ءوڭىر باسشىسى اسحات شاحاروۆپەن اۋىل مەكتەپتەرىن ارالادىق. ساپار بارىسىندا اقتوبەدە وتكىزىلگەن پيلوتتىق جوبانىڭ ءادىسناماسىنا تولىقتىرۋلار ەنگىزۋ قاجەتتىگى بايقالدى. وسى ورايدا، مىناداي نەگىزگى ماسەلەلەر مەن ولاردىڭ شەشۋ جولدارى ايقىندالدى:
1. توزىعى جەتكەن عيماراتتاعى مەكتەپتەر
ەسكى عيماراتقا جوندەۋ جۇرگىزۋ ەكونوميكالىق جاعىنان ءتيىمسىز بولعاندىقتان، بالالاردىڭ ناقتى سانىنا قاراي 60, 100 نەمەسە 300 ورىندىق جاڭا مەكتەپ عيماراتتارىن سالۋ قاجەت. بۇل شەشىم وقۋشىلارعا زامان تالابىنا ساي جاعدايلار جاساپ، ۇستازداردىڭ وقۋ پروتسەسىن ءتيىمدى جۇرگىزۋىنە مۇمكىندىك بەرەدى.
2. جىلىتۋ جۇيەسىن وڭتايلاندىرۋ
كومىرمەن، ەلەكتر قۋاتىمەن نەمەسە ديزەلمەن جىلىتىلاتىن مەكتەپتەردىڭ قازاندىقتارىن، مۇمكىندىگى بار جەرلەردە، تابيعي گازعا اۋىستىرۋ قاجەت. بۇل شارا مەكتەپتەردىڭ جىلىتۋ جۇيەسىن قاۋىپسىز ءارى ۇنەمدى ەتىپ، سونىمەن قاتار ەكولوگيالىق زياندى ازايتادى.
3. “ونلاين-پەداگوگ” ۇعىمىن ەنگىزۋ
وزىق تاجىريبەلى پەداگوگتاردىڭ قوسىمشا ەڭبەگىن وتەۋ ماقساتىندا زاڭناماعا “ونلاين-پەداگوگ” ۇعىمىن ەنگىزۋ ۇسىنىلادى. بۇل شالعاي اۋىلدارداعى وقۋشىلارعا بىلىكتى ۇستازداردان ساپالى ءبىلىم الۋعا مۇمكىندىك بەرەدى ءارى جاڭا جۇمىس فورماتىنا سايكەس مۇعالىمدەردى ىنتالاندىرادى.
وڭىرىمىزدەگى جانە ەلىمىزدەگى اۋىل مەكتەپتەرىنىڭ ءبىلىم ساپاسىن ارتتىرۋعا باعىتتالعان جوبا جالعاسىن تابۋدا. مۇنداي قادامدار بالالاردىڭ بولاشاعى ءۇشىن بارىنشا قولايلى جاعداي جاساۋعا سەپتىگىن تيگىزەرى ءسوزسىز.
ساپار بارىسىندا العا اۋدانى، تالدىساي ەلدى مەكەنىندەگى ەسكى مەكتەپتىڭ ورنىنا 60 ورىندىق جاڭا مەكتەپ سالۋ تۋرالى شەشىم قابىلداندى. قۇرىلىسى بيىل باستالادى، - دەلىنگەن جازبادا.