مينيستر ەڭ الدىمەن كاسپي تەڭىزى جاعالاۋىنداعى كۋرورتتىق ايماقتى دامىتۋ جانە تۋريستەرگە قولايلى جاعداي جاساۋعا باعىتتالعان «جىلى جاعاجاي» زاكىرلىك تۋريستىك جوباسىنىڭ جۇزەگە اسۋ بارىسىمەن، سونداي-اق كەندىرلىدە سالىنىپ جاتقان جاڭا اۋەجايدىڭ قۇرىلىسىمەن تانىستى. بۇل جوبالار ءوڭىردىڭ كولىك قولجەتىمدىلىگىن ايتارلىقتاي ارتتىرىپ، لوگيستيكانى جاقسارتۋعا جانە تۋريستەر اعىنىن كوبەيتۋگە مۇمكىندىك بەرەدى.
سونىمەن قاتار ەربول مىرزابوسىنوۆ تۋريستەر اراسىندا كەڭىنەن تانىمال وڭىردەگى بىرەگەي تابيعي ەسكەرتكىش — بوزجىرا شاتقالىنا باردى. مينيستر وندا ۆيزيت-ورتالىق پەن قوناق ءۇي كەشەنىن سالۋ جوسپارلانىپ وتىرعان ورىندى قاراپ شىقتى. بۇل نىساندار ەكولوگيالىق ستاندارتتاردى ساقتاي وتىرىپ، ءتۋريزمدى تۇراقتى دامىتۋ اياسىندا جۇزەگە اسىرىلادى.
2024 جىلدىڭ قورىتىندىسى بويىنشا ءوڭىردىڭ تۋريستىك سالاسىندا قول جەتكىزىلگەن وڭ ناتيجەلەر اتالعان جوبالاردىڭ وزەكتى ءارى ماڭىزدى ەكەنىن كورسەتتى.
قازىرگى تاڭدا وڭىردەگى ورنالاستىرۋ ورىندارىنىڭ سانى 106-عا جەتتى، بۇل 2023 جىلمەن سالىستىرعاندا 5 نىسانعا كوپ. جالپى تۋريستىك اعىن 462 723 ادامدى قۇرادى (+19%), ونىڭ ىشىندە رەزيدەنتتەر – 419 854 ادام (+20%), رەزيدەنت ەمەستەر – 42 869 ادام (+6%). ال توسەك-ورىن سانى 8 665-كە دەيىن ۇلعايدى (+6%), تۋريستەرگە كورسەتىلگەن قىزمەت كولەمى 18,6 ملرد تەڭگەگە جەتتى (+23%).
سونداي-اق تۋريزم سالاسىنداعى نەگىزگى كاپيتالعا سالىنعان ينۆەستيتسيا كولەمى 14,2 ملرد تەڭگەنى قۇراپ، 2023 جىلمەن سالىستىرعاندا 52%-عا ارتتى (2023 جىلى — 5,7 ملرد تەڭگە).
مينيستر ماڭعىستاۋ وبلىسىنىڭ قازاقستاندا ءتۋريزمدى دامىتۋ ءۇشىن باسىم وڭىرلەردىڭ قاتارىنا كىرەتىنىن اتاپ ءوتتى. تۋريستىك ينفراقۇرىلىمدى قالىپتاستىرۋ، قىزمەت كورسەتۋ ساپاسىن جاقسارتۋ جانە تابيعي رەسۋرستاردى تۇراقتى پايدالانۋ باعىتىنداعى كەشەندى جۇمىس ايماقتىڭ تۋريستىك تارتىمدىلىعىن جاڭا دەڭگەيگە كوتەرۋگە مۇمكىندىك بەرەدى.