ۇستازدار كۇنىنە وراي استانا قالاسى ءبىلىم باسقارماسىنىڭ ۇيىمداستىرۋىمەن «ۇستازدان ۇلاعات – ۇرپاققا امانات» تاربيەلىك بەينەروليكتەر بايقاۋى ءوتتى، دەپ حابارلايدى ەلوردا اكىمدىگىنىڭ رەسمي سايتى.
بايقاۋدىڭ نەگىزگى ماقساتى – «ادال ازامات» باعدارلاماسىنىڭ قۇندىلىقتارىن ناسيحاتتاۋ، ارداگەر ۇستازداردىڭ ونەگەلى جولىن دارىپتەۋ جانە اعا بۋىن مەن جاس ديرەكتورلار اراسىنداعى ساباقتاستىقتى نىعايتۋ.
بايقاۋعا ەلوردانىڭ 6 اۋدانىنان مەكتەپكە دەيىنگى ۇيىمدار مەن جالپى ءبىلىم بەرەتىن مەكتەپتەر قاتىستى. ءار اۋداننان ارداگەر ۇستاز، جاس ديرەكتور، پەداگوگتەر مەن وقۋشىلاردان قۇرالعان شىعارماشىلىق توپتار 5-7 مينۋتتىق بەينەروليكتەر ۇسىندى. جۇمىستاردا ۇستاز ەڭبەگى، شاكىرت تاربيەسىندەگى پەداگوگتىڭ ءرولى جانە ۇرپاقتار ساباقتاستىعى كورىنىس تاپتى.
ءىس-شارانىڭ اشىلۋىندا استانا قالاسى ءبىلىم باسقارماسىنىڭ باسشىسى قاسىمحان سەنعازىەۆ ارداگەر ۇستازداردى قۇتتىقتاپ، ولاردىڭ ءبىلىم بەرۋ سالاسىنا قوسقان ۇلەسىن اتاپ ءوتتى.
بەينەروليكتەردە ادالدىق، ەڭبەكقورلىق، جاۋاپكەرشىلىك، وتانشىلدىق پەن بىرلىك قۇندىلىقتارىنا ەرەكشە ءمان بەرىلدى. سونىمەن قاتار ارداگەر ۇستازداردىڭ كاسىبي جولى، ومىرلىك ۇستانىمى جانە كەيىنگى بۋىنعا بەرگەن تاعىلىمى كورسەتىلدى.
«ۇستاز ونەگەسى – ادال ازامات تاربيەسىنىڭ باستاۋى!» يدەياسىن ارقاۋ ەتكەن بايقاۋ جۇمىستارى تاربيەلىك ءمانى، «ادال ازامات» قۇندىلىقتارىنىڭ اشىلۋى، ۇرپاق ساباقتاستىعى، شىعارماشىلىق يدەياسى، بەينەروليك ساپاسى جانە كورەرمەنگە اسەرى بويىنشا باعالاندى.
بايقاۋ قورىتىندىسى بويىنشا:
– باس جۇلدە – سماعۇل سادۋاقاسۇلى اتىنداعى №78 مەكتەپ-گيمنازياسى;
– I ورىن – №119 جالپى ورتا ءبىلىم بەرەتىن مەكتەبى;
– II ورىن – №35 «ەرتەگى» بالاباقشاسى;
– III ورىن – №56 مەكتەپ-ليتسەيى.
جەڭىمپازدار ديپلومدارمەن جانە سىيلىقتارمەن ماراپاتتالدى.
بايقاۋ اعا بۋىننىڭ تاجىريبەسىن دارىپتەپ قانا قويماي، ۇستازدىق ءداستۇردىڭ ساباقتاستىعىن كورسەتۋگە جانە جاس پەداگوگتەرگە ونەگە بولارلىق تۇلعالاردىڭ ەڭبەك جولىن ناسيحاتتاۋعا مۇمكىندىك بەردى.