ساياساتكەردىڭ رەيتىنگىسى 33-كە دەيىن ءتۇسىپ كەتتى. وسىلايشا، لەيبوريستەر باستى قارسىلاسى كونسەرۆاتورلاردان 1 تارماققا عانا ىلگەرى تۇر. لەيبوريستەرگە داۋىس بەرگەن حالىقتىڭ جارتىسىنا جۋىعىنىڭ ۇكىمەتتىڭ قازىرگى جۇمىسىنا كوڭىلى تولماي وتىر. ولار وزدەرىن الدانعانداي سەزىنەتىن كورىنەدى.
ستارمەردىڭ ساتسىزدىكتەرگە ۇشىراۋىنىڭ باستى سەبەبى — بيلىكتەگىلەردىڭ ءوزارا ىشكى كۇرەسى بولدى. بەدەلىنىڭ تومەندەۋىنە، اسىرەسە، پرەمەر-مينيستر كەڭسەسىنىڭ باسشىسى سيۋ گرەيدى اۋىستىرۋ تۋرالى شەشىم اسەر ەتكەن. گرەي – 30 جىلدان استام ۇكىمەتتىك تاجىريبەسى بار مامان. ونىڭ ستارمەرگە وپپوزيتسيادان پرەمەر-مينيسترلىككە وتۋگە كومەكتەسۋ ءۇشىن شاقىرىلعانى بەلگىلى.
الايدا گرەيدىڭ داۋنينگ-ستريتتەگى جۇمىسىنا ستارمەردىڭ كومانداسى نارازى بولدى. ناتيجەسىندە ۇكىمەت باسشىسى گرەيدى قىزمەتىنەن بوساتىپ، ونىڭ ورنىنا لەيبوريستەردىڭ سايلاۋداعى جەڭىسىنە ۇلكەن ۇلەس قوسقان ساياسي ستراتەگ مورگان ماكسۆينيدى تاعايىندادى.
ماكسۆيني ساياسي ناۋقاندارعا باسشىلىق ەتۋدە وتە تاجىريبەلى بولعانىمەن، گرەي سياقتى ۇكىمەت بيۋروكراتياسىن تەرەڭ تۇسىنە المايدى. سايكەسىنشە ونىڭ داۋنينگ-ءستريتتى ءتيىمدى باسقارا الاتىندىعىنا كۇمان تۋدىرادى. ونىڭ تاعايىندالۋى ستارمەردىڭ ساياسي ادالدىق پەن ستراتەگيالىق ۇستانىمداردى ۇكىمەتتىك تاجىريبەدەن جوعارى قويعانىن كورسەتەدى.
ىشكى داۋلار حالىقتىڭ اشۋىن تۋعىزدى. ەگەر ستارمەر ءوز كومانداسىن باسقارا الماسا، مەملەكەتكە قالاي باسشىلىق ەتەدى دەگەن كۇمان پايدا بولدى. پاتەر جالداۋشىلاردى قولداۋ جانە جوسپارلاۋ رەفورمالارى سياقتى ۇكىمەتتىڭ وڭ باستامالارى داۋنينگ-ستريتتەگى داۋلاردىڭ كولەڭكەسىندە قالىپ قويدى.
ستارمەردىڭ ابىرويىن ايرانداي توگىپ وتىرعان تاعى بىرنەشە فاكتور – ەلدەگى ءومىر ءسۇرۋ قۇنىنىڭ ءوسۋى مەن دەنساۋلىق ساقتاۋ جۇيەسىندەگى ولقىلىقتار. كوپشىلىك ساياساتكەردەن باتىل قادامدار كۇتكەنىمەن، ستارمەر اسا ساقتىقپەن ارەكەت ەتىپ، حالىقتىڭ سەنىمىنە كولەڭكە ءتۇسىرىپ وتىر. جاقىندا وتەتىن ينۆەستيتسيالىق سامميت پەن بيۋدجەتتىك تالقىلاۋلار الدىندا ستارمەر حالىقتى وزىنە قاراتا الۋى كەرەك، بىراق وعان دەيىن از عانا ۋاقىت قالدى.