بۇگىن قىزىلوردا وبلىسىندا مەملەكەت باسشىمىز قاسىم-جومارت كەمەلۇلىنىڭ باستاماسىمەن قولعا الىنعان "تازا قازاقستان" ەكولوگيالىق باعدارلاماسى اياسىندا ايماق باسشىسى نۇرلىبەك نالىباەۆتىڭ تاپسىرماسىنا سايكەس «تاعزىم ورنى تازا بولسىن، رۋح پەن تازالىق – ءبىر ۇعىم» اتتى جالپىحالىقتىق اكتسياسى ءوتتى.
وڭىردەگى تاريحي-مادەني ەسكەرتكىشتەر، كيەلى ورىندار مەن كوپشىلىك زيرات ەتەتىن بارلىق اۋماقتارعا كوركەيتۋ-كوگالداندىرۋ جۇمىستارى ۇيىمداستىرىلدى. سونىمەن قاتار، اعاش وتىرعىزۋ، قورشاۋلاردى رەتكە كەلتىرۋ، جولداردى تازالاۋ جانە جوندەۋ سەكىلدى جۇمىستار دا جۇرگىزىلدى.
ساۋابى مول يگى شاراعا بارشا وبلىس تۇرعىندارىمەن قاتار ءماسليحات دەپۋتاتتارى، ارداگەرلەر، زيالى قاۋىم وكىلدەرى، مەملەكەتتىك مەكەمە قىزمەتكەرلەرى، اسسامبلەيا، قوعامدىق ۇيىمداردىڭ مۇشەلەرى جانە جاستار بەلسەنە قاتىستى.
پرەزيدەنتىمىز «تازا قازاقستان دەگەنىمىز – قورشاعان ورتانى تازا ۇستاۋ عانا ەمەس. ارينە، ول دا ماڭىزدى. سونىمەن بىرگە، بۇل – وي-سانا تازالىعى دەگەن ءسوز. جان-دۇنيەسى تازا ادام قايىرىمدى، مەيىرىمدى بولادى»، – دەپ، جالپىۇلتتىق باعدارلاما اينالعان باستامانىڭ ءمانىن اشىپ بەردى.
كيەلى ورىنداردى زيرات ەتۋدىڭ بۇرىننان قالىپتاسقان ەرەجەلەرى بار. ونىڭ ەڭ نەگىزگىسى تازالىقپەن بايلانىستى. «ءولى رازى بولماي، ءتىرى بايىمايدى» دەگەن دانالىق وتكەنگە قۇرمەت كورسەتۋدىڭ ماڭىزىن ۇعىندىرادى.
حالقىمىزدىڭ دۇنيەتانىمىندا قورىمدار تەك جەرلەۋ ورنى عانا ەمەس، دۇنيەدەن وتكەندەرگە قۇرمەت كورسەتەتىن، اتا-بابا رۋحىنا تاعزىم ەتەتىن قاسيەتتى جەر. سوندىقتان كەسەنەلەردىڭ، قورىمداردىڭ تازالىعىنا، قاراۋسىز قالماۋىنا ەرەكشە ءمان بەرىلەدى.
وسىنداي تاعىلىمدى باستامالار ارقىلى قوعامدا تازالىققا دەگەن جاۋاپكەرشىلىك ارتىپ، ۇلتتىق قۇندىلىقتارىمىزعا قۇرمەت نىعايا تۇسەدى.
ايتا كەتۋ كەرەك، وبلىستا 72 نىسان كيەلى ورىندار تىزبەسىنە ەنگىزىلگەن. قاسيەتتى كەسەنەلەرگە جەرگىلىكتى بيۋدجەتتەن جانە دەمەۋشىلەردىڭ قولداۋىمەن رەستاۆراتسيالىق، جوندەۋ جۇمىستارىن جۇرگىزىپ، كەلۋشىلەرگە ىڭعايلى ءارى قولجەتىمدى ەتۋ ماقساتىندا ينفراقۇرىلىمدارى جاقسارتىلدى.
اكتسيا اياسىندا ايماقتاعى 200-گە جۋىق قاسيەتتى ورىندار مەن زيراتتاردىڭ اۋماعىن تازالاۋ جۇمىستارىنا 20 مىڭنان اسا تۇرعىندار بەلسەندى قاتىستى.
بۇل باعىتتاعى يگى ىستەر الداعى ۋاقىتتا دا جالعاسىن تاباتىن بولادى.
@قىزىلوردا وبلىسى اكىمىنىڭ ءباسپاسوز قىزمەتى