ايجان بيجانوۆانىڭ ايتۋىنشا، ەلىمىزدەگى ءىرى ساۋدا جەلىلەرى، ونىڭ ىشىندە «ماگنۋم»، «سمولل»، «انۆار» جانە «دينا»، فەرمەرلەردەن تىكەلەي 1,5 مىڭ توننا كارتوپ ساتىپ الۋ بويىنشا كەلىسىمشارت جاساۋعا دايىن ەكەنىن جەتكىزدى. سونىمەن قاتار، ساۋدا جەلىلەرى ءونىمدى شارۋاشىلىقتان وزدەرى الىپ كەتۋگە دايىن.
«اكىمدىكتەر وزدەرىنىڭ قاجەتتىلىكتەرىن، سونىڭ ىشىندە ساۋدا جەلىلەرىنە ارنالعان كولەمدەردى كورسەتۋى قاجەت، بۇل نارىقتاعى سۇرانىستى جىلدام قاناعاتتاندىرۋ ءۇشىن ماڭىزدى. سونداي-اق، اۋىل شارۋاشىلىعى ونىمدەرىن وندىرۋشىلەر مەن ساۋدا نۇكتەلەرى اراسىندا تىعىز بايلانىس ورناتۋ وتە ماڭىزدى»، - دەپ اتاپ ءوتتى ساۋدا جانە ينتەگراتسيا ءبىرىنشى ۆيتسە-ءمينيسترى.
سونداي-اق ول ازىق-تۇلىك تاۋارلارىنىڭ باعاسىن قالىپتاستىرۋ تىزبەگىندەگى دەلدالدىق سحەمالاردى زەرتتەيتىن وڭىرلىك كوميسسيالاردىڭ جۇمىسىن كۇشەيتۋ قاجەتتىلىگىنە نازار اۋداردى. سونىمەن بىرگە، ءبىرىنشى ۆيتسە-مينيستر فەرمەرلەرمەن جۇمىس جۇرگىزۋدى، كارتوپ پەن باسقا دا ونىمدەردىڭ كوتەرمە باعاسىنىڭ نەگىزسىز وسۋىنە جول بەرمەۋ ماسەلەلەرىن قاراستىرۋدى تاپسىردى.
ايتا كەتۋ كەرەك، بيىلعى جىلى ساۋدا كوميتەتىنىڭ وڭىرلىك دەپارتامەنتتەرى 20 وڭىرلىك كوميسسيا وتكىزىپ، ونىڭ ناتيجەسىندە 49 زاڭبۇزۋشىلىق انىقتالدى. ولاردىڭ اراسىندا كارتوپتىڭ الەۋمەتتىك ماڭىزى بار ءونىم رەتىندە ساۋدا ۇستەمەسىن 15%-دان ارتتىرۋ فاكتىلەرى تىركەلدى.
مينيسترلىكتىڭ ءباسپاسوز قىزمەتى