شاعىن ونەركاسىپتىك پاركتەر الماتىنىڭ ونەركاسىپتىك ساياساتىندا ماڭىزدى ورىن الىپ، شاعىن جانە ورتا وندىرىستىك بيزنەستى قولدايتىن ءتيىمدى تەتىككە اينالدى. ءدال وسى فورمات قازىر كاسىپكەرلەرگە جاڭا ءوندىرىستى جىلدام ىسكە قوسىپ، شىعىندى ازايتىپ، وتاندىق ءوندىرىستى دامىتۋعا جول اشىپ وتىر.
الماتى قالاسىنىڭ وڭىرلىك كوممۋنيكاتسيالار قىزمەتىندەگى بريفينگتە يندۋستريالىق ايماق ديرەكتورى ەرلان جايلاۋباي وسىلاي دەپ مالىمدەدى.
ونىڭ ايتۋىنشا، كادىمگى وندىرىستىك نىسان سالۋمەن سالىستىرعاندا، شاعىن ونەركاسىپتىك پارك كاسىپكەرلەرگە دايىن عيمارات پەن ينجەنەرلىك ينفراقۇرىلىم ۇسىنادى. مۇنداي ءتاسىل جوبالاردى جۇزەگە اسىراتىن ۋاقىتتى ەداۋىر قىسقارتىپ، كاسىپكەرگە ءونىم ءوندىرىپ، زاماندىق تەحنولوگيا ەنگىزىپ، وتكىزۋ نارىعىن كەڭەيتۋگە كوبىرەك كوڭىل بولۋگە مۇمكىندىك بەرەدى.
«شاعىن ونەركاسىپتىك پاركتەر شاعىن جانە ورتا وندىرىستىك بيزنەستى دامىتۋعا قولايلى جاعداي جاسايتىن ونەركاسىپتىك ەكوجۇيەنى قالىپتاستىرادى»، — دەدى يندۋستريالىق ايماقتىڭ ديرەكتورى ەرلان جايلاۋباي.
الماتىدا جالپى اۋدان شامامەن 95 مىڭ شارشى مەتر بولاتىن 23 شاعىن ونەركاسىپتىك پارك جۇمىس ىستەيدى. ولاردىڭ اۋماعىندا ءارتۇرلى سالانى قامتيتىن 101 شاعىن جانە ورتا كاسىپورىن قىزمەت اتقارىپ جاتىر.
قالادا قۇنى 46,9 ملرد تەڭگە بولاتىن 67 شاعىن ونەركاسىپتىك پارك جوباسى جۇزەگە اسىپ جاتىر. جيىنتىق اۋماعى 388,2 مىڭ شارشى مەتر بولاتىن ولاردى ىسكە اسىرعاندا 6 564 جاڭا جۇمىس ورنى اشىلماق.
جاڭا الاڭنىڭ كوبى يندۋستريالىق ايماقتىڭ اۋماعىندا ورنالاسقان. مۇندا 63 جوبا جۇزەگە اسىپ جاتىر، ولارعا جالپى 68 گەكتارعا جۋىق جەر بولىنگەن.
بۇل جوبالارعا جالپى شامامەن 46 ملرد تەڭگە ينۆەستيتسيا سالىنادى. بولاشاق وندىرىستىك عيماراتتاردىڭ اۋدانى 373 مىڭ شارشى مەتردەن اسسا، قۇرىلاتىن جۇمىس ورنىنىڭ سانى دا 6 مىڭنان اسىپ جىعىلادى.
ەرلان جايلاۋبايدىڭ ايتۋىنشا، كاسىپكەرلەردىڭ شاعىن ونەركاسىپتىك پاركتەردى تاڭداۋى بۇل فورماتتىڭ ءوندىرىستى دامىتۋداعى سۇرانىسىن دالەلدەيدى.
ساراپشىلاردىڭ پىكىرىنشە، مۇنداي الاڭدار زاماندىق ونەركاسىپتىك ينفراقۇرىلىمنىڭ ماڭىزدى ەلەمەنتىنە اينالىپ بارادى. ولار ءوندىرىس اشۋعا كەتەتىن قارجىلىق كەدەرگىنى ازايتادى، شاعىن جانە ورتا بيزنەستىڭ دامۋىن جەدەلدەتەدى، يننوۆاتسيالاردى ەنگىزىپ، جاڭا وندىرىستىك تىزبەكتى قالىپتاستىرۋعا ىقپال ەتەدى.
سونىمەن قاتار، شاعىن ونەركاسىپتىك پاركتەردىڭ دامۋى قالا ەكونوميكاسىنا مۋلتيپليكاتيۆتى اسەر بەرەدى: جاڭا جۇمىس ورىندارى اشىلادى، سالىق ءتۇسىمى ارتادى، وندىرىستىك كووپەراتسيا دامىپ، وتاندىق ءونىم ۇلەسى وسەدى.
وسىلايشا، ءىرى ونەركاسىپتىك كاسىپورىندارمەن قاتار شاعىن ونەركاسىپتىك پاركتەر دە الماتىنىڭ ونەركاسىپتىك الەۋەتىنىڭ نەگىزگى ءوسۋ نۇكتەسىنىڭ بىرىنە اينالىپ، كاسىپكەرلىكتى دامىتۋعا جانە قالا ەكونوميكاسىن نىعايتۋعا قولايلى جاعداي قالىپتاستىرىپ وتىر.
الماتى قالاسىنىڭ اكىمدىگى