كەزدەسۋدە ەكى ەل اراسىنداعى ءوزارا تاۋار اينالىمىن ۇلعايتۋ ماسەلەسى تالقىلاندى.
«ءبىز يرانمەن تاۋار اينالىمىن 3 ميلليارد دوللارعا دەيىن ارتتىرۋ مۇمكىندىگىن كورىپ وتىرمىز. يران نارىعىنا جەتكىزۋ ءۇشىن 162 ميلليون دوللار سوماسىنا استىق، كۇنباعىس مايى، ەت ونىمدەرى جانە باسقا دا تاۋارلاردى قوسا العاندا، 60-تان استام تاۋار پوزيتسياسىن ۇسىنۋعا دايىنبىز», - دەپ اتاپ ءوتتى مينيستر ارمان شاققاليەۆ. ول قازاقستان ەكى مەملەكەت باسشىلارى قول جەتكىزگەن ۋاعدالاستىقتاردى بەلسەندى تۇردە جۇزەگە اسىرىپ جاتقانىن ايتتى. يران قازاقستاننىڭ تاياۋ شىعىستاعى نەگىزگى سەرىكتەستەرىنىڭ ءبىرى بولىپ تابىلادى.
ەكى ەلدىڭ ساۋدا قاتىناستارىن نىعايتۋ ماقساتىندا الدا وتەتىن ساۋدا-ەكونوميكالىق ميسسيا، سونداي-اق 2025 جىلدىڭ اقپانىندا تەگەراندا جوسپارلانعان بيزنەس-فورۋم ماڭىزدى ءرول ويناماق. ميسسيانىڭ ماقساتى - ەلدەر اراسىنداعى ەكىجاقتى قارىم-قاتىناستى نىعايتۋ، قازاقستاندىق وندىرۋشىلەر مەن يراندىق ساتىپ الۋشىلار اراسىندا تىكەلەي بايلانىستار ورناتۋ، سونداي-اق قازاقستاننىڭ ەكسپورتتىق الەۋەتىن كەڭەيتۋ بولىپ تابىلادى. وعان قوسا ساۋدا-ەكونوميكالىق ارىپتەستىكتى دامىتۋعا ىقپال ەتە وتىرىپ، ەكى ەلدىڭ بيزنەسى ءۇشىن جاڭا مۇمكىندىكتەرگە جول اشىلادى.
2024 جىلدىڭ 11 ايىنىڭ قورىتىندىسى بويىنشا قازاقستان مەن يران اراسىنداعى تاۋار اينالىمى 296 ميلليون اقش دوللارىن قۇرادى، بۇل وتكەن جىلدىڭ سايكەس كەزەڭىمەن سالىستىرعاندا 8,1%-عا ارتىق. قازاقستاننان يرانعا ەكسپورت كولەمى 29,1%-عا ءوسىپ، 100,6 ميلليون اقش دوللارىن قۇرادى.
قازاقستاننان يرانعا جەتكىزىلەتىن نەگىزگى تاۋارلار ارپا، بيداي، راپس ءدانى، كۇنباعىس مايى، جۇگەرى، سونداي-اق، قوي، ەشكى جانە سيىر ەتى.