سولتۇستىك قازاقستان وبلىسىنىڭ ايىرتاۋ اۋدانى اۋماعىنداعى كوكشەتاۋ – رۋزاەۆكا تاسجولىنىڭ 141-شاقىرىمىندا جول-كولىك وقيعاسى بولعانى جونىندە جۇرگىزۋشىلەردەن پاترۋلدىك پوليتسيا قىزمەتكەرلەرىنە حابارلاما ءتۇستى. وقيعا ورنىنا سقو پد پاترۋلدىك پوليتسيا باتالونىنىڭ قىزمەتكەرلەرى ەرلان دانكين مەن نۇرلان قوجاحمەتوۆ جەدەل جەتتى. ولار جولدان شىعىپ، ورمان جولاعىنا تۇرىپ قالعان Renault جۇك كولىگىن انىقتادى.
بەلگىلى بولعانداي، 67 جاستاعى شەتەلدىك جۇرگىزۋشى اۋىل شارۋاشىلىعى تەحنيكالارىن كوكشەتاۋ قالاسىنا تاسىمالداپ بارا جاتقان. ونىڭ ايتۋىنشا، رۋلدە كەلە جاتىپ كەنەتتەن ءوزىن جايسىز سەزىنىپ، ەسىنەن تانىپ قالعان. پوليتسەيلەر دەرەۋ جەدەل جاردەم شاقىرىپ، جۇرگىزۋشىنى اۋداندىق ورتالىق اۋرۋحاناعا جەتكىزۋگە كومەكتەستى.
ودان كەيىن ءتارتىپ ساقشىلارى اۋىلدىق وكرۋگتىڭ اكىمى جەڭىس مۇقاشەۆپەن بايلانىسىپ، ارنايى تەحنيكا ۇيىمداستىرۋعا جاردەم سۇرادى. ناتيجەسىندە، جۇك كولىگى جول جيەگىنە شىعارىلىپ، جاقىن ماڭداعى سەرىكتەستىك اۋماعىنا جەتكىزىلدى. پوليتسەيلەر ءبىر مەزەتتە جۇكتى كۇتىپ وتىرعان كاسىپورىنمەن دە بايلانىس ورناتىپ، ولار كەلىپ، كولىك پەن جۇكتى الىپ كەتتى. قازىرگى ۋاقىتتا جۇرگىزۋشىگە قاجەتتى مەديتسينالىق كومەك كورسەتىلۋدە.