعىمەن ورىندادى، ءبارىمىز ناتيجەنى ىستىق ىقىلاسپەن كۇتۋدەمىز»، - دەپ اتاپ ءوتتى جاس اكتريسا امينا ورازباي.
سەريال 13 بولىمنەن تۇرادى. تۇساۋكەسەر 2026 جىلعا جوسپارلانعان.
فوتو اشىق دەرەككوزدەردەن
ارىپتەستىك قولداۋ