تۋريزم جانە سپورت ۆيتسە-ءمينيسترى ميراس تولەباەۆ زاڭنامانىڭ ورىندالۋىن قامتاماسىز ەتۋ ءۇشىن ۆەدومستۆو وبلىستىق جانە قالالىق اكىمدىكتەرمەن، سونداي-اق مادەنيەت جانە اقپارات مينيسترلىگىمەن بىرلەسىپ سىرتقى جارناما مەن وتاندىق باق-قا تۇراقتى مونيتورينگ جۇرگىزەتىنىن اتاپ ءوتتى. وسى جۇمىستىڭ ناتيجەسىندە 1,6 مىڭنان استام بيلبورد الىنىپ تاستالدى. 2024 جىلى «كيبەرنادزور» اقپاراتتىق جۇيەسىنە زاڭسىز قۇمار ويىندار مەن ءباس تىگۋلەردى جارنامالايتىن 10 مىڭنان استام سايت بۇعاتتالۋعا ەنگىزىلدى.
«ازاماتتار كوشەدە نەمەسە باق-تا زاڭسىز بۋكمەكەرلىك جارنامانى بايقاسا، مينيسترلىككە ارىز جازا الادى. دالەلدەر جەتكىلىكتى بولعان جاعدايدا، مينيسترلىك ءتيىستى ورىندارعا سۇراۋ جولداپ، اكىمشىلىك قۇقىق بۇزۋشىلىق تۋرالى ءىس قوزعاۋ ءۇشىن قاجەتتى ماتەريالداردى جينايدى»، دەپ ءتۇسىندىردى ميراس تولەباەۆ.
ۆيتسە-پرەمەر مۇددەلى مەملەكەتتىك ورگاندار مەن وبلىس اكىمدىكتەرىنە زاڭناما تالاپتارىنىڭ ورىندالۋىن ءجىتى قاداعالاۋدى تاپسىردى.
«رۇقسات ەتىلمەگەن ورىنداردا جارناما جاساۋعا جول بەرىلمەۋى ءتيىس. مىڭداعان سايتتار بۇعاتتالعانى تۋرالى ەسەپ بەرىلدى. الايدا، عالامتوردا بۋكمەكەرلىك كەڭسەلەردىڭ جارناماسى ءالى دە بار. بۇل رەتتە سالالىق مينيسترلىكتەر مونيتورينگ جۇمىسىن كۇشەيتۋى قاجەت»، دەپ اتاپ ءوتتى تامارا دۇيسەنوۆا.
ەنگىزىلگەن شەكتەۋلەرگە سايكەس بۋكمەكەرلىك كەڭسەلەر مەن توتاليزاتورلاردى جارنامالاۋعا اشىق كەڭىستىكتەردە، عيماراتتاردىڭ قاسبەتتەرىندە، كولىك قۇرالدارىندا جانە سىرتقى كونسترۋكتسيالاردا، بۋكمەكەرلىك كەڭسەلەردىڭ نەمەسە توتاليزاتورلاردىڭ ورنالاسقان جەرلەرىن قوسپاعاندا، سپورت عيماراتتارىنىڭ ىشىندە جانە سپورتشىلاردىڭ جابدىقتارىندا تىيىم سالىنادى. بۋكمەكەرلىك كەڭسەلەردىڭ لوگوتيپتەرى مەن ساۋدا بەلگىلەرىن باسقا بيزنەستى جارنامالاۋدا جانە ت.ب. پايدالانۋعا بولمايدى.
ايتا كەتەلىك، اكىمشىلىك قۇقىق بۇزۋشىلىق كودەكسىنىڭ 455-بابىنا سايكەس، بۋكمەكەرلىك كەڭسەلەردىڭ جارناماسىن تاراتقاندار ءۇشىن 236 مىڭنان 1,5 ملن تەڭگەگە دەيىن ايىپپۇل قاراستىرىلعان.
ۇكىمەتتىڭ ءباسپاسوز قىزمەتى