تەرگەۋ امالدارىنا ساي، كۇدىكتى 2020–2025 جىلدار ارالىعىندا حالىققا تۇرمىستىق تەحنيكا (ۇيالى تەلەفوندار، تەلەديدارلار، ويىن پريستاۆكالارى، فوتواپپاراتتار جانە ت.ب.) كەپىلىمەن قارىز بەرۋدى ۇيىمداستىرعان. الايدا ونىڭ لومبارد قىزمەتىن جۇزەگە اسىرۋعا مىندەتتى ليتسەنزياسى بولماعان.
ۋاكىلەتتى ورگاندار تاراپىنان باقىلاۋدان جالتارۋ ءۇشىن زاڭسىز قىزمەت كوميسسيوندىق دۇكەندەرى رەتىندە جاسىرىنعان.
قارجىعا مۇقتاج ازاماتتاردىڭ جاعدايىن پايدالانا وتىرىپ، ول تاۋلىگىنە 3,7%-عا دەيىن جەتەتىن جوعارى پايىزدىق مولشەرلەمەلەر بەلگىلەگەن. بۇل زاڭمەن بەلگىلەنگەن 0,3% شەكتەن 12 ەسە جوعارى.
ماسەلەن، كليەنت 257 000 تەڭگە كولەمىندە 10 كۇنگە قارىز راسىمدەپ، كوميسسيا شارتى بويىنشا 51 400 تەڭگە (تاۋلىگىنە 2%) سىياقى تولەۋگە ءماجبۇر بولعان. ال زاڭ بويىنشا بۇل سوما 7 710 تەڭگەدەن اسپاۋى ءتيىس ەدى (0,3%).
قىلمىستىق جولمەن الىنعان تابىس كولەمى 93 ملن تەڭگەدەن اسقان.
سوت سانكتسياسىمەن كۇدىكتىنىڭ 3 اۆتوكولىگى مەن پاتەرىنە تىيىم سالىندى.
وعان قاتىستى ەلدەن شىقپاۋ جانە ءتيىستى مىنەز-قۇلىق تۋرالى قولحات تۇرىندەگى بۇلتارتپاۋ شاراسى قولدانىلدى.
قىلمىستىق ءىس سوتقا جولداندى.
قازاقستان رەسپۋبليكاسى قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى.
ايتا كەتۋ كەرەك، زاڭسىز قارجى ۇيىمدارىنا جۇگىنۋ مۇلىك پەن قاراجاتتان ايىرىلۋ قاۋپىن ارتتىرادى.
قارجىلىق مونيتورينگ اگەنتتىگى ازاماتتارعا كەپىلمەن قارىز بەرەتىن ۇيىمداردىڭ ليتسەنزياسىنىڭ بار-جوعىن مىندەتتى تۇردە تەكسەرۋدى ۇسىنادى، سەبەبى بۇل قىزمەت ءتۇرى مەملەكەتتىك رەتتەۋگە جاتادى.
قر قما ءباسپاسوز قىزمەتى