2024 جىلدىڭ 18 جەلتوقسانىندا ادىلەت ورگاندارىنىڭ قىزمەتكەرلەرى «بەليزنا» تاۋار بەلگىسى يەسى وكىلىنىڭ ءوتىنىشى نەگىزىندە تۇرمىستىق حيميا ءوندىرىسى بويىنشا زاڭسىز جەراستى تسەحىن انىقتادى. اتالعان تسەح تۇركىستان وبلىسى كەلەس اۋدانى اباي اۋىلىنىڭ اۋماعىندا وزبەكستان رەسپۋبليكاسىمەن شەكارادان 50 كم جەردە جەكە ۇيدە ورنالاسقان.
جوسپاردان تىس تەكسەرۋ بارىسىندا «ك» جەكە كاسىپكەرىندە «بەليزنا» تاۋار بەلگىسىن زاڭسىز پايدالانۋ فاكتىسى انىقتالدى. زياتكەرلىك مەنشىك قۇقىقتارىن ورەسكەل بۇزا وتىرىپ دايىندالعان 1500 بىرلىكتەن استام جالعان ءونىم (جۋ جانە دەزينفەكتسيالاۋ قۇرالدارى) تاركىلەندى. قۇقىق يەسىنە كەلتىرىلگەن زالال 3 ميلليون تەڭگەدەن استى.
ايتا كەتۋ كەرەك، زاڭسىز جەراستى بيزنەسى وكىلدەرى كولەمى 800 ش.م. اساتىن ءۇي-جايدا جاپپاي زاڭسىز ءوندىرىس پەن ءونىمدى بۋىپ-ءتۇيۋدى جۇزەگە اسىرىپ، ونى قازاقستاننىڭ وڭتۇستىك وڭىرلەرىنىڭ كوتەرمە ساۋدا بازارلارىنا جەتكىزىپ وتىرعان. زاڭسىز ونىمدەر باعانىڭ تومەندىگىنە بايلانىستى تەز سۇرانىسقا يە بولعان. بىراق ءبىر ەسكەرتەتىن جايت ونىڭ جاسىرىن قاۋپى مىڭداعان ازاماتتاردىڭ دەنساۋلىعىنا قاۋىپ توندىرەتىنىن ايتا كەتكەن ءجون.
جالعان جۋعىش زاتتار ءونىمى قاۋىپسىزدىك ستاندارتتارىنا سايكەس كەلمەيتىن ارزان جانە ساپاسىز كومپونەنتتەردەن جاسالعان. مۇنداي ونىمدەردە تەرىنىڭ تىتىركەنۋىن، اللەرگيالىق رەاكتسيالاردى، تىنىس الۋ جولدارىنىڭ اۋرۋلارىن جانە ءتىپتى ۋلانۋدى تۋدىراتىن ۋلى زاتتار مەن اللەرگەندەر بولۋى مۇمكىن.
قازىرگى ۋاقىتتا كىنالىنى جاۋاپقا تارتۋ ماسەلەسى قاراستىرىلۋدا. ءىس ماتەريالدارى تۇركىستان وبلىسى ادىلەت دەپارتامەنتىنىڭ قاراۋىندا.
ادىلەت ورگاندارى ازاماتتار مەن زاڭدى بيزنەستىڭ مۇددەسى ءۇشىن زياتكەرلىك مەنشىك قۇقىقتارىنىڭ بۇزىلۋىن انىقتاۋ جانە قورعاۋ جونىندەگى جۇمىستارىن جالعاستىرادى. زاڭدى بيزنەستى قولداۋ وندىرۋشىلەردىڭ قۇقىقتارىن قورعاپ قانا قويماي، تۇتىنۋشىلارعا قاۋىپسىز جانە ساپالى تاۋارلارعا كەپىلدىك بەرەدى.