Astana qalasynyŋ äkımı Jeŋıs Qasymbek Instagram paraqşasynda jaŋadan aşylatyn medisinalyq nysandar turaly jazdy, dep habarlaidy elorda äkımdıgınıŋ resmi saity.
«Tūrǧyndar sanynyŋ ösuı men qoldanystaǧy medisinalyq ūiymdarǧa tüsetın jüktemenı eskere otyryp, medisina infraqūrylymyn kezeŋ-kezeŋımen keŋeitıp jatyrmyz. Bügın QR Premer-ministrınıŋ bırınşı orynbasary Nūrlybek Nälıbaevpen jäne QR Densaulyq saqtau ministrı Aqmaral Älnazarovamen bırge bırqatar medisinalyq mekemenı araladyq.
Memleket basşysynyŋ tapsyrmalary aiasynda biyl №2 qalalyq köpbeiındı auruhananyŋ janynan jaŋadan qabyldau-diagnostikalyq keşenın, sondai-aq №2 köpbeiındı qalalyq balalar auruhanasynyŋ janynan balalarǧa arnalǧan travmatologiialyq punkt aşamyz. Qalǧan nysandar – perinataldyq ortalyq, köpbeiındı auruhana jäne üş emhana kezeŋ-kezeŋımen aşylady.
№2 qalalyq köpbeiındı auruhananyŋ janynan aşylatyn jaŋa qabyldau-diagnostikalyq keşen elordanyŋ sol jaǧalauyndaǧy tūrǧyndarǧa arnalǧan eresekterdıŋ qabyldau bölımın, akuşerlık qabyldau bölımın, diagnostikalyq qyzmetter men travmatologiialyq punktı bırıktıredı. Jalpy aumaǧy 7 myŋ 120 şarşy metr bolatyn bes qabatty nysan täulıgıne 700-900 adamdy qabyldauǧa eseptelgen.
Keşende kompiuterlık tomografiia, MRT, rentgenodiagnostika, angiografiialyq operasiialyq bölme, operasiialyq zaldar, insult ortalyǧy, travmatologiia bölımşelerı, reanimasiia jäne qarqyndy terapiia bölımşelerı qarastyrylǧan.
Eŋ basty artyqşylyǧy – şūǧyl kömek körsetudıŋ barlyq qajettı kezeŋınen bır keşennıŋ ışınde ötuge mümkındık bar: alǧaşqy tekseruden ötıp, diagnoz qoiylǧannan keiın operasiia jasatuǧa jäne ary qaraiǧy emın jalǧastyruǧa deiın. Būl nauqastardy tekseru men därıgerlerdıŋ şeşım qabyldau uaqytyn jyldamdatyp, mamandandyrylǧan medisinalyq kömektıŋ qoljetımdılıgın arttyrady. Keşennıŋ aşyluy taǧy 50 jaŋa jūmys ornyn qūruǧa mümkındık beredı.
Biyl №2 köpbeiındı qalalyq balalar auruhanasyna balalarǧa şūǧyl travmatologiialyq kömek körsetuge arnalǧan jaŋa qosymşa ǧimarat ta aşylady. Jaŋa korpusta reanimasiia zaly, operasiialyq bölım, kompiuterlık tomografiia jäne rentgendiagnostika kabinetterı jabdyqtalady.
Zamanaui qūrylǧylar jaraqat alǧan balalardy tekseru men emdeu mümkındıgın keŋeitıp, olardy tiıstı bölımderge baǧyttau tärtıbın oŋtailandyruǧa jäne medisinalyq kömektı jedel körsetuge mümkındık beredı.
Kelesı kezeŋde Saryarqa audanyndaǧy medisinalyq infraqūrylymdy damytu qarastyrylǧan. 2027 jyly 250 tösek-orynǧa arnalǧan jaŋa zamanaui perinataldyq ortalyqty aşu josparlanyp otyr. Al 2029 jyly 300 tösek-oryndyq köpbeiındı qalalyq auruhananyŋ qūrylysyn aiaqtap, paidalanuǧa beru közdelgen.
Byltyr Ūlttyq şūǧyl medisinany üilestıru ortalyǧynyŋ bazasynda Esıl jäne Nūra audandarynyŋ tūrǧyndaryna arnalǧan balalar travmatologiialyq punktı aşyldy. Mūnda 10 myŋnan astam bala medisinalyq kömek aldy. Osylaişa oŋ jaǧalaudaǧy balalar travmatologiialyq punktıne tüsetın jükteme azaidy.
Sol siiaqty ötken jyly jeke investisiialar esebınen «Nūrly jol» vokzaly audanynda emhana aşyldy.
Alǧaşqy medisinalyq-sanitariialyq kömek körsetu jelısın qatar keŋeitıp jatyrmyz. 2026 jyldyŋ soŋynda Esıl audanynda bır auysymda 500 adamdy qabyldaityn emhananyŋ qūrylysyn bastau josparlanǧan. 2027 jyly Saraişyq pen Nūra audandarynda ärqaisysy bır auysymda 500 adamdy qabyldai alatyn taǧy ekı emhana salynady.
Jalpy, aldaǧy üş jylda 10 densaulyq saqtau nysanyn salu josparlanyp otyr, olardyŋ qatarynda 2 perinataldyq ortalyq, jaŋa zamanaui köpbeiındı auruhana, 5 emhana jäne 2 jedel järdem qosalqy stansiiasy bar», – dep jazdy Jeŋıs Qasymbek.
Baspasöz qyzmetı