Bız bar aqşamyzdy EKSPO, LRT siiaqty bolmaityn jobalarǧa milliardtap tūryp şaşyp, onyŋ özın «jep» qūrtyp (aiaqsyz qaldyryp) jatqanymyzda, Özbekstan lider boluǧa şaq qaldy. Qazır olar Mazari-Şarif – Kabul – Peşavar baǧytynda temırjol saluǧa kırısıptı. Bır qalasynan bır qalasyna jüiıtkıp jatqan jaŋa poiyzdaryn aitpai-aq qoiaiyq. Özbekter ol jolmen Päkıstanǧa şyǧyp, odan ary Ündı mūhityndaǧy sauda porttaryna tabar tasuǧa mümkındık alǧaly otyr. Resei, AQŞ pen Qytai jaǧy jobany qoldauǧa älden daiyn ekenderın aitypty. Ortalyq Aziiadaǧy elderdı Oŋtüstık Aziianyŋ naryǧyna alyp şyǧatyn eŋ töte jol – osy jol. Oŋtüstık Aziiadaǧy elder de Ortalyq Aziiaǧa, TMD elderı men Evropaǧa jük tasuǧa ketetın uaqytty osy arqyly edäuır qysqartady. Būl joba tolyǧymen bıtkende, Päkıstannan Özbekstanǧa deiın 35 kün jürıp äreŋ jetetın tabardy 3-5 künde äkeluge bolady eken. Būl degenıŋ tabardyŋ qūnyna da äser etıp, tabardyŋ baǧasy da arzandaidy degen söz. Osy joldyŋ boiynan «Surhan – Puli-Humri» jäne CASA-1000 dep atalatyn joǧary voltty jelıler de salynbaqşy. Būl elektr jelısı Özbekstannan Auǧanstanǧa tasymaldaityn elektr quatyn 70 paiyzǧa deiın köbeituge mümkındık beredı. 150 mln dollar dep baǧalanyp otyrǧan jobanyŋ 118 millionyn auǧandar qarjylandyryp, «Mazari-Şarif-Kabul-Peşavar» temırjolyn olar 5-6 jylda salyp bıtırgelı otyr. Söitıp, 573 şaqyrym bolatyn magistral salyp, onymen jyl saiyn 20 mln tonna jük tasymaqşy. Özbekstan bır jaǧynan auǧan mäselesın de typ-tynyş şeşıp, körşılerın beibıt ömırge qarai beiımdep jatyr.
Foto aşyq derekközderden