تۋريزم جانە سپورت ءمينيسترى ەربول مىرزابوسىنوۆ قازاقستان بوكس فەدەراتسياسىنىڭ پرەزيدەنتى شاحمۇرات مۇتالىپپەن بىرگە 2027 جىلعى بوكستان الەم چەمپيوناتىنا دايىندىق بارىسىن ينسپەكتسيالاۋ ماقساتىندا استاناعا كەلگەن World Boxing حالىقارالىق ۇيىمىنىڭ وكىلدەرىمەن كەزدەستى.
جيىنعا World Boxing ۇيىمىنىڭ باس حاتشىسى توممي رەنە جوزەفين ديلەن، وليمپيادا چەمپيونى سەرىك ساپيەۆ، سونداي-اق ۇيىم مەن مينيسترلىك وكىلدەرى قاتىستى.
ەربول مىرزابوسىنوۆ قازاقستاننىڭ World Boxing ۇيىمىمەن ىنتىماقتاستىعىنىڭ ماڭىزىن اتاپ ءوتىپ، الەم چەمپيوناتىن وتكىزۋ وتاندىق سپورت ءۇشىن ماڭىزدى وقيعا ەكەنىن ايتتى.
«قازاقستان پرەزيدەنتى قاسىم-جومارت توقاەۆ بوكستىڭ ەلىمىزدەگى ۇلتتىق سپورت تۇرلەرىنىڭ ءبىرى رەتىندەگى ايرىقشا ءرولىن بىرنەشە رەت اتاپ ءوتتى. استانادا الەم چەمپيوناتىن وتكىزۋ وتاندىق بوكستى دامىتۋعا، حالىقارالىق سپورتتىق بايلانىستى نىعايتۋعا جانە جاستار اراسىندا سپورتتى ناسيحاتتاۋعا ۇلكەن سەرپىن بەرەدى»، – دەدى مينيستر.
كەزدەسۋ بارىسىندا تاراپتار 2027 جىلعى الەم چەمپيوناتىنا دايىندىق، سپورتتىق ينفراقۇرىلىم، ارەنالاردىڭ دايىندىعى جانە قازاقستان مەن World Boxing اراسىنداعى ىنتىماقتاستىق ماسەلەلەرىن تالقىلادى.
World Boxing وكىلدەرى الەم بىرىنشىلىگىنىڭ دايىندىق جوسپارىمەن تانىسىپ، قازاقستاندا حالىقارالىق سپورتتىق ءىس-شارالاردى ۇيىمداستىرۋ دەڭگەيىنە جوعارى باعا بەردى.
ەسكە سالا كەتەيىك، World Boxing ۇيىمداستىراتىن الەم چەمپيوناتى 2027 جىلدىڭ ءساۋىر ايىندا استانادا وتەدى.