قۇقىق قورعاۋ جانە جەرگىلىكتى اتقارۋشى ورگانداردىڭ بىرلەسكەن جۇمىسىنىڭ ناتيجەسىندە وڭىردە قوعامدىق-ساياسي تۇراقتىلىق ساقتالىپ، قىلمىس دەڭگەيى وتكەن جىلدىڭ سايكەس كەزەڭىمەن سالىستىرعاندا 10 پايىزعا تومەندەگەن. پروفيلاكتيكالىق جۇمىستار كۇشەيتىلىپ، ەسەپتە تۇرعان 1500-دەن استام ازاماتپەن ءموبيلدى توپتار جۇمىس جۇرگىزگەن. سونىڭ ناتيجەسىندە اسا اۋىر قىلمىستار، ۇرلىق، مال ۇرلىعى، بۇزاقىلىق جانە قورقىتىپ الۋ دەرەكتەرى ايتارلىقتاي ازايعان. بۇل تۋرالى وڭىرلىك كوممۋنيكاتسيالار قىزمەتىنىڭ اقپارات الاڭىندا قىزىلوردا وبلىسىنىڭ پروكۋرورى ريزابەك وجاروۆ باياندادى.
"قىلمىستىڭ الدىن الۋ پروكۋراتۋرا قىزمەتىنىڭ نەگىزگى باسىمدىعى. ءبىز تەك قۇقىق بۇزۋشىلىقتى اشۋعا ەمەس، ونىڭ ورىن الۋىنا جول بەرمەۋگە باسىمدىق بەرىپ وتىرمىز. وسى باعىتتاعى كەشەندى شارالاردىڭ ناتيجەسىندە وڭىردەگى قىلمىستىق احۋال تۇراقتالىپ كەلەدى. پروكۋرورلار زاڭسىز شەشىمدەرگە جول بەرمەي، 38 پروتسەسسۋالدىق شەشىمدى كەلىسۋدەن باس تارتقان، 14 ازامات ۋاقىتشا ۇستاۋ يزولياتورىنان بوساتىلعان. تەرگەۋ ساپاسىن ارتتىرۋ ءۇشىن مىڭنان استام نۇسقاۋ بەرىلىپ، زاڭ بۇزۋشىلىقتارعا جول بەرگەن 310 قىزمەتكەر تارتىپتىك جاۋاپكەرشىلىككە تارتىلدى، – دەدى وبلىس پروكۋرورى ريزابەك كارىمۇلى.
سونىمەن قاتار وڭىردە تسيفرلىق تەحنولوگيالاردى ەنگىزۋ جۇمىستارى جالعاسۋدا. «IT TERGEU»، «سمارت براسلەت»، «كيبەرۆولونتەر»، «قىلمىسسىز ءوڭىر» جوبالارى ىسكە اسىرىلىپ، قىلمىستىق پروتسەستى تسيفرلاندىرۋعا ارنالعان «TERGEU PRO» جۇيەسىن ەنگىزۋ قولعا الىنعان.
پروكۋرور ينتەرنەت-الاياقتىققا قاتىستى زاڭنامالىق وزگەرىستەرگە دە توقتالدى. دروپەرلىك قىزمەت ءۇشىن قىلمىستىق جاۋاپكەرشىلىك ەنگىزىلگەننەن كەيىن وبلىستا 16 ادامعا قاتىستى ايىپتاۋ ۇكىمى شىققانىن ايتىپ، تۇرعىنداردى وزدەرىنىڭ بانكتىك دەرەكتەرىن بوگدە ادامدارعا بەرمەۋگە شاقىردى.
ەسەپتى كەزەڭدە پروكۋراتۋرا ورگاندارى 28 تەكسەرىس جۇرگىزىپ، 266 مىڭنان استام ازاماتتىڭ، 5700-دەن استام كاسىپكەردىڭ جانە 56 مىڭنان استام كامەلەتكە تولماعاننىڭ قۇقىقتارىن قورعاعان. «تازا قازاقستان» اكتسياسى اياسىندا زاڭسىز قوقىس ورىندارى جويىلىپ، قوعامدىق ورىنداردى لاستاعان ازاماتتار جاۋاپكەرشىلىككە تارتىلعان.
"پروكۋراتۋرانىڭ باستى مىندەتى زاڭ ۇستەمدىگىن قامتاماسىز ەتىپ، ءار ازاماتتىڭ قۇقىعىن قورعاۋ. الداعى ۋاقىتتا دا قوعامدىق قاۋىپسىزدىكتى نىعايتۋ، كاسىپكەرلەر مەن تۇرعىنداردىڭ قۇقىقتارىن قورعاۋ جانە قۇقىق بۇزۋشىلىقتىڭ الدىن الۋ باعىتىنداعى جۇمىستار جۇيەلى تۇردە جالعاسادى، – دەدى ريزابەك وجاروۆ.
سونداي-اق وبلىس پروكۋرورى تۇرعىنداردى پروكۋراتۋرا قۇزىرەتىنە قاتىستى ماسەلەلەر بويىنشا ءار اپتانىڭ سەيسەنبى كۇنى جەكە قابىلداۋعا دايىن ەكەنىن جەتكىزدى.
وڭىرلىك كوممۋنيكاتسيالار قىزمەتى