دەپارتامەنت ءوز قىزمەتىن قازاقستان رەسپۋبليكاسىنىڭ پرەمەر-ءمينيسترىنىڭ ورىنباسارى - ساۋدا جانە ينتەگراتسيا ءمينيسترى بەكىتكەن ەرەجەگە سايكەس اتقارىپ كەلەدى. ونىڭ نەگىزگى مىندەتتەرى – تۇتىنۋشىلاردىڭ قۇقىقتارىن قورعاۋ جانە ازىق-تۇلىك باعالارىنىڭ نەگىزسىز ءوسۋىن بولدىرماۋ.
2025 جىلدىڭ العاشقى ءۇش ايىندا دەپارتامەنت ەلەكتروندىق شوت-فاكتۋرالارعا تالداۋ جۇرگىزىپ، ارنايى قۇرىلعان كوميسسيانىڭ كومەگىمەن الەۋمەتتىك ماڭىزى بار ازىق-تۇلىكتەرگە ساۋدا ۇستەمەسىن زاڭسىز كوتەرگەن 53 كاسىپكەردى انىقتاپ، ولاردى اكىمشىلىك جاۋاپكەرشىلىككە تارتىپ، 235 920 تەڭگە ايىپپۇل سالدى. ەڭ كوپ بۇزۋشىلىقتار سۇزبە، كۇنباعىس مايى، سيىر ەتى جانە كارتوپ سياقتى تاۋارلارعا قاتىستى تىركەلدى.
بريفينگ بارىسىندا 2025 جىلعى 10 قاڭتاردا قر زاڭىنا ەنگىزىلگەن وزگەرىستەر تۋرالى دا ايتىلدى. بۇل وزگەرىستەرگە سايكەس، اكىمشىلىك قۇقىقبۇزۋشىلىق تۋرالى كودەكستىڭ 204-4-بابىنا جاڭا ايىپپۇل مولشەرلەرى ەنگىزىلدى. ەندى الەۋمەتتىك ماڭىزى بار تاۋارلارعا ساۋدا ۇستەمەسىن زاڭسىز ارتتىرعانى ءۇشىن ايىپپۇل مولشەرى مىناداي:
- جەكە تۇلعالار ءۇشىن – 5 اەك،
- شاعىن بيزنەس ءۇشىن – 35 اەك،
- ءىرى كاسىپكەرلەر ءۇشىن – 150 اەك-كە دەيىن.
ۇلىتاۋ وبلىسى اكىمدىگىنىڭ 2025 جىلعى 26 ناۋرىزداعى قاۋلىسىمەن 1 توقسانعا بولشەك ساۋداداعى شەكتى باعالار بەكىتىلدى:
- سيىر ەتى (سۇيەكتى جاۋىرىن-ءتوس بولىگى) – 3444 تەڭگە،
- كارتوپ – 294 تەڭگە،
- قىرىققابات – 246 تەڭگە.
بۇل شەكتى باعالاردان اسقان جاعدايدا كاسىپكەرلەرگە 100 اەك ايىپپۇل سالىنىپ، ەگەر بۇزۋشىلىق ءبىر جىل ىشىندە قايتالانسا، ايىپپۇل كولەمى 200 اەك-كە دەيىن جەتەدى.
بريفينگ سوڭىندا دەپارتامەنت وكىلدەرى تۇتىنۋشىلاردىڭ قۇقىقتارىن قورعاۋ، وتاندىق وندىرۋشىلەردى قولداۋ جانە ازىق-تۇلىك باعالارىنىڭ نەگىزسىز وسۋىنە جول بەرمەۋ باعىتىنداعى جۇمىستاردىڭ جالعاسا بەرەتىنىنە توقتالدى.