ايتۋلى كۇنگە وراي Ras.kz قازاقپاراتقا سىلتەمە جاساپ، بۇگىنگى ءاليا مەن مانشۇك مۇراتقىزى تۋرالى اقپاراتتى نازارىڭىزعا ۇسىنادى.
جەتىسۋ وبلىسى الاكول اۋدانى ءۇشارال قالاسىندا تۋىپ-وسكەن ەگىز قىز – قازىرگى تاڭدا كەڭەس وداعىنىڭ ەكى مارتە باتىرى تالعات بيگەلدينوۆ اتىنداعى اۋە قورعانىسى كۇشتەرى اسكەري ينستيتۋتىنىڭ 1 كۋرس كۋرسانتتارى. ولار اسكەري مەديتسينا ماماندىعىن مەڭگەرىپ جاتىر.
«ءبىز بۇل ماماندىققا ءوز تاڭداۋىمىزبەن، قالاۋىمىزبەن تۇستىك. جالپى اسكەري ماماندىققا بالا كۇنىمىزدەن قىزىقتىق، وعان سەبەپ اتامىز ەكىنشى دۇنيەجۇزىلىك سوعىس ارداگەرى، ال اكەمىز اسكەري ادام. ءبىراز جوعارى وقۋ ورىندارىن قاراپ، ويلانا كەلە، باتىر قىزدار جولىمەن اسكەري مەديتسينا ماماندىعىن تاڭدادىق. اسكەري قىزمەتشىلەر وقۋ-جاتتىعۋ جانە باسقا اسكەري مىندەتتەردى ورىندايدى، ولاردىڭ ماقساتى – قاشاندا ەلدى قورعاۋعا دايىن بولۋ. وسىلايشا، ەلىمىزدىڭ باتىر قىزدارىنىڭ جولىن بەرسىن دەپ وسى سالانى مەڭگەرۋدى ۇيعاردىق»، - دەدى ءاليا مۇراتقىزى قازاقپارات تىلشىسىنە.
ءاليا مەن مانشۇكتىڭ اسكەري مەديتسينانى تاڭداۋىن اتا-اناسى قولداپ، جەتىسۋ وڭىرىنەن اقتوبەگە وقۋعا جىبەرگەن.
سونداي-اق، جەتىسۋلىق ەگىز ەسىمدەرىن كىم قويعانىن جانە نە ءۇشىن قويعانىن ايتىپ بەردى.
«ءبىزدىڭ ەسىمدى انامنىڭ ءسىڭلىسى ءارى كىندىك انامىز قويدى. ارينە، الدىمەن ىرىمداپ ءاليا مەن مانشىكتەي ەلىم دەيتىن ەرجۇرەك باتىر قىزدار بولسىن دەگەن نيەتپەن قويعان. ەكىنشى قىزىقتى جاعداي، ءبىز ەگىز بولساق تا ءبىر-بىرىمىزگە ۇقسامايمىز، سوندىقتان قازاقتىڭ قوس باتىر قىزىنىڭ ەسىمىن تاڭداعان»، - دەيدى مانشۇك مۇراتقىزى.
ايتا كەتسەك، 2025 جىلى قازاقتىڭ باتىر قىزى ءاليا مولداعۇلوۆانىڭ تۋعانىنا 100 جىل تولادى.
بۇعان دەيىن قازاقستاندىق كينوگەرلەر قازاقتىڭ قاھارمان قىزى ءاليا مولداعۇلوۆا تۋرالى «ءاليا» اتتى جاڭا كوركەم ءفيلمدى تۇسىرۋگە دايىندالىپ جاتقانىن حابارلاعان ەدىك.
ءا. مولداعۇلوۆانىڭ 100 جىلدىعىنا جانە جەڭىستىڭ 80 جىلدىعىنا ارنالعان «ءاليا» تولىقمەتراجدى كوركەم ءفيلمى 2025 جىلدىڭ مامىر ايىندا جارىققا شىعادى.