مەرەكەلىك ءىس-شاراعا وبلىستاعى قۇقىق قورعاۋ ورگاندارىنىڭ باسشىلارى، ونەر جانە قوعام قايراتكەرلەرى جانە اۋدان تۇرعىندارى قاتىستى.
ءراسىم ءۇش دۇركىن «التىن دومبىرا» يەگەرى مۇحتار نيازوۆتىڭ ارناۋىمەن اشىلدى. ايماق باسشىسى جۇرتشىلىقتى جاڭا نىساننىڭ قولدانىسقا بەرىلۋىمەن قۇتتىقتادى.
«بۇگىن ەلى ىرىستى، جەرى كۇرىشتى، بەرەكەسى تاسىپ، بىرلىگى اسقان جالاعاش اۋدانىنداعى بىرقاتار نىساندى ەل يگىلىگىنە تابىستاۋعا جينالدىق. مەملەكەت باسشىسى قاسىم-جومارت كەمەلۇلى «ەلىمىزدىڭ رۋحاني دامۋى ۇلتتىق رۋحقا تىكەلەي بايلانىستى. سول سەبەپتى ازاماتتارىمىزدىڭ رۋحى ارقاشان بيىك بولۋى ءۇشىن مادەنيەتىمىزگە، رۋحانياتىمىزعا باسا ءمان بەرۋىمىز قاجەت» دەگەن بولاتىن.
وتكەن جىل وڭىرىمىزدە «رۋحانيات جىلى» دەپ ايشىقتالىپ، مادەني-كوپشىلىك شارالارمەن بىرگە اۋقىمدى جوبالاردى جۇزەگە اسىردىق. سىر وڭىرىندەگى «رۋحانيات جىلى» جەمىستى بولدى. «اناعا تاعزىم»، «وتباسى ورتالىعى»، كوپفۋنكتسيونالدى 1000 ورىندىق «ونەر ورتالىعى» سالىنىپ، سيمفونيا وركەسترى، ينكليۋزيۆتى تەاتر، جاستار تەاترى، زاماناۋي بي، حور ۇجىمدارى جاساقتالدى. سىر مادەنيەتىنىڭ نەگىزگى برەندى – جىراۋلىق ءداستۇر وكىلدەرىنىڭ «جىراۋلار ءۇيى» اشىلدى. «سامۇرىق قازىنا تراست» قورىمەن بىرگە «ۇستەل تەننيسى» ورتالىعى، «قازمۇنايگاز» كومپانياسىنىڭ دەمەۋشىلىگىمەن «وقۋشىلار سارايى» سالىنىپ، ەل يگىلىگىنە بەرىلدى. بيىل بۇل باعىتتاعى جۇمىستار جالعاسىن تاۋىپ، ءىرى قۇرىلىس نىساندارى ىسكە قوسىلادى.
«رۋحانيات ورتالىقتارى» كوز ىلەسپەس وزگەرىستەرگە تولى جاڭا زامان شاقىرتۋلارىنا جاۋاپ بەرەتىن باسەكەگە قابىلەتتى ۇلت قالىپتاستىرۋدا رۋحاني-مادەني شاڭىراق بولادى دەپ ەسەپتەيمىز. بارشاڭىزدى جاڭا نىساننىڭ اشىلۋىمەن تاعى دا قۇتتىقتايمىن! «رۋحانيات ورتالىعى – بىرلىكتىڭ ورداسى» ەلىمىزدىڭ رۋحاني قازىناسىن تولىقتىرىپ، جۇرتشىلىققا قۋانىش سىيلاسىن. ۇلتتىق قۇندىلىقتارىمىز ۇلىقتالىپ، تاۋەلسىز ەلىمىزدىڭ ابىرويى ارقاشان اسقاق بولعاي!» – دەدى ايماق باسشىسى.
جيىندا جالاعاش اۋدانىنىڭ قۇرمەتتى ازاماتى ومىربەك شامەنوۆ ءسوز سويلەپ، جيىلعان جۇرتشىلىقتى قۇتتىقتادى. اۋداندىق ارداگەرلەر كەڭەسىنىڭ توراعاسى سادىق اليەۆ باتاسىن بەردى. اۋداننىڭ وركەندەۋىنە ۇلەس قوسقان ارداگەرلەر مەن مەردىگەر مەكەمە قىزمەتكەرلەرى ماراپاتتالدى.
ايتا كەتەيىك، بىلتىردان بەرى بارلىق 7 اۋداندا قۇنى 11 ملرد. 500 ملن. تەڭگەنى قۇرايتىن، ىشىندە نەكە قيۋ زالى، كىتاپحانا، مۋزەي، ارحيۆ، جاستار سارايى، ارداگەرلەر مەن انالار ءۇيى بار «رۋحانيات ورتالىقتارى» سالىنىپ، پايدالانۋعا بەرىلۋدە.