قىزىلوردا وبلىسىنىڭ اكىمى مۇرات ەرگەشباەۆ جاڭاقورعان اۋدانىنا جۇمىس ساپارى كەزىندە «بەكارىس-اگروفۋد» جشس اسىلتۇقىمدى مال شارۋاشىلىعىنىڭ جۇمىسىمەن تانىستى.
سەرىكتەستىك نەگىزىنەن مال جانە ەگىن شارۋاشىلىعىمەن اينالىسادى. قازىرگى ۋاقىتتا 10 ادام تۇراقتى جۇمىسپەن قامتىلعان، 1 000 باسقا ارنالعان بورداقىلاۋ الاڭى جانە تاۋلىگىنە 10 باس مال سوياتىن پۋنكت بار.
بۇگىندە شارۋاشىلىقتا 864 باس ءىرى قارا، 300 باس جىلقى، 4 077 باس قوي، 211 باس تۇيە جانە 668 باس اسىلتۇقىمدى ءىرى قارا وسىرىلۋدە.
سونىمەن قاتار 1 500 گەكتار جايىلىمدىق جانە 300 گەكتار سۋارمالى جەرگە يەلىك ەتەدى. بيىل شارۋالار 67 گەكتارعا كۇرىش، 50 گەكتارعا كۇزدىك بيداي جانە 50 گەكتارعا جوڭىشقا ەكتى.
ايماق باسشىسى شارۋاشىلىقتىڭ وندىرىستىك الەۋەتىمەن تانىسىپ، جاۋاپتى سالا باسشىلارىنا ناقتى تاپسىرمالار جۇكتەدى.
جاڭاقورعان – اۋىل شارۋاشىلىعى قارقىندى دامىپ كەلە جاتقان اۋدانداردىڭ ءبىرى. بيىل ديقاندار 36 077 گەكتار جەرگە ەگىن ەكسە، ونىڭ 6 756 گەكتارى كۇرىش.
جىل باسىنان بەرى سالادا وندىرىلگەن جالپى ءونىم كولەمى 7 ملرد 427 ملن تەڭگەگە جەتىپ، وتكەن جىلدىڭ سايكەس كەزەڭىمەن سالىستىرعاندا 105,5 پايىز بولدى.
ەگىس القاپتارىن ءارتاراپتاندىرۋ ماقساتىندا كۇرىش كولەمى 600 گەكتارعا قىسقارتىلىپ، سۋ ۇنەمدەۋ تەحنولوگيالارىن قولدانۋ ارقىلى 2 370 گەكتار جەرگە باسقا دا داقىلدار ەگىلدى.
مال شارۋاشىلىعىندا دا وڭ كورسەتكىشتەر بار. جىل باسىنان بەرى 4 236,5 توننا ەت، 3 769,6 توننا ءسۇت جانە 917,1 مىڭ دانا جۇمىرتقا ءوندىرىلدى.
قازىر اۋداندا 75 مىڭنان استام ءىرى قارا، 286 079 باس قوي، 29 470 باس جىلقى، 2 098 باس تۇيە جانە 18 411 باس قۇس وسىرىلۋدە.
قىزىلوردا وبلىسى اكىمىنىڭ ءباسپاسوز قىزمەتى