Premer-ministr Oljas Bektenovtıŋ töraǧalyǧymen Ükımet otyrysynda Memleket basşysynyŋ energetikalyq infraqūrylymdy jaŋǧyrtu jönındegı tapsyrmasyn oryndau şeŋberınde ötken jylytu mausymynyŋ qorytyndysy men aldaǧy jylu beru mausymyna daiyndyq barysy qaraldy. Jiynda energetika vise-ministrı Sūŋǧat Esımhanov, KEGOC kompaniiasynyŋ basqarma töraǧasy Näbi Aitjanov, «Samūryq-Energo» kompaniiasynyŋ basqarma töraǧasy Qairat Maqsūtov, sondai-aq Qaraǧandy, Maŋǧystau, Batys Qazaqstan jäne Jambyl oblystarynyŋ äkımderı baiandama jasady. Näbi Aitjanov ötken küzgı-qysqy kezeŋnıŋ qorytyndylary jäne aldaǧy 2026-2027 jyldarǧa daiyndyq turaly aitty.
«Ötken küzgı-qysqy kezeŋde Qazaqstannyŋ Bırtūtas elektr energetikalyq jüiesınıŋ tūtynu maksimumy 2025 jylǧy 18 jeltoqsanda tırkelıp, 17 724 MVt-ty qūrady. 2024-2025 jyldardaǧy küzgı-qysqy kezeŋmen salystyrǧanda jükteme maksimumy 3%-ǧa ösıp, 521 MVt boldy. 2025 jyly elektr energiiasyn tūtynu 2024 jylmen salystyrǧanda 4,6 mlrd kVt/saǧatqa nemese 3,8%-ǧa artyp, 124,6 mlrd kVt/saǧatty qūrady. 2025–2026 jyldardaǧy küzgı-qysqy kezeŋde elektr energiiasyn tūtynu kölemı aldyŋǧy kezeŋmen salystyrǧanda 1,6 mlrd kVt/saǧatqa, iaǧni 2,4%-ǧa ösıp, 66,9 mlrd kVt/saǧatqa jettı. 2025 jyly elektr energiiasyn öndıru 5,2 mlrd kVt/saǧatqa nemese 4,4%-ǧa artyp, 123,1 mlrd kVt/saǧatty qūrady. 2025-2025 jyldardyŋ küzgı-qysqy kezeŋınde ötken jyldyŋ osyndai kezeŋımen salystyrǧanda 2,3 mlrd kVt/saǧatqa nemese 3,5-ǧa ösıp, 66,9 mlrd kVt/saǧat boldy», — dedı ol.
2026 jylǧy 1 qaŋtarda elektr stansalarynyŋ jalpy belgılengen quaty – 26,8 GVt, onyŋ ışınde: 51%-y – kömırmen jūmys ısteitın jylu elektr stansalary, 26%-y – gazben jäne mazutpen jūmys ısteitın jylu elektr stansalary, 9%-y - gidroelektr stansalary, 14%-y – jaŋartylatyn energiia közderı, onyŋ ışınde:
8%-y - jel elektr stansalary,
5%-y – kün elektr stansalary,
1%-y – şaǧyn gidro elektr stansalary.
2025 jyly Qazaqstan Respublikasynda jaŋa generasiiany ıske qosu kölemı 1577,8 MVt-ty qūrady. Onyŋ ışınde:
jylu elektr stansalary – 870,1 MVt,
jaŋartylatyn energiia közderı – 707,7 MVt.
2025 jyly elektr energiiasyn öndırudı negızınen jylu elektr stansalary qamtamasyz etıp, ol 74% boldy. Gazturbinalyq elektr stansalary 11%, dästürlı gidro elektr stansalary – 8% jäne jaŋartylatyn energiia közderınıŋ elektr stansalary – 7% kölemınde elektr energiiasyn öndırdı.
Paidalanuǧa berılgenıne 30 jyldan asqan generasiialaityn jabdyqtardyŋ ülesı - 45%. Jabdyqtardyŋ jaŋaryp kele jatqanyn baiqauǧa bolady - ötken jylmen salystyrǧanda eskırgen jabdyqtar 3%-ǧa azaidy.
«Soŋǧy 5 jyldaǧy jaŋartylatyn energiia közderı obektılerınıŋ öndıru qūrylymy turaly aitsaq, 2021 jyldan bastap jaŋartylatyn energiia közderınıŋ belgılengen quaty 1700 MVt-tan 3700 MVt-qa deiın artty. Jyl basynda energiia jüiesınde jaŋartylatyn energiia közderınıŋ 170 elektr stansasy jūmys ıstedı. 2025 jyly elımızde jalpy öndırılgen elektr energiiasyndaǧy jaŋartylatyn energiia közderınıŋ öndıru kölemı 8,7 mlrd kVt/saǧatty nemese 7%-dy qūrady. 2026-2027 jyldardaǧy küzgı-qysqy kezeŋde maksimaldy tūtynu kölemınıŋ deŋgeiı 18,2 GVt bolady dep kütılude», — dedı KEGOC kompaniiasynyŋ basqarma töraǧasy Näbi Aitjanov.
