جيىندا سونداي-اق زورلىق-زومبىلىقتىڭ، بۋللينگتىڭ الدىن الۋ جانە بالالاردىڭ جازعى دەمالىسىن قاۋىپسىز ۇيىمداستىرۋ شارالارى قارالدى.
كەڭەس بارىسىندا بالالارعا قاتىستى قىلمىستاردىڭ الدىن الۋعا باعىتتالعان مەملەكەتتىك ورگاندار قابىلداپ جاتقان جۇيەلى شارالار تالقىلاندى. اسىرەسە، كامەلەتكە تولماعاندارعا قاتىستى سەكسۋالدىق سيپاتتاعى قىلمىستار ءۇشىن جاۋاپكەرشىلىكتى كۇشەيتۋگە، پروفيلاكتيكالىق جۇمىستى جانداندىرۋعا جانە بالالار اراسىندا قاۋىپسىز مىنەز-قۇلىق مادەنيەتىن قالىپتاستىرۋعا باعىتتالعان زاڭنامالىق ءارى ينستيتۋتسيونالدىق وزگەرىستەرگە باسا نازار اۋدارىلدى.
"اكىمدىكتەر بۇل جۇمىسقا بەلسەندى ارالاسۋى ءتيىس. اتا-انالارمەن جانە ۇستازدارمەن ءتۇسىندىرۋ جۇمىستارىن جۇرگىزىپ، مەكتەپ جانە مەديتسينا پسيحولوگتارىمەن تىعىز بايلانىس ورناتۋى قاجەت. سونىمەن قاتار جازعى ساۋىقتىرۋ ماۋسىمىنا دايىندىقتى ۇنەمى باقىلاۋدا ۇستاۋ كەرەك. بالالار قۇقىقتارى جونىندەگى ۋاكىلدەر ينستيتۋتىمەن جۇيەلى جۇمىس جۇرگىزۋ ماڭىزدى. ونىڭ قىزمەتى تەك ارەكەت ەتۋگە ەمەس، الدىن الۋعا دا باعىتتالۋى ءتيىس. ءبىز بالالاردىڭ ومىرىنە قاۋىپ تونۋىنە جول بەرە المايمىز، بارلىق ۋاكىلەتتى ورگاندار الدىن الا ارەكەت ەتۋى قاجەت", - دەدى ەرمەك كوشەرباەۆ.
بالالاردىڭ جازعى كەزەڭدەگى قاۋىپسىزدىگىن قامتاماسىز ەتۋ بويىنشا پروفيلاكتيكالىق شارالار اياسىندا كەشەندى جۇمىستار جۇزەگە اسىرىلۋدا. كامەلەتكە تولماعانداردىڭ جىنىستىق قول سۇعىلماۋشىلىعىنا قارسى قىلمىستار ءۇشىن قىلمىستىق جاۋاپكەرشىلىك كۇشەيتىلدى. بۋللينگ ءۇشىن جانە 16 جاسقا دەيىنگى بالالاردى قوعامدىق كولىكتەن كۇشتەپ ءتۇسىرۋ جاعدايلارىنا بايلانىستى اكىمشىلىك جاۋاپكەرشىلىك ەنگىزىلدى. 58 مىڭنان استام زاڭسىز ينتەرنەت-رەسۋرس، ونىڭ ىشىندە بالالاردى زاڭسىز ارەكەتتەرگە تارتۋ بەلگىلەرى بار 11 ارنا بۇعاتتالدى.
ء"اربىر ءتورتىنشى جول-كولىك وقيعاسى بالالاردىڭ قاتىسۋىمەن ورىن الادى. سوندىقتان ءبىز بالالاردى تاسىمالدايتىن بارلىق اۆتوبۋستاردى تەكسەرۋدى كۇشەيتتىك. قاجەت بولعان جاعدايدا پوليتسيا ءبىر اۆتوبۋستى دا جول بويى ىلەسىپ جۇرۋگە دايىن", - دەدى ىشكى ىستەر ءمينيسترىنىڭ ورىنباسارى يگور لەپەحا.
بالالاردىڭ جازعى دەمالىسىن قاۋىپسىز ۇيىمداستىرۋعا ەرەكشە كوڭىل ءبولىندى. اكىمدىكتەرگە بالالار وينايتىن سپورتتىق الاڭداردىڭ قاۋىپسىزدىگى، جاراقتاندىرىلۋى مەن جارامدىلىعى بويىنشا تەكسەرىس جۇرگىزۋ تاپسىرىلدى. اۋدان جانە اۋىل اكىمدەرى بۇل باعىتتا تىكەلەي جاۋاپتى بولادى. سونىمەن بىرگە پاتەر يەلەرىنىڭ كووپەراتيۆى (پيك) مەن مۇلىك يەلەرىنىڭ بىرلەستىگى (ميب) ارقىلى تۇرعىندارعا تەرەزەلەرگە ارنايى قورعانىس بەكىتكىشتەرىن ورناتۋ قاجەتتىگى ءتۇسىندىرىلۋى ءتيىس، بۇل بالالاردىڭ تەرەزەدەن قۇلاپ كەتۋ جاعدايلارىنىڭ الدىن الۋعا باعىتتالعان.
ەرمەك كوشەرباەۆ ەرەكشە ءبىلىم بەرۋ قاجەتتىلىكتەرى بار، مۇمكىندىگى شەكتەۋلى بالالاردىڭ، سونداي-اق جەتىم جانە اتا-اناسىنىڭ قامقورلىعىنسىز قالعان بالالاردىڭ جازعى دەمالىسقا تولىقتاي قامتىلۋى ماڭىزدى ەكەنىن ايتتى. وسى ماقساتتا وڭىرلەر اراسىندا ىنتىماقتاستىق ۇيىمداستىرىلادى: بالالار كيەلى جەرلەر مەن تاريحي ورىندارعا ساياحاتتاپ، ءتۇرلى شىعارماشىلىق جانە تانىمدىق جازعى جوبالارعا قاتىسادى. بۇل رەتتە بالالاردىڭ ءومىرى مەن دەنساۋلىعى جولدا دا، دەمالىس ورنىندا دا تولىقتاي قورعالادى.
كەڭەس قورىتىندىسى بويىنشا ۆيتسە-پرەمەر بارلىق ۋاكىلەتتى مەملەكەتتىك ورگاندارعا ۆەدومستۆوارالىق ۇيلەستىرۋدى كۇشەيتۋدى، جازعى كەزەڭگە جوسپارلانعان شارالاردىڭ ورىندالۋىن قاتاڭ باقىلاۋدى جانە بالالاردىڭ قۇقىقتارى مەن قاۋىپسىزدىگىن قامتاماسىز ەتۋگە باعىتتالعان جاڭارتىلعان كەشەندى جوسپاردى ۇكىمەتكە ۇسىنۋدى تاپسىردى.
ۇكىمەت