مەموراندۋمعا وبلىستىق ءبىلىم باسقارماسىنىڭ باسشىسى اسقاربەك ەسجانوۆ پەن «Orda school» مەكتەبىنىڭ قۇرىلتايشىسى مۇرات باقتيارۇلى قول قويدى. وعان جاۋاپتى سالا باسشىلارى، قوعام قايراتكەرلەرى، زيالى قاۋىم وكىلدەرى، ءبىلىم سالاسىنىڭ قىزمەتكەرلەرى قاتىستى.
نۇرلىبەك ماشبەكۇلى وڭىردە مەملەكەت باسشىسىنىڭ، ۇكىمەتتىڭ ەرەكشە قولداۋىمەن جۇزەگە اسقان اۋقىمدى جوبالار مەن تىڭ باستامالار تۋرالى ايتىپ ءوتتى.
«ايماعىمىزدا جاس ۇرپاقتىڭ ساپالى ءبىلىم الۋىنا بارلىق جاعداي جاسالۋدا. سوڭعى جىلدارى ءبىز بيۋدجەت قارجىسىنىڭ باسىم بولىگىن الەۋمەتتىك سالاعا، ونىڭ ىشىندە ءبىلىم سالاسىنا باعىتتادىق. ءبىلىم بەرۋ سالاسىنا سوڭعى 3 جىلدا 812 ملرد. 245 ملن. تەڭگە، بيىل 346 ملرد. 800 ملن. تەڭگە قارالدى. بولىنگەن قارجىنىڭ تۇپكىلىكتى ماقساتقا جەتۋى مەن قارجى بۇزۋشىلىقتاردىڭ الدىن الۋدا ناقتى شارالار قابىلدانعان.
ءبىزدىڭ ەڭ ءبىرىنشى مىندەتىمىز – بالالارىمىزدىڭ جان-جاقتى، ساپالى ءبىلىم الۋىنا قولايلى جاعداي جاساپ، جايلى ورتا قالىپتاستىرۋ.
ايماعىمىزدا العاشقىلاردىڭ ءبىرى بولىپ، تاۋەكەلگە بەل بۋىپ، قارجىسىن ءبىلىم بەرۋ سالاسىنا سالعان مۇرات باقتيارۇلى اعامىز بولاتىن. بۇگىندە «Orda school» جەكەمەنشىك مەكتەپتەرىنىڭ جەلىسى 4-كە جەتتى.
ءبىز دە ءوز كەزەگىمىزدە تازا، شىنايى جۇمىس جاسايتىن كاسىپكەرلەردى ۇنەمى قولداپ كەلەمىز. «سابالاق» ساياجايى اۋماعى جىل سايىن كەڭەيىپ، حالىق سانى ارتقانىن ەسكەرسەك، «Orda school - 2» جەكە مەكتەبىنىڭ پەرسپەكتيۆاسى زور.
ءاربىر اتا-انا بالاسىنىڭ زاماناۋي عيماراتتا وقىپ، ءبىلىمدى بولعانىن قالايدى. بۇعان دەيىن جەكە مەكتەپتە 336 وقۋشى تەگىن وقىپ كەلدى. مۇرات باقتيارۇلى بيزنەستىڭ الەۋمەتتىك جاۋاپكەرشىلىگى اياسىندا 2023 جىلدىڭ قىركۇيەگىندە اشىلعان «Orda school - 2» جەكەمەنشىك مەكتەبىن وبلىستىق كوممۋنالدىق مەنشىككە بەرۋ جونىندە شەشىم قابىلدادى. جاس ورەندەرىمىزدىڭ يگىلىگى جولىندا جاساعان باتىل قادامىڭىز ءۇشىن سىر جۇرتشىلىعى اتىنان شىنايى العىسىمىزدى بىلدىرەمىز!
باسەكەگە قابىلەتتى، زاماننىڭ جاڭا شاقىرتۋلارىنا دايىن، وزىق ويلى ۇرپاق تاربيەلەۋ – مەملەكەت الدىنداعى ستراتەگيالىق ماڭىزدى مىندەت. بارشا باستامالارىڭىزعا ساتتىلىك تىلەيمىن جانە بىرلەسە جۇمىس اتقارۋعا شاقىرامىن!»، – دەدى ايماق باسشىسى.
ەندى بۇل ءبىلىم بەرۋ ۇيىمى №297 ورتا مەكتەپ بولىپ قايتا قۇرىلىپ، مەملەكەتتىك مەكەمە رەتىندە جۇمىسىن جالعاستىرادى. بۇعان دەيىن ساياجايدان قالاداعى مەكتەپتەرگە قاتىناپ وقۋعا ءماجبۇر بولعان 326 وقۋشىنىڭ ماسەلەسى تولىق شەشىمىن تابادى.
باسقوسۋدا «Orda school» مەكتەبىنىڭ قۇرىلتايشىسى، مەملەكەت جانە قوعام قايراتكەرى مۇرات باقتيارۇلى، «ۇلاعات» مەكتەبىنىڭ قۇرىلتايشىسى قالقازبەك اجىبەكوۆ، «زەردە» مەكتەبىنىڭ قۇرىلتايشىسى سەيتقالي الشىنباەۆ ءسوز سويلەدى.
@قىزىلوردا وبلىسى اكىمىنىڭ ءباسپاسوز قىزمەتى