استانادا س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىندە دوڭگەلەك ۇستەل ءوتىپ، وندا قازاقستان رەسپۋبليكاسىنىڭ جاڭا كونستيتۋتسياسىنىڭ نەگىزگى ەرەجەلەرى، ونىڭ ءرولى مەن ماڭىزى تالقىلاندى. ءىس-شاراعا 60-قا جۋىق ستۋدەنت پەن وقىتۋشى قاتىستى
ەسكە سالا كەتەيىك، 15 ناۋرىزدا ەلىمىزدە رەفەرەندۋم ءوتىپ، ونىڭ قورىتىندىسى بويىنشا قازاقستاننىڭ جاڭا كونستيتۋتسياسى قابىلداندى. بۇل ادىلەتتى قوعام قۇرۋ، مەملەكەتتىك ينستيتۋتتاردى نىعايتۋ جانە ازاماتتاردىڭ قۇقىقتارى مەن بوستاندىقتارىن قورعاۋ دەڭگەيىن ارتتىرۋ جولىنداعى ماڭىزدى قادام بولدى.
ءىس-شارانىڭ مودەراتورى رەتىندە قوعاممەن بايلانىس جانە بۇقارالىق اقپارات قۇرالدارىمەن جۇمىس دەپارتامەنتىنىڭ ديرەكتورى زەيىن الىپبەك ءسوز سويلەدى.
قاتىسۋشىلار كونستيتۋتسيالىق وزگەرىستەردىڭ نەگىزگى اسپەكتىلەرىن، ولاردىڭ پراكتيكالىق ماڭىزىن جانە ەل بولاشاعىنا ىقپالىن تالقىلادى.
نەگىزگى باياندامانى باسقارما باسشىسى جازيرا جىلقىشيەۆا جاسادى.
«كونستيتۋتسيا – جاي عانا قۇقىقتىق قۇجات ەمەس. ول مەملەكەت پەن قوعام اراسىنداعى سەنىمنىڭ نەگىزى. بۇگىندە جاستار ونىڭ ءمانىن ءتۇسىنىپ، سەزىنىپ، ەل بولاشاعىنا جاۋاپكەرشىلىكپەن قاراۋى اسا ماڭىزدى»، – دەدى ول.
دوڭگەلەك ۇستەلگە قاتىسۋشىلار كونستيتۋتسيانىڭ تەك قۇقىقتىق نەگىزدەردى ايقىندايتىن قۇرال عانا ەمەس، سونىمەن قاتار قوعامنىڭ قۇندىلىقتىق باعدارلارىن بەلگىلەيتىن ماڭىزدى قۇجات ەكەنىن اتاپ ءوتتى. كەزدەسۋ سىندارلى جاعدايدا ءوتىپ، ستۋدەنتتەر وزدەرىن قىزىقتىرعان سۇراقتارىن قويىپ، ساراپشىلاردان جان-جاقتى جاۋاپ الدى.
مۇنداي كەزدەسۋلەر ستۋدەنتتەر اراسىندا قۇقىقتىق مادەنيەتتى نىعايتىپ، جاستاردىڭ مەملەكەت دامۋىنا قوساتىن ۇلەسىن تۇسىنۋگە ىقپال ەتەدى.