جاسوسپىرىمدەردىڭ قاۋىپسىزدىگى ءۇشىن ولاردىڭ اتى-ءجونى مەن سۋرەتى كورسەتىلمەدى.
– نومىرلەرىن شەشىپ تاستاعان ماشينالاردى كوردىك. سادوۆايا كوشەسى جاقتان كىردى. ىشىندە بالالار بولعان. دوسىم دا كورگەن. مەرسەدەس “كاباندى” كوردىك. «ازات» اۋىلىن تولىق ارالاپ جۇرەتىن. الدىڭعى كۇنى 102 نومىرىنە حابارلاسىپ كورەيىن دەپ ەدىم، ولار تۇتقانى كوتەرمەدى. تەلەگرام ارناعا دا جىبەردىم. ولار “فاكت، ۆيدەو كەرەك” دەدى، – دەيدى شەرحاتتىڭ دوستارىنىڭ ءبىرى.
شەرزاتتىڭ تاعى ءبىر دوسى “قارا پرادو كولىگىمەن ءنومىرسىز ءبىر جاس بالالار ءجۇردى، اق «كابان» دا كوشەنىڭ باس جاعىنا كەلىپ، كىشكەنە تۇرىپ كەتىپ قالعان. اسىقپاي، جان-جاقتاعى ادامدارعا قاراپ جۇرەتىن” دەيدى
بۇگىن تۇندە تالعاردا ولتىرىلگەن مارقۇم شەرزات بولاتتىڭ ءۇيى ورتەنگەنى حابارلاندى. مارقۇمنىڭ تۋعان-تۋىستارىنىڭ ايتۋىنشا، ءورت شامامەن تۇنگى 00.30 ۋاقىتىندا بولعان. ۇيدە ەشكىم بولماعان. سەبەبى شەرزات اتا-اجەسىنىڭ قولىندا وسكەندىكتەن، بۇل جاعداي ەگدە كىسىلەرگە قاتتى اۋىر تيگەندىكتەن، مارقۇمنىڭ تۋعان-تۋىستارى قارا شاڭىراقتا بولعان. ۇيدەگى مال امان، تەك ءيتتى كۇيىك شالعان.
ەسكە سالا كەتەيىك، الماتى وبلىسىندا جاس جىگىتتەردىڭ توبەلەسى 16 جاستاعى ءجاسوسپىرىمنىڭ ولىمىمەن اياقتالعان. مارقۇم دۇكەندە ساۋدا جاساپ تۇرعان اكەسىمەن ەرەگەسكەن كليەنتپەن توبەلەسكەن. بۇرىن تاراعان اقپاراتتارعا قاراعاندا، كليەنت دۇكەننەن سىرا الىپ، اقشاسىن تولەمەي كەتپەك بولعان. توبەلەس سول ءۇشىن تۋىنداعان. سىرانى تەگىن الىپ كەتپەك بولعان جىگىت جاقتاستارىن شاقىرىپ، اكەسى مەن بالاسىن، تۋىس اعاسىن سوققىعا جىققان. ءبىر توپ جىگىت ءجاسوسپىرىمدى تەپكىلەپ جاتقانىن ماڭايداعى تۇرعىندار ۆيدەوعا ءتۇسىرىپ العان. 10-سىنىپتا وقيتىن شەرزات بولات اتا-اناسىنىڭ دۇكەنىنە كەزدەيسوق كەلگەن. سۋىق قارۋمەن كەلگەن بۇزاقىلار ەشكىمدى اياماپتى.
پروكۋراتۋرا تالعارداعى ءجاسوسپىرىمنىڭ ولىمىنە قاتىستى مالىمدەمە جاساپ، «ءادىل تەرگەۋگە كەپىلدىك بەرەمىز» دەپ اقپارات تاراتقان. الايدا تەرگەۋشىلەرگە سەنبەگەن مارقۇمنىڭ تۋعان-تۋىستارى كوشەگە شىعىپ، ادىلدىكتى تالاپ ەتتى. ولار سول ءتۇنى بولعان 13 ادامنىڭ ورنىنا 7 ادامنىڭ عانا قامالعانىنا نارازىلىق ءبىلدىردى. كوپ وتپەي مارقۇم سالتانات نۇكەنوۆانىڭ اعاسى، قۇقىققورعاۋشى ايتبەك امانگەلدى تالعاردا ولتىرىلگەن بوزبالانىڭ وتباسىنا تەگىن ادۆوكات تاۋىپ بەرەتىنى حابارلاندى.
بۇعان دەيىن قازا تاپقان ءجاسوسپىرىمنىڭ اكەسى بەينەباقىلاۋ كامەراسىنىڭ جازباسىن الدەكىمدەر ءوشىرىپ تاستاعانىن ايتقان ەدى. الايدا ءىىم ول مالىمەتتى جوققا شىعاردى. 9 قازاندا دەپۋتات نارتاي ارالبايۇلى باس پروكۋرور بەرىك اسىلوۆقا، ىشكى ىستەر ءمينيسترى ەرجان سادەنوۆكە جانە وقۋ-اعارتۋ ءمينيسترى عاني بەيسەمباەۆقا دەپۋتاتتىق ساۋال جولداپ، 16 جاسار ازاماتتى ولتىرگەن، جاقىندارىن اياۋسىز ساباعان قىلمىسكەرلەر قاماۋعا الىنىپ، ولارعا زاڭعا سايكەس ءادىل جازا بەرىلۋى ءتيىس دەپ ماسەلە كوتەردى. ال ونىڭ ارىپتەسى ابزال قۇسپان قىلمىستىق كودەكستىڭ 201-بابىن (سوتقا دەيىنگى تەرگەپ-تەكسەرۋ دەرەكتەرiن جاريا ەتۋگە جول بەرمەۋ) وزگەرتۋ كەرەك دەپ ەسەپتەيدى. بۇل قاجەتتىلىك ونىڭ سوزىنشە، تالعارداعى ءجاسوسپىرىمنىڭ ولىمىنەن كەيىن ايقىن سەزىلگەن.