استانادا ءبىر اپتا ىشىندە دۇنيەجۇزىلىك تاەكۆوندو فەدەراتسياسىنىڭ (World Taekwondo) كۇنتىزبەسىنە ەنگەن ەكى حالىقارالىق جارىس وتەدى. بۇل تۋرالى ەلوردا اكىمدىگىنىڭ رەسمي سايتى قازاقستان تاەكۆوندو (WT) فەدەراتسياسىنىڭ ءباسپاسوز قىزمەتىنە سىلتەمە جاساپ.
22-23 ماۋسىم كۇندەرى التاي تاەكۆوندو وداعىنىڭ تۇڭعىش چەمپيوناتى – Altaic Taekwondo Championships وتسە، 25-27 ماۋسىم ارالىعىندا ءداستۇرلى Kazakhstan Open حالىقارالىق رەيتينگتىك ءتۋرنيرى وتەدى.
قوس دودا جاقسىلىق ۇشكەمپىروۆ اتىنداعى جەكپە-جەك سارايىندا وتەدى.
التاي تاەكۆوندو وداعىنىڭ العاشقى چەمپيوناتى ەرەسەكتەر مەن جاسوسپىرىمدەر اراسىندا وتەدى. جارىس G-1 ساناتىنا ەنگىزىلگەندىكتەن، سپورتشىلار الەمدىك رەيتينگكە قاجەتتى ۇپايلاردى ساراپقا سالادى.
التاي تاەكۆوندو وداعى 2025 جىلى قىتايدىڭ ۋسي قالاسىندا وتكەن الەم چەمپيوناتى بارىسىندا قۇرىلعان بولاتىن. التاي وڭىرىنە كىرەتىن ون ەلدىڭ ۇلتتىق فەدەراتسيالارىنىڭ باسشىلارى ىنتىماقتاستىقتى دامىتۋ، تاجىريبە الماسۋ جانە بىرلەسكەن جارىستار وتكىزۋ ماقساتىندا جاڭا حالىقارالىق ۇيىم قۇرۋ تۋرالى شەشىم قابىلدادى.
قاتىسۋشىلاردىڭ ءبىراۋىزدان قابىلداعان شەشىمىمەن ۇيىمنىڭ العاشقى باسشىسى بولىپ قازاقستان تاەكۆوندو فەدەراتسياسىنىڭ (WT) پرەزيدەنتى كۋدرات شاميەۆ سايلاندى.
25-27 ماۋسىم ارالىعىندا وتەتىن Kazakhstan Open ءتۋرنيرى كادەتتەر، جاسوسپىرىمدەر جانە ەرەسەكتەر اراسىندا ۇيىمداستىرىلادى.
بيىلعى جارىسقا الەمنىڭ 27 ەلىنەن 1106 سپورتشى قاتىسادى دەپ كۇتىلۋدە. اتاپ ايتقاندا، ارمەنيا، اۋستراليا، اقش، ازەربايجان، باحرەين، بەلارۋس، كانادا، گونكونگ، ءۇندىستان، يران، يوردانيا، قازاقستان، كۋۆەيت، قىرعىزستان، موڭعوليا، ومان، پالەستينا، قىتاي، پولشا، كاتار، وڭتۇستىك كورەيا، رەسەي فەدەراتسياسى، ساۋد ارابياسى، تۋنيس، تۇركيا، ءباا جانە وزبەكستان قۇرامالارىنىڭ سپورتشىلارى باق سىنايدى.
Kazakhstan Open – World Taekwondo ۇيىمىنىڭ رەسمي جارىستار تىزىمىنە ەنگەن بەدەلدى تۋرنيرلەردىڭ ءبىرى. تۋرنير جەڭىمپازدارىنا الەمدىك رەيتينگتىڭ 10 ۇپايى بەرىلەدى. كۇمىس جۇلدەگەرلەر 6 ۇپايعا، ال قولا جۇلدەگەرلەر 3,6 ۇپايعا يە بولادى.
استاناعا دۇنيەجۇزىلىك تاەكۆوندو فەدەراتسياسىنىڭ پرەزيدەنتى دوكتور چۋنگۆون چو، ازيا تاەكۆوندو وداعىنىڭ جەتەكشىلەرى مەن حالىقارالىق ۇيىم وكىلدەرىنىڭ كەلۋى جوسپارلانعان.
استانادا قاتارىنان ەكى ءىرى حالىقارالىق ءتۋرنيردىڭ ءوتۋى وتاندىق سپورت ءۇشىن ماڭىزدى وقيعا بولماق. بۇل قازاقستاندىق سپورتشىلارعا ءوز جانكۇيەرلەرىنىڭ الدىندا ونەر كورسەتۋگە مۇمكىندىك بەرىپ قانا قويماي، ەلىمىزدىڭ الەمدىك تاەكۆوندوداعى بەدەلىن ودان ءارى ارتتىرۋعا ىقپال ەتەدى.