جۇمىس ساپارى بارىسىندا وبلىس اكىمى ەمبى قالاسىنداعى «ولجا» اق لوكوموتيۆ جوندەۋ دەپوسىنىڭ قىزمەتىمەن جانە وندىرىستىك مۇمكىندىكتەرىمەن تانىستى.
كاسىپورىن لوكوموتيۆتەر مەن جۇك ۆاگوندارىنا تەحنيكالىق قىزمەت كورسەتۋگە، اعىمداعى جانە كۇردەلى جوندەۋ جۇمىستارىن جۇرگىزۋگە، سونداي-اق كولىك-لوگيستيكالىق قىزمەتتەر كورسەتۋگە ماماندانعان. «ولجا» اق ديرەكتورلار كەڭەسىنىڭ توراعاسى سۇلتان نەتاليەۆتىڭ ايتۋىنشا، كومپانيا 2019 جىلدان باستاپ بۇرىن جۇمىس ىستەمەي تۇرعان دەپونى قايتا قالپىنا كەلتىرىپ، وندىرىستىك بازانى تولىق جاڭعىرتىپ، ىسكە قوسقان.
قازىرگى تاڭدا مۇندا 100-دەن استام ادام ەڭبەك ەتەدى، ورتاشا جالاقى كولەمى 300–350 مىڭ تەڭگە. 2025 جىلدىڭ قازان ايىنان باستاپ كاسىپورىن «سنپس-اقتوبەمۇنايگاز» اق-مەن تاسىمالداۋ جانە تەحنيكالىق قىزمەت كورسەتۋ بويىنشا ۇزاقمەرزىمدى كەلىسىمشارت اياسىندا جۇمىس ىستەپ كەلەدى.
«دەپودا كەلىسىمشارتتىق مىندەتتەمەلەر اياسىندا 158 تەپلوۆوز جوندەۋدەن ءوتتى. قازىرگى ۋاقىتتا قىتايدان ساتىپ الىنعان دوڭعالاق جۇپتارىن جونۋعا ارنالعان زاماناۋي ستانوك پەن وتىن جۇيەلەرىن تەكسەرۋگە ارنالعان دياگنوستيكالىق جابدىقتاردى قوسا العاندا، جاڭا قۇرال-جابدىقتار ورناتىلىپ جاتىر»، – دەدى وبلىس اكىمىنە سۇلتان نەتاليەۆ.
سونىمەن قاتار كاسىپورىن ينفراقۇرىلىمدى دامىتۋ جۇمىستارىن جۇرگىزۋدە: قوسىمشا تەمىرجول جەلىلەرى جانە ۆاگون-تسيستەرنالاردى جوندەۋگە ارنالعان جاڭا تسەح سالۋ جوسپارلانعان. جوبانى ىسكە اسىرۋ جاڭا جۇمىس ورىندارىن اشۋعا مۇمكىندىك بەرەدى.
«لوكوموتيۆ جوندەۋ دەپوسى سەكىلدى كاسىپورىنداردى دامىتۋ ءوڭىر ەكونوميكاسى ءۇشىن اسا ماڭىزدى. مۇندا جۇمىس ورىندارى اشىلىپ، زاماناۋي تەحنولوگيالار ەنگىزىلىپ، تۇراقتى وندىرىستىك بازا قالىپتاسىپ جاتىر. مودەرنيزاتسيانى جالعاستىرىپ، وندىرىستىك قۋاتتى ارتتىرۋ جانە بۇل ۇدەرىستەرگە جەرگىلىكتى مامانداردى كەڭىنەن تارتۋ ماڭىزدى»، – دەدى ايماق باسشىسى.
كاسىپورىندى ارالاتس بارىسىندا ەمبى قوعامدىق كەڭەسىنىڭ وكىلدەرىمەن كەزدەسۋ ءوتىپ، قالا دامۋىنىڭ كەلەشەگى مەن ونەركاسىپتىك كاسىپورىندارمەن ءوزارا ءىس-قيمىل ماسەلەلەرى تالقىلاندى.