قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى، 5-ءشى دۇنيەجۇزىلىك كوشپەندىلەر ويىندارىن ۇيىمداستىرۋ كوميتەتىنىڭ توراعاسى رومان سكلياردىڭ توراعالىعىمەن 5-ءشى دۇنيەجۇزىلىك كوشپەندىلەر ويىندارىن وتكىزۋگە دايىندىق تۋرالى كەڭەس ءوتتى. كەڭەسكە قر سپورت جانە تۋريزم ءمينيسترى ەرمەك مارجىقپاەۆ، 5-ءشى دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكتسياسىنىڭ باسشىسى نايل نۇروۆ، مادەنيەت جانە اقپارات، قارجى مينيسترلىكتەرىنىڭ، استانا قالاسى اكىمدىگىنىڭ وكىلدەرى قاتىستى. ديرەكتسيا باسشىسى نايل نۇروۆ ويىندارعا دايىندىق بارىسى تۋرالى، سونداي-اق قر پرەزيدەنتى قاسىم-جومارت توقاەۆتىڭ بيۋدجەتتى قىسقارتۋ جونىندەگى تاپسىرماسىنىڭ ورىندالۋى تۋرالى تولىعىراق ايتىپ بەردى. ەستەرىڭىزگە سالا كەتەيىك، مەملەكەت باسشىسى قاسىم-جومارت توقاەۆ ەلىمىزدىڭ بىرقاتار وڭىرلەرىندەگى كۇردەلى سۋ تاسقىنى جاعدايىن ەسكەرە وتىرىپ ۇكىمەتكە، ورتالىق مەملەكەتتىك جانە جەرگىلىكتى اتقارۋشى ورگاندارعا يميدجدىك ءىس-شارالاردان باس تارتۋدى جانە الدا وتەتىن كوشپەندىلەر ويىندارىنا جۇمسالاتىن شىعىنداردى قىسقارتۋدى تاپسىردى. «مەن بيۋدجەت قارجىسىن ۇنەمدەۋ ماقساتىندا ءىرى حالىقارالىق فورۋمدى وتكىزۋدەن باس تارتتىم. سونىمەن قاتار دۇنيەجۇزىلىك كوشپەندىلەر ويىندارىنا جۇمسالاتىن شىعىندى قىسقارتامىز. ارينە، قازىر بۇل شارادان تۇپكىلىكتى باس تارتۋ مۇمكىن ەمەس. بىراق وعان جۇمسالاتىن قارجى كولەمى ايتارلىقتاي ازايادى. بۇدان بولەك، ەلىمىزدىڭ توكيودا وتەتىن دۇنيەجۇزىلىك كورمەگە قاتىسۋىنا بولىنگەن بيۋدجەت تە قىسقارادى»، – دەدى مەملەكەت باسشىسى سۋ تاسقىنى سالدارىنان ەۆاكۋاتسيالانعان سولتۇستىك قازاقستان وبلىسى تۇرعىندارىمەن كەزدەسۋدە. پرەزيدەنت تاپسىرماسىنا بايلانىستى 5-ءشى دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ديرەكتسياسى سپورتتىق باعدارلاماعا وزگەرىستەر جانە ۇسىنىستار ەنگىزدى. ويىندار ءبىر كۇنگە قىسقارتىلىپ، ەندى ءىس-شارا 8-13 قىركۇيەك ارالىعىندا وتەدى. «سسيرىم» ويىنى تولىعىمەن الىنىپ تاستالدى. «ماس-رەستلينگتەن» 4 سالماق دارەجەسى الىنىپ تاستالىپ، 8-ءى عانا قالدى. مەدالدار ەرلەر اراسىندا 5 سالماق دارەجەسى بويىنشا، ال ايەلدەر اراسىندا 3 سالماق دارەجەسىندە ويناتىلاتىن بولادى. «كوكپار» 6 كۇننەن 3 كۇنگە قىسقارتىلدى. «الىشتان» سالماق دارەجەلەرى ەكى ەسە قىسقارتىلدى. «قۇراشتان» 3 سالماق دارەجەسى الىنىپ تاستالدى. «ارقان تارتىس» تەك 2 سالماق دارەجەسى بويىنشا ەرلەر مەن ايەلدەر اراسىندا وتكىزىلەتىن بولادى. ويىنداردىڭ سپورتتىق باعدارلاماسىنا «كوكبورى» جانە «كورەش» قوسىلدى. قىرعىز ويىنا كوكبورى وليمپيادالىق جۇيە بويىنشا 3 كۇن ىشىندە وتكىزىلەدى. كورەش تاتار بەلدىك كۇرەسى تەك ەرلەر اراسىندا 4 سالماق دارەجەسىندە وتەدى. سونداي-اق، كەڭەستە ەرىكتىلەردىڭ، ۇيىمداستىرۋ كوميتەتىنىڭ، تورەشىلەردىڭ مەن قىزمەتكەرلەردىڭ كيىم نۇسقالارى تانىستىرىلدى.
ماتەريال ارىپتەستىك نەگىزدە جاريالاندى