وزىق تەحنولوگيالاردى ەنگىزۋ، حالىقارالىق سەرىكتەستەرمەن ىنتىماقتاستىق ورناتۋ جانە جەر قويناۋىن زەرتتەۋ ءۇشىن ستراتەگيالىق ءتاسىلدى قولدانۋدىڭ ناتيجەسىندە قمگ بۇل باعىتتاعى جۇمىستى جانداندىرىپ كەلەدى. جەر قويناۋىندا تەرەڭ ورنالاسقان قورلاردىڭ مۇمكىندىگىن زەرتتەۋ اياسىندا قمگ 2024 جىلى مامىر ايىنىڭ سوڭىندا قىزىلوردا وبلىسىندا تورعاي پالەوزوي جوباسى بويىنشا تەرەڭدىگى 5500 م ۇڭعىمانى بۇرعىلاۋعا كىرىستى. ال قاراشادا اتىراۋ وبلىسىندا قاراتون پودسولەۆوي ۋچاسكەسىندە تەرەڭدىگى 5500 م ۇڭعىمانى بۇرعىلاۋ باستالدى.
تەرەڭ ۇڭعىمالاردى بۇرعىلاۋ كوپ قارجىنى قاجەت ەتەتىن باستاما، ونىڭ ۇستىنە بۇل جۇمىس ۇلكەن گەولوگيالىق ءارى تەحنولوگيالىق تاۋەكەل. مەملەكەت باسشىسىنىڭ تاپسىرماسى بويىنشا قابىلدانعان «جاقسارتىلعان مودەلدىك كەلىسىمشارت» تەتىگى وسىنداي كۇردەلى جوبالاردىڭ تارتىمدىلىعىن ارتتىردى.
سونىمەن قاتار بىلتىر جەلتوقساندا اقتوبە وبلىسىندا قاراجار جوباسى بويىنشا تەرەڭدىگى 3000 م العاشقى ىزدەۋ ۇڭعىماسىن بۇرعىلاۋ جۇمىستارى باستالدى، سونداي-اق اتىراۋ وبلىسىندا تايسويعان ۋچاسكەسىندە العاشقى ىزدەۋ ۇڭعىماسىن بۇرعىلاۋ جۇمىستارى ءجۇرىپ جاتىر. بۇل جوبا اياسىندا 8 تاۋەلسىز ۇڭعىمانى (400-3800 م) بۇرعىلاۋ جوسپارلانىپ وتىر.
بۇدان بولەك، قمگ اقتوبە، باتىس قازاقستان جانە ماڭعىستاۋ وبلىستارىنداعى مۇعالجار، بەرەزوۆسكي، بولاشاق، جارقىن جانە سولتۇستىك وزەن — جاڭا پەرسپەكتيۆتى ۋچاسكەلەردە جەر قويناۋىن گەولوگيالىق زەرتتەۋ باعدارلاماسى بويىنشا مۇمكىندىكتەرىن دامىتىپ جاتىر.
60-قا جۋىق حالىقارالىق كومپانيانى قامتىعان جاھاندىق روۋد-شوۋ وتكىزۋ اياسىندا قمگ گەولوگيالىق بارلاۋ جوبالارىن بىرلەسىپ ىسكە اسىرۋ ءۇشىن ستراتەگيالىق سەرىكتەستەردى تارتا الدى، بۇل ءوز كەزەگىندە ينۆەستيتسيا مەن جاڭا تەحنولوگيالاردى تارتۋعا مۇمكىندىك بەرەدى.
2024 جىلدىڭ قازان ايىندا CNOOC-مەن جىلىوي جوباسى بويىنشا كەلىسىمگە قول قويىلدى. مۇعالجار جوباسى بويىنشا ستراتەگيالىق سەرىكتەستەردى ىزدەۋ اياسىندا Shell جانە Chevron كومپانيالارى انىقتالدى. 2025 جىلى 10 قاڭتاردا قمگ ولارمەن اتالمىش ۋچاسكەنىڭ مۇمكىندىگىن بىرلەسىپ زەرتتەۋ ماقساتىندا گەولوگيالىق اقپاراتتى پايدالانۋ قۇقىعىن بەرۋ تۋرالى كەلىسىمشارتتار جاساستى. بولاشاق جوباسى بويىنشا «قارامارجان گرۋپپ» كومپانياسىمەن ىنتىماقتاستىق ورناتۋدىڭ نەگىزگى تالاپتارى قابىلداندى، بۇل ۇلتتىق كومپانيانىڭ وتاندىق ينۆەستورلارمەن ىنتىماقتاستىققا دەگەن ۇمتىلىسىن راستايدى جانە كومىرسۋتەكتەردى ىزدەۋ سالاسىندا جەرگىلىكتى كومپانيالار ءۇشىن جاڭا مۇمكىندىكتەر اشادى. باسقا جوبالار بويىنشا ءىرى حالىقارالىق كومپانيالارمەن كەلىسسوزدەر جۇرگىزىلۋدە. بەرەزوۆسكي جوباسى بويىنشا الەۋەتتى ستراتەگيالىق سەرىكتەستەر وتىنىمدەرىن بەردى.
جەر قويناۋىن گەولوگيالىق زەرتتەۋ 1.0 جوبالارىنا سەرىكتەستەردى تارتۋ ناتيجەسى بويىنشا ينۆەستيتسيالاردى قايتارۋ جوسپاردا، ول قارجى اتىراۋ، اقتوبە جانە ۇلىتاۋ وبلىستارىنداعى بەرەكە، شىعىس جانە شۋ-سارىسۋ جوبالارى بويىنشا جەر قويناۋىن گەولوگيالىق زەرتتەۋ جونىدەگى 2.0 جاڭا باعدارلاماسىنىڭ سەيسميكالىق بارلاۋ جۇمىستارىن ىسكە اسىرۋعا جۇمسالادى. جۇمىستار 2025 جىلى باستالادى دەپ جوسپارلانۋدا.
وسىلايشا، قازمۇنايگاز قازاقستاننىڭ مۇناي-گاز سالاسىنىڭ تۇراقتى دامۋىنا ەلەۋلى ۇلەس قوسا وتىرىپ، وڭىرلەردەگى قورلاردى ۇلعايتۋ بويىنشا جان-جاقتى ءارى اۋقىمدى جۇمىس جۇرگىزۋدە.
اشىق دەرەككوزدەردەن