كەزدەسۋگە ءوڭىردىڭ ىسكەر ورتاسى، مەملەكەتتىك ورگاندار مەن بيۋدجەتتىك ۇيىمداردىڭ قىزمەتكەرلەرى، سونداي-اق شوب پەن «اتامەكەن» ۇكپ وڭىرلىك فيليالىنىڭ وكىلدەرى قاتىستى.
ۆەدومستۆو باسشىسى ايتقانداي، اتالعان زاڭ ساتىپ الۋ پروتسەسىنىڭ راسىمدەرىن جەڭىلدەتىپ، مەملەكەت ەسەبىنەن ساتىپ الىناتىن تاۋارلاردىڭ، جۇمىستار مەن كورسەتىلەتىن قىزمەتتەردىڭ ساپاسىن ارتتىرۋمەن بىرگە ساتىپالىم قاتىسۋشىلارىنىڭ جاۋاپكەرشىلىگىن كۇشەيتىپ، باسەكەلەستىكتى دامىتۋعا باعىتتالعان.
«ايتالىق، زاڭنىڭ ءبىرىنشى ءبولىمى ساتىپ الۋ پروتسەدۋرالارىن جەڭىلدەتىپ، ونى قىسقارتۋدى كوزدەيدى. وسى ارقىلى ساتىپ الۋدى جەدەل جۇرگىزىپ، تاپسىرىس بەرۋشىلەرگە ۇلكەن وكىلەتتىكتەر بەرۋ، سونداي-اق ساتىپ الۋ راسىمدەرىنىڭ ۇزاققا سوزىلۋىنىڭ الدىن الۋ ماقساتىندا شاعىمداردى ەندى ساتىپالىمدى ۇيىمداستىرۋشىنىڭ ءوزى تىكەلەي قارايتىن بولادى. ساتىپ الۋ قورىتىندىلارىنا شاعىمدانۋ ۆەب-پورتال ارقىلى جانە كونكۋرستىق كوميسسيامەن ايقىندالعان جەڭىمپازدىڭ ساتىپ الۋلار بويىنشا عانا جۇزەگە اسىرىلادى»، - دەگەن ءمادي توكەشۇلى رەفورماداعى وزگە دە وزگەرىستەر تۋرالى ارىپتەستەرى جان-جاقتى ءتۇسىندىرىپ بەرەتىنىن جەتكىزدى.
قارجى ۆيتسە-ءمينيسترى داۋرەن كەڭبەيىلدىڭ ايتۋىنشا، اتالعان قۇجاتتاعى جاڭاشىلدىقتاردىڭ ءبىرى باسەكەلەستىكتى دامىتۋعا ارنالعان. ماسەلەن، مەملەكەتتىك ساتىپ الۋدىڭ بىرىڭعاي وپەراتورى – ەلەكتروندىق قارجى ورتالىعىنىڭ بازاسىندا بىرىڭعاي ساتىپ الۋ پلاتفورماسى زاڭنامالىق تۇردە ەنگىزىلىپ وتىر. بۇل ارقىلى مەملەكەتتىك ءارى كۆازيمەملەكەتتىك سەكتور سۋبەكتىلەرىنىڭ ساتىپ الۋلارىنىڭ ەلەكتروندى قىزمەتتەرىنىڭ قولجەتىمدىلىگى ارتا تۇسەدى.
«قازىردىڭ وزىندە «ەلەكتروندىق مەملەكەتتىك ساتىپ الۋ» اقپارات جۇيەسىندە ناقتى ۋاقىت رەجىمىندە ساتىپ الۋ راسىمدەرىن وتكىزۋ تۋرالى اقپارات، جەتكىزۋشىلەر مەن جاسالعان كەلىسىمشارتتار، سول سەكىلدى ولاردى ورىنداۋ ناتيجەلەرى تۋرالى مالىمەتتەر جاريالانىپ كەلەدى. بىلتىر وسى جۇيەدە 602 مىڭ الەۋەتتى ءونىم بەرۋشىگە ارنالعان 1,7 ملن حابارلاندىرۋ ورنالاستىرىلدى. بارلىعى 1,8 ملن كەلىسىمشارت جاسالىپ، وتكىزىلگەن مەملەكەتتىك ساتىپ الۋدىڭ قاراجات كولەمى 6,6 ترلن تەڭگە بولدى»، - دەدى داۋرەن ماراتۇلى.
بۇدان بولەك تەندەرلەردى وتكىزۋ مەرزىمى 2 ايدان 10 جۇمىس كۇنىنە دەيىن قىسقارتىلدى. سونىمەن قاتار مەملەكەتتىك ساتىپ الۋ ناتيجەلەرىنە شاعىمدانۋ ءتارتىبى قايتا قارالىپ، جەڭىلدەي تۇسەدى. مەملەكەتتىك مەكەمەلەرگە مەملەكەت ەسەبىنەن الىناتىن تاۋارلاردى، جۇمىستار مەن كورسەتىلەتىن قىزمەتتەردى 100 ايلىق ەسەپتىك كورسەتكىشتەن (اەك) 500 اەك-كە دەيىن، ال اۋىلدىق وكرۋگتەر ءۇشىن كونكۋرستىق راسىمدەردى وتكىزبەستەن ءبىر ءونىم بەرۋشىدەن 4000 اەك-كە دەيىن (مەملەكەت ەسەبىنەن تاۋارلاردى، جۇمىستار مەن كورسەتىلەتىن قىزمەتتەردى) ساتىپ الۋ مۇمكىندىگى ەنگىزىلدى.
«بۇل وڭىرلەردەگى جەكەلەگەن ماسەلەلەردى جەدەل شەشۋگە مۇمكىندىك بەرەدى. جەرگىلىكتى وندىرۋشىلەردى قولداۋ ماقساتىندا جۇمىس ورىندالاتىن مەكەندە تىركەلگەن مەردىگەرلەر ءۇشىن شارتتى ديسكونت 1 پايىزدان 2 پايىزعا دەيىن ۇلعايتىلدى. بۇل شاعىن جانە ورتا بيزنەستى دامىتۋعا جانە قولداۋعا، سونداي-اق ءتيىستى وڭىرلەردە سالىق تۇسىمدەرىن ۇلعايتۋعا وڭ اسەر ەتەدى»، - دەدى قارجى ءمينيسترىنىڭ ورىنباسارى.
جيىننىڭ سوڭىندا جەرگىلىكتى تۇرعىندار كوكەيكەستى ساۋالدارىن جولداپ، ۆەدومستۆو وكىلدەرى قولدانىستاعى زاڭعا سۇيەنە وتىرىپ، تۇشىمدى جاۋاپ بەردى.