دروپپەرلەر ينتەرنەت-الاياقتىقتىڭ نەگىزگى بۋىنى بولىپ تابىلادى، ويتكەنى ولار ۇرلانعان قاراجاتتى شىعارۋ مەن زاڭداستىرۋعا جاعداي جاسايدى: سوڭعى بەس ايدىڭ وزىندە ولاردىڭ كومەگىمەن الاياقتار ازاماتتاردان جىمقىرىلعان شامامەن 400 ملن تەڭگەنى قولما-قول اقشاعا اينالدىرعان.
دروپپەرلىك ءۇشىن قىلمىستىق جاۋاپتىلىق ەنگىزىلگەن ۋاقىتتان باستاپ (16.09.2025ج. باستاپ) قازاقستان رەسپۋبليكاسى قىلمىستىق كودەكسىنىڭ 232-1-بابى بويىنشا 700-دەن استام قىلمىستىق ءىس تىركەلدى.
اتالعان باپ بويىنشا بانك شوتتارىن زاڭسىز بەرگەنى نەمەسە باسقا تۇلعالاردىڭ مۇددەسى ءۇشىن اقشا اۋدارىمدارىن جاساعانى ءۇشىن 7 جىلعا دەيىن باس بوستاندىعىنان ايىرۋ جازاسى كوزدەلگەن.
وسى ۋاقىت ىشىندە 216 دروپپەر جاۋاپتىلىققا تارتىلىپ، ونىڭ 202-ءسى سوت ۇكىمىمەن سوتتالدى.
مىسالى، باتىس قازاقستان وبلىسىندا سوت 19 جاستاعى 7 كوللەدج ستۋدەنتىن 3 جىلعا باس بوستاندىعىنان شەكتەدى. ولار بانك شوتتارىن اشىپ، قولجەتىمدىلىكتى الاياقتارعا بەرگەن.
وسى شوتتار ارقىلى ازاماتتاردان، ونىڭ ىشىندە زەينەتكەرلەردەن دە جىمقىرىلعان 4 ميلليون تەڭگەدەن استام اقشا وتكەن.
ەندى ولار سوت بەلگىلەگەن شەكتەۋلەردى ساقتاۋعا، ءماجبۇرلى ەڭبەككە تارتىلۋعا جانە پروباتسيا قىزمەتىنىڭ ەسەبىندە تۇرۋعا مىندەتتى.
ەگەر بۇل تالاپتار ورىندالماسا، جازا باس بوستاندىعىنان ايىرۋعا اۋىستىرىلىپ، ولار تۇزەۋ مەكەمەسىنە جىبەرىلەدى.
قىلمىستىق جاۋاپتىلىقتان بولەك، دروپپەرلەرگە بانك تاراپىنان شەكتەۋلەر قويۋ، شوتتاردى بۇعاتتاۋ جانە وزگە دە قارجىلىق ىقپال ەتۋ شارالارى قولدانىلادى.
وسىنداي تاۋەكەلدەر «استانا» حالىقارالىق قارجى ورتالىعىندا ليتسەنزياسى جوق كريپتوبيرجالاردا تسيفرلىق اكتيۆتەرمەن ساۋدا جاساۋ كەزىندە دە تۋىندايدى.
نەگىزىندە، وسىنداي الاڭدار ارقىلى الاياقتار قىلمىستىق جولمەن الىنعان كىرىستەردى زاڭداستىرادى.
ەگەر بۇرىن ءوز شوتتارىڭىزدى ءۇشىنشى تۇلعالارعا پايدالانۋعا بەرگەن بولساڭىز، قۇقىققا قايشى سحەمالارعا تارتىلۋ قاۋپىن بولدىرماۋ ءۇشىن دەرەۋ بانك بولىمشەسىنە جۇگىنىڭىز نەمەسە ونلاين-بانكينگ ارقىلى كارتاڭىزدى ءوزىڭىز بۇعاتتاڭىز.
قازاقستان رەسپۋبليكاسى قىلمىستىق كودەكسىنىڭ 232-1-بابىنىڭ ەسكەرتپەسىنە سايكەس، قۇقىققا قايشى سحەماعا تارتىلعان، بىراق بۇل تۋرالى ۋاكىلەتتى ورگاندارعا ءوز ەركىمەن حابارلاپ، قىلمىستى اشۋعا بەلسەندى تۇردە كومەكتەسكەن تۇلعا قىلمىستىق جاۋاپتىلىقتان بوساتىلادى.
الاياقتاردىڭ قۇرالىنا اينالماڭىز.
باس پروكۋراتۋرانىڭ ءباسپاسوز قىزمەتى