الماتى وبلىسىندا «سىبىس» كوركەم ءفيلمىنىڭ ءتۇسىرىلىمى باستالدى. جوبا قازاقستان رەسپۋبليكاسى مادەنيەت جانە اقپارات مينيسترلىگىنىڭ تاپسىرىسى بويىنشا جانە ۇلتتىق كينونى قولداۋ مەملەكەتتىك ورتالىعىنىڭ قولداۋىمەن جۇزەگە اسىرىلۋدا. ءتۇسىرىلىمنىڭ باستالۋىنا وراي وتكەن ءداستۇرلى «تارەلكە شاعۋ» راسىمىنە كينو ورتالىعىنىڭ باسشىلىعى مەن ءتۇسىرىلىم توبى قاتىستى.
فيلم — 2025 جىلعى پيتچينگتىڭ جەڭىمپازى. جوبا جاس رەجيسسەر تەلجان نۇرماحاننىڭ دەبيۋتتىك جۇمىسى بولسا، پروديۋسەرى — مەملەكەتتىك قولداۋمەن تۇسىرىلگەن فيلمدەر اراسىندا وتكەن جىلدىڭ پروكات رەكوردسمەنى اتانعان «Qaitadan» تۋىندىسىمەن تانىلعان جالىن تىلەۋبەرگەن.
«ءفيلمنىڭ شىعارماشىلىق توبى جاس ءارى تالانتتى مامانداردان قۇرالعان. تۋىندى قوعامداعى وزەكتى الەۋمەتتىك ماسەلەلەردى كوتەرىپ، كوپشىلىككە جاقىن تاقىرىپتاردى قوزعايدى ءارى ءومىر شىندىعىنا نەگىزدەلگەن. جوبا مەملەكەتتىك قارجى ەسەبىنەن جۇزەگە اسىرىلىپ جاتقاندىقتان، ونىڭ ساپاسى مەن مازمۇنىنا ەرەكشە ءمان بەرىلەدى. ءتۇسىرىلىم توبى جۇمىسقا تولىق دايىن»، — دەپ اتاپ ءوتتى ۇلتتىق كينونى قولداۋ مەملەكەتتىك ورتالىعىنىڭ باسقارما توراعاسى قۇرمانبەك جۇماعالي.
«سىبىس» — ءسوزدىڭ قۇدىرەتىن اشاتىن تۋىندى: ءبىر اۋىز ابايسىز ايتىلعان ءسوز تاعدىرلاردى وزگەرتۋى مۇمكىن. اۋەلدە جەڭىل ءوربيتىن وقيعا بىرتىندەپ تەرەڭ دراماعا ۇلاسىپ، ۇلىن قورعاۋعا تىرىسقان اكەنىڭ ءوز ۇستانىمدارىنىڭ قۇربانىنا اينالۋىن بەينەلەيدى.
ايتا كەتەيىك، فيلمگە 2025 جىلى كينو ورتالىعى ۇيىمداستىرعان «JARQYRA» رەسپۋبليكالىق كاستينگىنىڭ ناتيجەسىندە ىرىكتەلگەن اكتەرلەر قاتىسۋدا. كاستينگ ەلىمىزدىڭ 19 قالاسىندا ءبىر مەزگىلدە ءوتىپ، وعان مىڭنان استام جاس تالانت قاتىستى. ىرىكتەۋدەن وتكەن ۇزدىك قاتىسۋشىلار كينو ورتالىعىنىڭ رەسمي اكتەرلىك بازاسىنا ەنگىزىلىپ، بۇگىندە جاڭا جوبالارعا بەلسەندى تۇردە تارتىلۋدا. بۇل جاس ونەرپازدارعا كاسىبي تۇرعىدا دامىپ، ەلىمىزدىڭ ماڭىزدى كينوتۋىندىلارىنا قاتىسۋعا مۇمكىندىك بەرەدى.