Onyŋ aituynşa,aldaǧy küzgı-qysqy kezeŋnen tiımdı ötu üşın bloktyq stansalar kelesı rejimde jūmys ısteuı qajet. Olar:
Ekıbastūz GRES-1 - 8 blok;
Ekıbastūz GRES-2 - 2 blok;
«EEK» aksionerlık qoǧamy – 7 blok;
Jambyl GRES-ı - 4 blok.
Sonymen qatar:
- josparlanǧan quatty ıske qosudy qamtamasyz etu qajet;
- Jüielık operatormen kelısılgen merzımde negızgı generasiialaityn jäne elektr jelılık jabdyqtardy jöndeudı jospar boiynşa oryndau qajet;
- jylu elektr stansalaryndaǧy kömırdıŋ normativtık qorlaryn qamatamasyz etıp, gaz elektr stansalary üşın gazdy üzdıksız jetkızudı qamtamasyz etu qajet;
- Jambyl GRES-ın jetkılıktı kölemde otynmen, salqyndatqyş sumen qamtamasyz etu mäselelerın aldyn ala şeşu qajet.
Jyl saiyn elektr jelılık obektılerdı küzgı-qysqy kezeŋnen tiımdı ötuge daiyndau üşın bızdıŋ kompaniia aitarlyqtai kölemde jöndeu jūmystaryn josparlap, uaqytyly oryndauda. 2025 jyly 577 obektıde jöndeu jūmystary josparlandy. Jöndeu nauqany tiımdı aiaqtalyp, jūmystar jospardan 18%-ǧa artyq jürgızıldı. Ötkızılgen ıs-şaralardyŋ nätijesınde 2025 jylǧy 3 qazanda Kompaniia küzgı-qysqy kezeŋdegı jūmysqa daiyndyq pasportyn aldy.
2026 jyly 589 obektıde jöndeu jūmystaryn jürgızu josparlanyp otyr. Jöndeu jūmystary säuırde bastaldy. Qazırgı uaqytta 45 avtokölık jäne 5 elektr jetkızu jelısı jöndeuden öttı.
«KEGOC kompaniiasynyŋ investisiialyq baǧdarlamasyn jüzege asyru şeŋberınde 2025 jyly investisiialardy naqty igeru 99,5 mlrd teŋgenı qūrady, būl jyldyq jospardan 0,5%-ǧa artyq.
2026 jylǧa arnalǧan investisiialyq baǧdarlama şeŋberınde 182,4 mlrd teŋge mölşerınde investisiia josparlanǧan, onyŋ ışınde:
- 152 mlrd teŋge öndırıstık aktivterdı keŋeitu men damytuǧa baǧyttalǧan. Būl qarajat ekı ırı investisiialyq joba – «Qazaqstan BEJ-ınıŋ Oŋtüstık aimaǧynyŋ elektr jelısın küşeitu» jäne «Batys Qazaqstan energiia jüiesın Bıryŋǧai elektr energiia jüiesımen bırıktıru» jobalaryna közdeldı. Bügıngı künı jūmystar jospar boiynşa oryndaluda.
- Sonymen qatar, 30,1 mlrd teŋge öndırıstıŋ aǧymdaǧy deŋgeiın ūstap tūruǧa arnalǧan.
Soŋǧy 3 jylda investisiialyq baǧdarlamalar kölemı 5 eseden köp artty», — dedı ol.
Basqarma töraǧasynyŋ aituynşa, «Qazaqstan Bırtūtas elektr energetikalyq jüiesınıŋ Oŋtüstık aimaǧynyŋ elektr jelısın küşeitu» jobasy boiynşa barlyq jūmystar öndırıstık jūmys kestesıne säikes jürgızılude. Barlyq 3 qosalqy stansa boiynşa negızgı materialdar 100% jetkızıldı, onyŋ ışınde 95%-y naqty ornatyldy. Barlyq qosalqy stansalarda negızgı jäne kommutasiialyq jabdyqtar jetkızıldı Qazırgı uaqytta būl jabdyqtardy baptau jūmystary jüzege asuda.
«Şu – Jambyl» jäne «Jambyl – Şymkent» äue jelılerı boiynşa qūrylys alaŋdaryna materialdar jetkızılıp, qūrylys-montajdau jūmystary jürgızılude. Irgetastar men tırekterdı ornatu, symdardy montajdau jūmystary jürgızılude.
Joba jüzege asqannan keiın Almaty – Jambyl uchaskesınde jelınıŋ ötkızu qabıletı 1100 MVt-tan 1500 MVt-qa deiın artady. «Qazaqstannyŋ Batys aimaǧynyŋ energiia jüiesın Qazaqstan BEJ-ımen bırıktıru» jobasy boiynşa jūmystar josparǧa säikes jürgızılude.
Negızgı jäne kommutasiialyq jabdyq jetkızıldı, qosalqy stansasy boiynşa qūrylys jūmystary belgılengen kestemen jüzege asuda.
«Ölke – Qarabatan» äue jelısı boiynşa qazırgı uaqytta tırekterge arnalǧan ırgetastardy jetkızu jäne ornatu, äue jelısı trassasy boiynda aralyq metall tırekter ornatu jūmystary jalǧasuda. Joba Batys aimaqty respublika aumaǧy boiynşa Qazaqstan BEJ-ımen bırıktıru esebınen energiia täuelsızdıgın qamtamasyz etedı.
#Jylu beru mausymy #Prezidenttıŋ tapsyrmasy #Energetika #Qarjy